Éxodo 25 - Quechua Ayacucho Bible 1987

Santuario ruranankupaq ofrendakuna qosqankumanta

¹ Moisestam Tayta Dios nirqa:

² —Israelpa mirayninkunatayá niy ofrendakunata apamuwanankupaq. Llapallan runakunapa voluntadwan qosqan ofrendatam chaskinkichik.

³ Paykunamantamá chaskinkichik: qorita, qollqeta, bronceta,

⁴ morado qaytuta, grosella qaytuta, guindo qaytuta, linomanta llañu qaytuta, cabrakunapa pelonta,

⁵ carneropa pukaman teñisqa qalasninkunata, fino qalaskunata, acacia sutiyoq qerukunata,

⁶ achkikunapaq aceiteta, untana aceitepaq especiariakunata, kañanapaq especiariakunata,

⁷ efodpaq hinaspa pecherapaq onice alhaja rumita chaynataq hapichinapaq alhaja rumikunatapas.

⁸ Huk santuariotayá rurapuwaychik qamkuna ukupi *f**yachanaypaq.

⁹ Yachanay karpatawan chaypi llapallan serviciokunataqa kay qawachisqayman hinam rurankichik.

Diospa Baulninmanta

¹⁰ —Rurachinkitaqmi acacia sutiyoq tablamanta huk baultapas. Largonmi kanqa huk metro tumpa maschan, anchonñataqmi kanqa parte metro masnin, sayayninñataqmi kanqa parte metro masnin.

¹¹ Qori-purowanmi qarachanki chay baulpa hawantawan ukuntaqa hinaspam patanpa muyuriqninpipas qorimanta molduranta rurachinki.

¹² Fundichispataqmi rurachinki baulpaq qorimanta tawa anillokunata, chaykunatam churachinki baulpa tawan esquinanpa waqtanman, iskaynin anillotam churachinki huklawninman, iskaytataqmi churachinki huklawninmanpas.

¹³ Varillakunatapas acacia kaspimanta rurachispaykim qarachanki qoriwan.

¹⁴ Chay varillakunatam baulpa waqtanpi anillokunaman ustuchinki chaykunawan hoqarispa baulta hombronankupaq.

¹⁵ Baulpa anillonkunapim chay varillakunaqa kanqa mana horqona.

¹⁶ Chay baulpa ukunpim churanki qosqay Chunkantin Kamachikuykunata.

¹⁷ —Rurachinkitaqmi chay baulpaq qori-puromanta huk tapatapas chaypa hawanpi huchakuna pampachasqa kananpaq, chaypa largonqa kanqa huk metro tumpa maschanmi, anchonñataqmi kanqa parte metro masnin.

¹⁸ Chay tapapa iskay lawninpa cantonpipas rurachinkim qorimanta martillasqa iskay querubin sutiyoq angelkunata.

¹⁹ Chay tapawan iskaynin angelqa huk piezallamanta rurasqam kanqa. Huknin angelmi kanqa kaylaw cantonpi, hukninñataq waklaw cantonpi.

²⁰ Angelkunapa raprankunam llantuchkaq hina kichasqa kanqa tapapa hawanman, uyankuñataqmi qawanakuchkaq hina kumuykanakuspa tapata qawanqaku.

²¹ Chay tapataqa baulpa hawanmanmá churanki, chay baulmantaqmi churanki ñoqapa qosqay Chunkantin Kamachikuytapas.

²² Chaypi tupanakuptinchikmi, rimapayasqayki tapapa hawanmanta otaq Chunkantin Kamachikuyniy waqaychana baulpa hawanpi kaq angelkunapa chawpinmanta, chaypim willasqayki Israelpa mirayninkunapaq lliw kamachikuyniykunata.

Diospa qayllanpi tanta churananku mesamanta

²³ —Rurachinkitaqmi acacia sutiyoq tablamanta huk mesatapas, largonmi kanqa huk metro, anchonñataqmi kanqa yaqa parte metro, sayayninñataqmi kanqa parte metro masnin.

²⁴ Chay mesatam qori-purowan qarachanki, muyuriqninpiñataqmi rurachinkitaq qorimanta molduranta.

²⁵ Rurachinkitaqmi mesapa muyuriqninpi media cuarta maschan adornotapas, chay adornopa muyuriqninpiñataqmi qorimanta molduranta rurachinki.

²⁶ Rurachinkitaqmi qorimanta tawa anillokunatapas, chaykunataqa churachinki mesapa tawantin chakinpa waqtankunapim.

²⁷ Anillonkunaqa kanqa adornopa uraychanpim chayman varillakunata ustuchispa mesata apanankupaq.

²⁸ Acacia sutiyoq kaspimanta varillakunata rurachispam qoriwan qarachanki, chaykunawanmi mesata hombronqaku.

²⁹ Rurachinkitaqmi mesapaq platokunatapas, wisllakunatapas, aysakukunatapas hinaspa vino ofrenda tallinapaq tazonkunatapas, tukuy chaykunaqa kanqa qori-puromantam.

³⁰ Chay mesamanmi mana pisiyta churanki ñoqapaq sapaqchasqaykichik tantata otaq qayllaypi churanaykichik tantata.

Qori candeleromanta

³¹ —Rurachinkitaqmi qori-puromanta martillasqa huk candelerota, huk piezallamanta rurasqam kanqa tiyananpas, tronconpas, copankunapas hinaspa umpawan waytankunapas.

³² Chay candeleropa waqtankunamantam soqta kallmakuna lloqsinqa, kimsa kallmam lloqsinqa huknin waqtanmanta, kimsañataq huknin waqtanmanta.

³³ Chay candeleropa tronconmanta lloqsiq soqtantin sapa kallmakunapim kanqa kimsa copakuna, chay copakunapa rikchayninqa kanqa almendras wayta hinam, sapakamam kanqa umpayoq hinaspa waytayoq.

³⁴ Candeleropa tronconpipas kanqa tawa copakunam, chay copakunapa rikchayninqa kanqa almendras wayta hinam, chaykunaqa kanqa umpayoq hinaspa waytayoqkamam.

³⁵ Candeleropimá kanqa kimsa pares kallmakuna. Chay candeleropa qallariyninpim kanqa sapakamapaq huk umpa, chay umpakunam hapinqa chay soqtantin kallmakunata.

³⁶ Umpakunawan kallmakunapas hina chay chulla piezallamantam kanqa qori puromanta martillasqa.

³⁷ Rurachinkitaqmi qanchis mecherokunatapas, chaykunatam churanki ñawpaqman achkinanpaq.

³⁸ Qori-puromantataqmi rurachinki mecha limpianakunatapas chaynataq mecha limpianapaq platochankunatapas.

³⁹ Candelerotawan servicionkunatam rurachinki kimsa chunka kimsayoq kilo qori-puromanta.

⁴⁰ Chaykunataqa rurachinki Sinai Orqopi qawachisqayman hinam.