Éxodo 3 - Quechua Ayacucho Bible 1987

Moisesta Dios kamachisqanmanta

¹ Moisesmi Madian lawpi sacerdote Jetro suegronpa ovejankunata michichkaspan qatirqa chunniq orqopa qepanman hinaspam chayarurqa Horeb sutiyoq Diospa orqonman.

² Chaymi Tayta Diospa angelnin rikuriykurqa Moisesman rupachkaq ninapi, chayqa karqa tankar kichkapim. Moises sumaqta qawaykuptinmi tankar kichkaqa rupaspapas mana kañakurqachu

³ chaymi Moises nirqa: —Qawaramusaq kunallan wak admirakuypaq rikusqayta. ¿Imanasqataq wak tankar kichkaqa rupaspapas mana tukurunchu? —nispa.

⁴ Qawaykunanpaq riqta Tayta Dios qawaykuspanmi tankar kichkamanta qayamurqa: —¡Moises, Moises! —nispa. Hinaptinmi payñataq nirqa: —¿Imata, señor? —nispa.

⁵ Chaymi Diosñataq nirqa: —Ama asuykamuwaychu. *f**Usutaykita horqokuy, sarusqayki allpaqa ñoqapaq sapaqchasqam —nispa.

⁶ Diosqa nirqataqmi: —Ñoqaqa kani abueloyki Abrahampa, Isaacpa hinaspa Jacobpa Diosninmi —nispa. Chaymi Moises uyanta tapakuykurqa Dios qawaykuyta manchakuspan.

⁷ Tayta Diosqa nirqataqmi: —Qawachkanim Egipto nacionpi runaykunapa ñakarisqanta, uyarichkanitaqmi llamkachiqninkunarayku waqasqankutapas. Yachanitaqmi nanaypi kallasqankutapas.

⁸ Chaymi uraykamuni Egipto runakunamanta libranaypaq. Egipto nacionmantam tukuy imakunapapas kasqan hatun sumaq allpaman paykunata pusasaq. Chay allpapim *f**yachachkanku Canaan casta runakuna, Het casta runakuna, Amor casta runakuna, Ferez casta runakuna, Hiv casta runakuna hinaspa Jebus casta runakuna.

⁹ Israelpa mirayninkuna waqasqantam uyariruni, rikunitaqmi Egipto runakunapa ñakarichisqantapas.

¹⁰ Chayraykum kunan Faraonman kachasqayki Israelpa miraynin runakunata Egipto nacionmanta horqomunaykipaq.

¹¹ Chaymi Diosta Moises nirqa: —¿Pitaq ñoqaqa kani Rey Faraonman rinaypaqqa hinaspa Egipto nacionmanta Israelpa mirayninkuna horqomunaypaqqa? —nispa.

¹² Hinaptinmi Dios nirqa: —Ñoqam yanapasqayki, qamta kachasqay señalmi kayna kanqa: Egipto nacionmanta runaykunata horqomuspaykim kay orqopi yupaychawankichik.

¹³ Ichaqa Moisesmi Diosta nirqa: —Israelpa mirayninkunaman rispaymi nimusaq: “Abueloykichikkunapa Diosninmi qamkunaman kachamuwan” nispa. “¿Imataq sutin?” nispa tapuwaptinqa ¿Imanisaqtaq paykunataqa?

¹⁴ Chaymi Diosñataq Moisesta nirqa: —ÑOQAQA KANI HINA KAQLLAM. Chaynaqa Israelpa mirayninkunamanmá ninki: “ ‘ÑOQAM KANI’ sutiyoqmi qamkunaman kachamuwan” nispa.

¹⁵ Kasqallanmi Moisesta Dios nirqa: —Kaynatam Israelpa mirayninkunaman ninki: “Abueloykichik Abrahampa, Isaacpa hinaspa Jacobpa Diosninmi kachamuwan qamkunaman. Payqa Tayta Diosmi” nispa. Kaymá wiñaypaq sutiyqa, chay sutiywanmi yuyariwankichik wiña-wiñaypaq.

¹⁶ Israelpa ancianonkunata huñumuspayá nimuy: “Abueloykichik Abrahampa, Isaacpa hinaspa Jacobpa Diosninmi rikuriykuwaspa niwarqa: ‘Cheqaptapunim qamkunata watukamuykichik Egipto nacionpi imam rurasusqaykichikta qawanaypaq.

¹⁷ Ñoqam Egipto nacionpi ñakarisqaykichikmanta horqomusqaykichik Canaan casta runakunapa, Het casta runakunapa, Amor casta runakunapa, Ferez casta runakunapa, Hiv casta runakunapa hinaspa Jebus casta runakunapa allpanman pusanaypaq. Chayqa tukuy imakunapapas kasqan allpam’ nispa.”

¹⁸ Israelpa ancianonkuna kasususpaykim qanwan kuska rinqaku chaymi Egipto nacionpi reyta ninkichik: “Hebreo castakunapa yupaychasqan Tayta Diosmi tariramuwanku chayraykum kunan risaqku chunniqman kimsa punchaw puriyta chaynapi yupaychasqayku Tayta Diosman animalkunata wañuchipuspa adoramunaykupaq” nispa.

¹⁹ Aswanqa ñoqam yachani Egipto nacionpi reyqa mana kacharisunaykichikta. Kacharisunkichikqa atiyniywan horqoptiyñam.

²⁰ Ñoqam atiyniywan Egipto runakunata castigasaq tukuy rikchaq admirakuypaq rurayniykunawan, chaymantañam Faraonqa kachaykusunkichik.

²¹ Ñoqam favorecechisqaykichik Egipto runakunapa qayllanpi chaynapim ripuspaykichikpas tukuy imata apakunkichik.

²² Sapa warmim vecinanmanta hinaspa samapakuqnin warmimanta mañanqa qori-qollqe alhajakunata hinaspa pachakunata, chaykunawanmi churachinkichik churi-wawaykichikkunata. Chaynatamá qechunkichik Egipto runakunapa tukuy imankunata —nispa.