Éxodo 35 - Quechua Ayacucho Bible 1987

Samana punchawpi imakunam ruranankumanta

¹ Moisesmi Israelpa llapallan mirayninkunata huñuruspan nirqa: —Qamkuna ruranaykichikpaqmi Tayta Dios kamachirwarqa kay palabrakunata.

² “Soqta punchawmi tukuy rurayta rurankichik, qanchis kaq punchawñataqmi ñoqapaq sapaqchaspa samankichik, pipas chay punchawpi llamkaqqa wañunqapunim.

³ Maypiña *f**yachaspapas samana punchawpiqa, ninallatapas amam ratachinkichikchu” nispa.

Santuariopaq ofrendakuna qosqankumanta

⁴ Moisesmi Israelpa llapallan mirayninkunata huñuykuspa Tayta Diospa kamachisqanta kaynata nirqa:

⁵ —Kapusuqnikichikmanta ñoqapaq hoqariychik ofrendata, sonqonkumanta voluntadniyoq kaqmi apamunqa ñoqapaq qorita, qollqeta, bronceta,

⁶ morado qaytuta, grosella qaytuta, guinda qaytuta, linomanta llañu qaytuta, cabrakunapa pelonta,

⁷ carnerokunapa pukaman teñisqa qalasninta, fino qalaskunata, acacia sutiyoq qerukunata.

⁸ Achkikunapaq aceiteta, untana aceitepaq especeriakunata, kañanapaq especeriakunata,

⁹ onice alhaja rumikunata hinaspa efodpiwan pecherapi hapichina alhaja rumikunata.

Santuariopi serviciokunamanta

¹⁰ —Qamkunamantam yachayniyoq maestrokuna hamunqa hinaspam ñoqa Tayta Diospa tukuy kaykuna kamachisqayta ruranqa.

¹¹ Ruranqakumá *f**yachanay karpapa qatanta, corchetenkunata, tablankunata, qerunkunata, pilarninkunata, toqosqa tiyanankunata,

¹² baultawan varillankunata chaynataq tapantapas hinaspa cuartota iskayman rakinaq telatapas.

¹³ Ruranqakumá mesatapas varillankunatawan hinaspa llapallan servicionkunatapas chaynataq Diospa tantantapas.

¹⁴ Ruranqakumá achkipaq candelerota serviciontinta, mecherontinta hinaspa achkipaq aceitetapas.

¹⁵ Ruranqakumá incienso kañana altartapas varillankunatawan. Ruranqakumá untana aceiteta, especeriamanta inciensota chaynataq *f**yachanay karpapa punkunpaq telatapas.

¹⁶ Ruranqakumá lliw kañana altarta broncemanta rejillasnintinta, varillankunatapas llapallan servicionkunatawan. Ruranqakumá lavatoriotapas tiyanantinta.

¹⁷ Ruranqakumá patiopa cortinankunatapas, pilarninkunatawan hinaspa toqosqa tiyanankunatawan chaynataq patiopa punkunpa cortinankunatapas.

¹⁸ Ruranqakumá yachanay karpapa estacankunatapas hinaspa patiopa muyuriqninpi estacakunatapas, waskankunatapas.

¹⁹ Ruranqakumá “Chuya” lugarpi servikunanpaq awasqa pachakunatapas otaq sacerdote Aaronpa Diosta servinan pachankunatapas hinaspa sacerdote kananpaq churinkunapa pachankunatapas —nispa.

Israelpa mirayninkuna ofrendakuna qosqankumanta

²⁰ Israelpa huñunasqa mirayninkunaqa Moisespa ñawpaqninmantam lloqsirqaku.

²¹ Sapakamam sonqonmanta voluntadniyoqkuna hamurqaku Tayta Diosman ofrendanku qoq, hamurqakutaqmi maestrokunapas Diosman asuykuna karpata, tukuy servicionkunata hinaspa Dios servina pachakunata ruranankupaq.

²² Hamurqakum sonqonkupi voluntadniyoq warmikunapas-qarikunapas, llapallankum apamurqaku tipakunata, aretekunata, sortijakunata, brazaletekunata chaynataq qorimanta tukuy rikchaq alhajakunatapas. Sapakamamá apamurqaku Tayta Diosman ofrecekusqanku qori ofrendankuta.

²³ Kapuqniyoqkunam apamurqaku morado qaytukunata, grosella qaytukunata, guindo qaytukunata, llañu lino qaytukunata, cabrakunapa pelonkunata, carneropa qaran pukaman teñisqa qalasninkunata, fino qalaskunata.

²⁴ Pipas qollqemanta otaq broncemanta ofrendayoqqa Tayta Diosmanmi apamurqa, acacia sutiyoq qeruyoqkunapas apamurqakum imapipas servikunanpaq.

²⁵ Curiosa warmikunapas puchkasqankutam apamurqaku morado qaytuta, grosella qaytuta, guindo qaytuta chaynataq llañu lino qaytutapas.

²⁶ Voluntadniyoq warmikunapas puchkarqakum cabrakunapa pelonta.

²⁷ Ancha reqsisqa kamachikuqkunañataqmi apamurqaku onice alhaja rumikunata, apamurqakutaqmi efodpi hinaspa pecherapi hapichina alhaja rumikunatapas,

²⁸ especeriakunatapas, achkipaq aceitetapas, untanapaq aceitetapas chaynataq inciensopaq especeriakunatapas.

²⁹ Israelpa mirayninkunam, qaripas-warmipas sonqonkupi voluntadniyoqkuna, tukuy imakunata apamurqaku Moisesta Tayta Dios kamachisqanman hina ruranankupaq, Tayta Diosmanmá ofrendankuta apamurqaku voluntadninkuman hina.

Santuariopi serviciokunata pikunam ruranankumanta

³⁰ Moisesmi nirqa Israelpa mirayninkunata: —Juda ayllumantam Tayta Dios akllaykun Hurpa willkan Bezaleelta, payqa Uripa churinmi.

³¹ Bezaleeltam Dios huntaykun espiritunwan chaynapi curiosidadwan, entiendemientowan hinaspa yachaywan tukuy ima rurananpaq,

³² dibujokunata umanmanta horqospa qoripi, qollqepi hinaspa broncepi llamkananpaq.

³³ Paytamá churarqa alhaja rumikunata labraspa hapiqninpi hapichinanpaq, tablatapas tallananpaq hinaspa tukuy rikchaq fino trabajotapas rurananpaq.

³⁴ Diosmá Bezaleelman qorqa yachayta chaynapi yachachikuq kananpaq, qorqataqmá Aholiab sutiyoq runamanpas, payqa Dan ayllumanta Ahisamacpa churinmi.

³⁵ Paykunamanmá qorqa curiosidadta tukuy rikchaq trabajokunata ruranankupaq hinaspa dibujokunata umankumanta horqonankupaq hinaspa morado qaytumanta, grosella qaytumanta, guindo qaytumanta, llañu lino qaytumanta bordanankupaq chaynataq tukuy rikchaq fino trabajokunatapas ruranankupaq.