Éxodo 33 - Quechua Ayacucho Bible 1987

Ñawpaqman rinankupaq Diospa kamachisqanmanta

¹ Tayta Diosmi nirqa Moisesta: —Egipto nacionmanta horqomusqayki runakunawanyá kaymanta riychik prometesqay allpaman, chay allpataqa juramentowanmi prometerqani Abrahanman, Isaacman hinaspa Jacobman, prometerqaniqa mirayninkunaman qonaypaqmi.

² Ñawpaqnikita angelniyta kachaspaymi wischusaq Canaan casta runakunata, Amor casta runakunata, Het casta runakunata, Ferez casta runakunata, Hiv casta runakunata hinaspa Jebus casta runakunata.

³ Riychikyá tukuy imakunapapas kasqan allpaman, qamkunapa chawpikichiktaqa manam ñoqaqa riymanchu, yanqam risqaykichikpi wañurachikichikman rumi sonqo kasqaykichikrayku.

⁴ Kay mana allin noticiata runakuna uyariruspankum adornonkutapas horqokuruspan llakisqallaña karqaku.

⁵ Tayta Diosmi Moisesta nirqaña Israelpa mirayninkunata kaynata ninanpaq: —Qamkunaqa kankichik rumi sonqo runakunam, chawpikichikman qonqayta chayaramuspayqa wañurachikichikmanmi. Kunanyá horqokuy adornoykikunata hinaptinchá yachasqayta rurasaq —nispa.

⁶ Chayraykum Israelpa mirayninkunaqa adornonkuta horqokurqaku Horeb Orqomantapuni.

Diosman asuykunanku karpamanta

⁷ Moisesmi karpata sayachirqa campamentopa karuneq hawa lawninpi hinaspam suticharqa “Diosman Asuykuna Karpa” nispa. Chaymi pipas Tayta Diosta maskay munaq runaqa lloqsirqa campamentopa hawa lawninpi Diosman Asuykuna Karpaman.

⁸ Diosman Asuykuna Karpaman Moises riptinmi lliw runakunañataq karpankupa punkunpi sayarqaku. Moisestam qawarqaku karpaman yaykunankama.

⁹ Moises karpaman yaykuptinmi sayanpa puyu uraykamuspan karpapa punkunpi sayaykuq chaynapim Tayta Dios rimaq Moiseswan.

¹⁰ Llapallan runakunam karpapa punkunpi sayaq puyuta qawaspa hatariqku hinaspam sapakama karpankupa punkunpi qonqorakuykuspa adoraqku.

¹¹ Tayta Diosmi Moiseswan rimaq pipas amistadninwan rimachkaq hina. Chaymantam Moises kutiq campamentoman. Nunpa churin yanapaqnin joven Josueymi ichaqa mana haykapipas asuriqchu karpamanta.

Diospa uyanta Moises rikuykuy munasqanmanta

¹² Moisesmi Tayta Diosta nirqa: —Qanmi niwarqanki: “Pusay kay runakunata” nispa, aswanqa manam reqsichiwarqankichu pim ñoqawan rinantaqa, qanmi niwarqanki ñoqapiqa confiakusqaykita hinaspa favorecewasqaykita.

¹³ Favorniki ñoqawan kaptinqa ruegakuykim qampa munasqaykita yachachiwanaykipaq chaynapi qamta reqsinaypaq hinaspa qampa favorniki tarinaypaq, amayá qonqaychu kay runakunaqa qampa runaykikuna kasqanta —nispa.

¹⁴ Chaymi Dios nirqa: —Ñoqam qanwan risaq hinaspam samachisqayki —nispa.

¹⁵ Ichaqa Moisesmi nirqa: —Qampuni ñoqaykuwan mana rispaykiqa amayá kaymanta horqowaykuchu.

¹⁶ Ñoqapaq hinaspa runaykikunapaq favorniki kasqantaqa pipas yachanqa ñoqaykuwan riptikim, chaymi ñoqapas hinaspa runaykikunapas kay pachapi runakunamanta rakisqa kasaqku —nispa.

¹⁷ Chaymi Tayta Dios nirqa: —Kay nisqaykitapas rurasaqmi, favorniy qanwan kasqanraykum ñoqaqa sumaqta reqsiki —nispa.

¹⁸ Chaymi Moises nirqa: —Kanchaynikita qawaykachiway —nispa.

¹⁹ Chaymi Tayta Diosñataq nirqa: —Qawachisqaykim tukuy allin kayniyta, willasqaykitaqmi sutiyqa Tayta Dios kasqanta. Kuyapayasaqmi kuyapayay munasqayta hinaspam llakipayasaq llakipayay munasqayta.

²⁰ Ichaqa uyaytaqa manam rikuwaqchu, rikuwaqniy runaqa manam kawsanmanchu.

²¹ Qaway kay ladoypi lugarta, kay hatun rumipa hawanpi sayaptikim

²² kanchayniy pasaptin hatun rumipa raqranman churasqayki hinaspam makiywan pakasqayki pasarunaykama.

²³ Hinaptinmi makiyta suchuriykachiptiy wasayta qawanki, uyaytam ichaqa mana rikuwaqchu —nispa.