Éxodo 31 - Quechua Ayacucho Bible 1987

Santuariopaq servicionkuna ruraqkunamanta

¹ Moisestam Tayta Dios nirqa:

² —Juda ayllumantam akllaykuni Bezaleelta, payqa Hurpa willkanmi otaq Uripa churinmi.

³ Bezaleeltam huntaykuni espirituywan chaynapi curiosidadwan, entiendemientowan hinaspa yachaywan tukuy imata rurananpaq,

⁴ dibujokunata umanmanta horqospa qoripipas, qollqepipas hinaspa broncepipas llamkananpaq.

⁵ Paytamá churani alhaja rumikunata labraspa hapiqninpi hapichinanpaq, tablatapas tallananpaq hinaspa tukuy rikchaq fino trabajotapas rurananpaq.

⁶ Bezaleelta yanapananpaqmi qochkani Dan ayllumanta Ahisamacpa churin Aholiab sutiyoq runata, llapallan maestrokunamanmi qoykuni yachayta chaynapi qanman tukuy kamachisqayta ruranankupaq.

⁷ Paykunamá ruranqaku ñoqaman asuykuna karpata, Chunkantin Kamachikuyniy waqaychana baulta, chaypa hawanpi kaq tapantapas hinaspa karpapa llapallan servicionkunatapas.

⁸ Ruranqakutaqmi mesatapas servicionkunatawan, qori-puromanta candelerotapas llapallan servicionkunatawan hinaspa incienso altartapas.

⁹ Ruranqakutaqmi lliw kañana altartapas llapallan servicionkunatawan chaynataq lavatoriotapas tiyanantawan.

¹⁰ Ruranqakutaqmi awasqa pachakunatapas otaq sacerdote Aaronpa churakunan ñoqapaq sapaqchasqa pachatapas hinaspa sacerdoteykuna kanankupaq churinkunapa pachankunatapas.

¹¹ Ruranqakumá untana aceitetapas, “Chuya” lugarpaq especeriamanta inciensotapas, chaykunataqa ruranqaku qanman kamachisqayta hinam —nispa.

Semanapi samana punchawmanta

¹² Moisestam Tayta Dios nirqa:

¹³ —Israelpa mirayninkunatayá kaynata niy: “Samana punchawniykunapiqa samankichikpunim, chay punchawpiqa samankichik qamkunawan hinaspa miraynikichikkunawan señal kananpaq rurasqayraykum chaynapim mana qonqankichikchu ñoqa Tayta Diospaq sapaqchasqa kasqaykichikta.

¹⁴ Samana punchawpiqa samankichikpunim, chay punchawqariki kanqa ñoqallapaqña sapaqchanaykichik punchawmi, pipas chay punchawpi mana samaqqa wañunqapunim. Pipas chay punchawpi imapas ruraqqa ayllunmanta chinkachisqam kanqa.

¹⁵ Soqta punchaw llamkaspaykichikmi qanchis kaq punchawñataq samankichik, chay punchawqa ñoqapaq sapaqchasqa kasqanraykum pipas samana punchawpi llamkaqqa wañunqapuni.

¹⁶ Samana punchawpiqa Israelpa mirayninkunam samanqaku, chayqa kanqa wiñaypaq contratom miraynikichikkunapaqpas.

¹⁷ Chayqa kanqa ñoqawan hinaspa Israelpa mirayninkunawan wiñaypaq kaq señalmi, ñoqa Tayta Diosmi soqta punchawpi cielokunatawan kay pachata rurarqani hinaspam qanchis kaq punchawpi ruranayta tukuspay samarqani.

Qorimanta torota adorasqankumanta

¹⁸ Sinai Orqopi Tayta Dios rimayta tukuruspanmi Moisesman qoykurqa iskay tabla rumikunapi Chunkantin Kamachikuyta, chaykunaqa karqa Diospa dedonwan tabla rumikunapi qellqasqam.