Éxodo 32 - Quechua Ayacucho Bible 1987

¹ Orqomanta Moises manaña kutimuptinmi Aaronpa kasqanman runakuna huñunakuruspanku nirqaku: —Rurapuwayku taytachakunata pusawananchikpaq, Egipto nacionmanta horqomuwaqninchik chay Moisestaqa imachá pasarun, manam yachanchikchu —nispa.

² Chaymi Aaron nirqa paykunata: —Horqospa apamuychik warmikichikpa, qari churikichikpa hinaspa warmi churikichikpa qorimanta aretenkunata —nispa.

³ Chaymi llapallan runakuna rinrinpi qorimanta aretenkuta horqorqaku hinaspam Aaronman aparqaku.

⁴ Payñataqmi chaskiykuspan fundisqataña herramientawan tallarqa malta toropa imagenninta hinaptinmi llapa runakuna ninakurqaku: —¡Yaw Israel runakuna, kaymi Egipto nacionmanta horqomuwaqninchik dioskuna! —nispa.

⁵ Kayta uyariruspanmi Aaron malta toropa ñawpaqninpi huk altarta rurarurqa hinaspam qayakurqa: —¡Paqarinmi Tayta Diospaq fiesta kanqa! —nispa.

⁶ Chaymi paqarinnin tutapayta hatarispanku ofrecerqaku lliw kañana ofrendakunata, apamurqakutaqmi Dioswan allinlla kasqankumanta ofrendakunatapas, chaymantam runakuna tiyaykuspanku mikurqaku, tomarqaku. Hinaspam hatarispanku aychankuta kusichirqaku.

⁷ Chaymi Moisesta Tayta Dios nirqa: —Kutiy, Egipto nacionmanta horqomusqayki runaykikunaqa huchallikurunkum.

⁸ Chayllam kamachikuyniykunamanta rakikuruspanku fundisqa malta toro taytachata rurakurunku, adoraspankum chaypaq animalkunatapas wañuchichkanku hinaspam chayta nichkanku: “¡Yaw Israel runakuna, kaymi Egipto nacionmanta horqomuwaqninchik dioskuna!” nispa.

⁹ Moisestam Tayta Dios nirqa: —Kay runakunata qawaspaymi yacharuni cheqaptapuni rumi sonqo kasqankuta.

¹⁰ Dejaykuway piñakuyniywan kunan paykunata castigarunaypaq, paykunata tukuruspaymi qampa miraynikimantaña hatun nacionta rurasaq —nispa.

¹¹ Chaymi Moises yupaychasqan Tayta Diosta ruegakuspan nirqa: —Dios Taytalláy, amayá piñakuychu Egipto nacionmanta horqomusqayki runaykikunapa contranpiqa, paykunataqariki horqomurqanki hatu-hatun atiynikiwanmi.

¹² Egipto runakunachá ninmanku: “Orqokunapi wañurachinanpaqmi hinaspa kay pachamanta chinkarachinanpaqmi mana allinllata piensaspan horqorurqa” nispa. Taytáy, piñakuynikitayá taniykachiy, runaykikunataqa amayá castigaychu.

¹³ Taytáy, amayá qonqaychu serviqniki Abrahanman, Isaacman hinaspa Israelman jurasqaykitaqa, paykunatam nirqanki: “Ñoqam cielopi lucerokunata hina miraynikichikta mirachisaq hinaspam prometisqay lliw allpata miraynikichikkunaman qosaq chaynapi wiñaypaq herenciaykichik kananpaq” nispa.

¹⁴ Chaymi Tayta Diosqa mana allin rurananpaq piensasqanta manaña rurarqachu.

¹⁵ Chaymi Moises orqomanta kutimurqa Chunkantin Kamachikuyta iskay tabla rumikunapi aparikuspan, chaykunaqa karqa iskay lawninpi qellqasqam.

¹⁶ Chay tabla rumikunaqa karqa Diospa rurasqanmi, hina kikin Diostaqmi qellqarqa tablakunapa hawanpi qellqasqa kaqtapas.

¹⁷ Josueymi runakunapa qapariyninta uyariruspan Moisesta nirqa: —Guerrapi hinam campamentopi runakunaqa qaparichkanku —nispa.

¹⁸ Chaymi Moisesñataq nirqa: Chay uyarisqayqa manam veceqpa qaparisqanchu nitaqmi vencechikuqpa qaparisqanchu, ñoqaqa takiqkunapa econtam uyarichkani.

¹⁹ Moisesmi campamentoman asuykuspa rikururqa malta toro taytachatawan runakunapa tususqanta chaymi piñakuywan hapisqan tabla rumikunata chamqarurqa hinaptinmi pakipakururqa orqopa sikinpi.

²⁰ Chay rurasqanku malta toro taytachata hapiykuspam kañarurqa ninapi, ñutuy-ñutuyta kutaruspanmi yakuman maqchiykuspan Israelpa mirayninkunaman tomachirqa.

²¹ Aarontañataqmi Moises nirqa: —¿Imanasurqankitaq kay runakunaqa hatun huchaman urmaykachinaykipaq? —nispa.

²² Chaymi Aaronñataq nirqa: —Ama piñakuychu taytáy, qamqariki yachankim kay runakunaqa mana allinman qokusqa kasqankuta.

²³ Paykunam niwarqaku: “Rurapuwayku taytachakunata pusawananchikpaq. Egipto nacionmanta horqomuqninchik chay Moisestaqa imachá pasarun, manam yachanchikchu” nispa.

²⁴ Ñoqañataqmi nirqani: “Pipapas qorin kaptinqa apamuwaychik” nispa. Hinaptinmi paykuna qowarqaku qorita, chayta ninaman wischuykuptiyñataqmi lloqsiramurqa kay toro taytacha —nispa.

²⁵ Moisesmi qawaykurqa Aaron permitisqanrayku runakuna munasqanku rurakusqankuta chaynataq enemigonkupa burlakunanpaq hina kasqankuta.

²⁶ Chaymi Moisesqa campamentopa punkunpi sayaykuspan nirqa: —Tayta Diospa kaqkunayá ñoqaman huñunakamuychik —nispa. Chaymi paywan huñunakururqaku Leviypa llapallan mirayninkuna.

²⁷ Chaymi paykunata Moises nirqa: —Israelpa yupaychasqan Tayta Diosmi kaynata nin: “Sapakama espadaykichikta alistaspayá karpan-karpan yaykuspa wañuchiychik wawqekichikta, amistadnikichikta hinaspa aylluykichikta.

²⁸ Leviypa mirayninkunamá Moisespa nisqanta hina rurarqaku chaymi yaqa kimsa waranqa runakuna chay punchaw wañururqa.

²⁹ Hinaptinmi Moises nirqa: —Kunanmi Tayta Diospa serviqnin kanaykichikpaq churasqa kankichik, churikichiktapas hinaspa aylluykichiktapas wañuchisqaykichikraykum qamkunataqa bendecisunkichik —nispa.

³⁰ Paqarinnin punchawmi runakunata Moises nirqa: —Qamkunam hatunta huchallikurunkichik, kunanmi ñoqa kutisaq Tayta Diospa kasqanman, icharaqpas mañakuptiy qamkunata pampachaykusunkichikman —nispa.

³¹ Tayta Diospa kasqanman Moises kutispanmi nirqa: —Taytalláy, kay runakunamá hatu-hatunta huchallikurunku qorimanta taytachata rurakuruspanku.

³² Aswanqa huchankutayá pampachaykuy, mana pampachaspaykiqa sutiytapas chinkarachiyá libropi qellqasqaykimanta —nispa.

³³ Chaymi Tayta Dios nirqa: —Pipas contraypi huchallikuqllatam chinkachisaq libroymantaqa.

³⁴ Chaynaqa kunan kutispayá pusay chay runakunata maymi nisqayman. Angelniymi pusasunki, castiganay punchaw chayaramuptinñam paykunataqa castigasaq huchankumanta —nispa.

³⁵ Chaymi runakunata Tayta Dios castigarqa malta toro taytachata Aaronwan rurarachispa adorasqankumanta.