Éxodo 36 - Quechua Ayacucho Bible 1987

¹ Chaynatamá ruranqa Bazaleelpas, Aholiabpas chaynataq lliw maestrokunapas imaynam Tayta Diospa curiosidad, entiendemiento hinaspa yachay qosqanman hina chaynapi Tayta Diospa kamachisqanman hina “Chuya” lugarpi tukuy ima serviciokunata allinllataña ruranankupaq.

Achkallaña ofrendakuna apamusqankumanta

² Moisemá qayarqa Bezaleelta hinaspa Aholiabta, qayarqataqmi Tayta Diospa curiosidad qosqan llapallan yachayniyoq runakunatapas, chay runakunaqa kikillanmantam ofrecekurqaku chay imapas ruraypi yanapakunankupaq.

³ Paykunam Moisesmanta chaskirqaku Israelpa mirayninkunapa lliw ofrenda apamusqankuta chaywan chuya lugarpi serviciokuna ruranankupaq. Israelpa mirayninkunañataqmi sapa temprano apamuqku voluntad ofrendankuta.

⁴ Chayraykum chuya lugarpi tukuy fino trabajo ruraq maestrokuna hamurqaku sapakama llamkayninkuta saqeykuspa.

⁵ Paykunam Moisesta nirqaku: —Tayta Diospa kamachikusqan serviciokunata ruranapaqmi runakuna apamuchkanku necesitasqaykumantapas mas-mastaraq —nispa.

⁶ Chaymi campamentopi Moises willachirqa: —Qaripas-warmipas amaña masta ruraychikchu “Chuya” lugar ruranapaq ofrenda qonaykichikpaqqa —nispa. Chaynata nispanmi harkakurqa manaña mas ofrendata apamunankupaq.

⁷ Materialkunaqa karqa lliw obrapaq kamaqñam chaynataq puchu-puchuñam.

Santuario rurasqankumanta

⁸ Fino obra ruraq llapallan maestrokunam rurarqaku Diospa *f**yachanan karpata. Chaytaqa rurarqaku lino kawpusqa chunka cortinakunamantam. Chay cortinakunapim suma-sumaqta bordarqaku querubin sutiyoq angelkunata. Chaytam rurarqaku morado qaytuwan, grosella qaytuwan hinaspa guindo qaytuwan.

⁹ Sapa cortinapa largonmi karqa chunka iskayniyoq metro parten, anchonñataqmi karqa iskay metro, llapan cortinakunam karqa chay sayayniyoqlla.

¹⁰ Pichqa cortinakunatam tinkinachispa sirarqaku, chaynallatam rurarqaku wakin pichqan cortinakunatapas.

¹¹ Pichqantin cortinapa patanpim churarqaku cordonmanta ojalkunata, chayqa karqa morado qaytumantam. Chaynallatam rurarqaku huknin pichqantin cortinapipas.

¹² Rurarqakum cordonmanta pichqa chunka ojalkunata punta kaq pichqantin sirasqa cortinapa patanpi, chaynallatam rurarqaku huknin pichqantin sirasqa cortinapa patanpipas, rurarqakuqa cordonmanta pichqa chunka ojalkunatam tinkina law patanpi, chay ojalkunaqa karqa chimpa-chimpapuram.

¹³ Rurarqakutaqmi qorimanta pichqa chunka corchetekunatapas, chaykunawanmi tinkirqaku punta kaq pichqantin sirasqa cortinata, tinkirqakuqa chay huknin pichqantin cortinawanmi, chaynamá karqa hukllaman huñusqa Diospa *f**yachanan karpaqa.

¹⁴ Rurarqakutaqmi cabrakunapa pelonmanta chunka hukniyoq cortinakunatapas, chaytaqa rurarqaku Diospa yachanan karpapa hawanpi kananpaqmi.

¹⁵ Llapallan chunka hukniyoq cortinakunapa medidanqa kaynam karqa: largonmi karqa chunka kimsayoq metro parten, anchonñataqmi karqa iskay metro.

¹⁶ Pichqa cortinatam sapakamata tinkinachispa sirarqaku, soqtantin cortinakunatapas hina chaynallatam sirarqaku.

¹⁷ Chay pichqantin sirasqa cortinapa patanpim rurarqaku cordonmanta pichqa chunka ojalkunataqa, rurarqakutaqmi cordonmanta pichqa chunka ojalkunata chay soqtantin sirasqa cortinakunapa patanpipas.

¹⁸ Rurarqakutaqmi broncemanta pichqa chunka corchetekunatapas, chaykunawanmi hapichirqaku cordonmanta ojalkunata chaymi karpaqa karqa chullallaman tinkisqa.

¹⁹ Karpapaqmi rurarqakutaq carneropa qalasnin pukaman teñisqa qatatapas, chaypa hawanpaqpas rurarqakumá fino qalasmanta huk qatatapas.

²⁰ Diospa *f**yachanan karpapaqpas acacia sutiyoq tablakunamantam rurarqaku sayaq marconkunata.

²¹ Sapa marcopa largonmi karqa tawa metro parten, anchonñataqmi karqa parte metro masnin.

²² Marcopura tupanachisqa kananpaqmi sapa marcopi karqa iskay espigakuna. Chaynatamá rurarqaku Diospa *f**yachanan karpapa llapallan marconkunapi.

²³ Iskay chunka marcokunatam rurarqaku Diospa yachanan karpapa *f**alleq lawninpaq.

²⁴ Rurarqakutaqmi qollqemanta tawa chunka toqosqa tiyanakunatapas, iskay toqom karqa sapa marcopi, chaymanmi yaykurqa marcopa iskay espigankuna.

²⁵ Diospa yachanan karpapa *f**ichoq lawninpaqpas rurarqakutaqmi iskay chunka marcokunata.

²⁶ Qollqemantam tawa chunka toqosqa tiyanakunata rurarqaku, iskay toqoyoq tiyanakunam karqa sapa marcopa tiyananpaq.

²⁷ Diospa yachanan karpapa qepa lawninpaqñataqmi otaq intipa seqaykunan lawpaqñataqmi rurarqaku soqta marcokunata.

²⁸ Rurarqakutaqmi iskay marcokunatapas qepan law esquinankunapaq.

²⁹ Chay iskay marcokunam tupanachisqa karqa pampanmanta altonkama huklla kananpaq punta kaq anillokama, chaynatam iskaynin esquinankunapaq rurarqaku iskaynin marcokunawan.

³⁰ Marcokunaqariki karqa pusaqmi, chay pusaq marcokuna tiyananpaqñataqmi karqa chunka soqtayoq qollqemanta tiyanakuna, iskay toqom karqa sapa marcopa tiyananpaq.

³¹ Rurarqakutaqmi pichqa qerukunatapas Diospa *f**yachanan karpapa huklawnin marcokunapaq, chay qerukunaqa karqa acacia sachamantam.

³² Pichqa qerukunam karqa Diospa yachanan karpanpa huklawnin marcokunapaq, pichqa qerukunataqmi karqa Diospa yachanan karpapa qepan lawnin marcokunapaqpas.

³³ Chawpipi kaq qerutam pasachirqaku marcokunapa chawpinta kaylaw cantonmanta waklaw cantonkama.

³⁴ Hinaspam marcokunata qaracharqaku qoriwan. Qorimanta anillokunatapas rurarqakum qerukuna chayninta pasananpaq, qerukunatapas qoriwanmá qaracharqaku.

³⁵ Rurarqakutaqmi morado qaytumanta, grosella qaytumanta, puka qaytumanta, lino kawpusqamanta karpapa cuarton rakinaq telatapas, chay telapa hawanpim sumaqllataña bordarqaku iskay querubin sutiyoq angelkunata.

³⁶ Qoriwan qarachasqa acacia kullumantam tawa pilarkunata rurarqaku chay telata warkunankupaq, chay pilarkunapaqmi fundirqaku qorimanta ganchokunata chaynataq qollqemanta toqosqa tawa tiyanakunatapas.

³⁷ Rurarqakutaqmi karpapa punkunpaq suma-sumaq bordasqa huk telatapas, chay telaqa karqa morado qaytumanta, grosella qaytumanta, guindo qaytumanta hinaspa lino kawpusqamantam.

³⁸ Chay telapaqmi rurarqaku acacia kullumanta pichqa pilarkunata, chay pilarkunataqa rurarqaku ganchoyoqtakamam. Chay pilarkunapa puntanmi anillonkunapiwan qorimanta qarachasqa karqa. Chaykunapa pichqa toqosqa tiyanankunañataqmi karqa broncemanta.