Éxodo 24 - Quechua Ayacucho Bible 1987

Tayta Dioswan huktawan contrato rurasqankumanta

¹ Moisestam Tayta Dios nirqa: —Ñoqapa kasqayman hamuspaykiyá pusamuy Aaronta, Nadabta, Abiuta hinaspa Israel casta qanchis chunka ancianokunata, paykunaqa karullapim qonqorakunqaku.

² Qamllam ñoqamanqa asuykamuwanki, pusamusqayki runakunaqa amam asuykamuwanqakuchu nitaqmi runakunapas qanwanqa seqamunqachu —nispa.

³ Chaymi Moises rispan Tayta Diospa tukuy nisqankunata runakunaman willarqa, willarqataqmi Tayta Diospa qosqan lliw leykunatapas hinaptinmi chulla runa hinalla llapallanku nirqaku: —¡Tayta Diospa tukuy nisqankunataqa rurasaqkum! —nispa.

⁴ Chaymi Tayta Diospa tukuy nisqankunata Moises qellqarqa hinaspam tutapayta hatarispan huk altarta rurarqa Sinai Orqopa ñawpaqninpi. Sayachirqataqmi chunka iskayniyoq suytu rumikunatapas, chaynataqa rurarqa Israelpa chunka iskayniyoq ayllunkunaman hinam.

⁵ Kacharqataqmi Israel casta wakin mozokunatapas animalkunata wañuchispa Tayta Diospaq lliwta kañanankupaq, wañuchirqakutaqmi Tayta Dioswan allinlla kasqankumanta ofrenda torokunatapas.

⁶ Moisesmi animalkunapa parten yawarta chaskispan medianokunapi churarqa, wakin yawartañataqmi altarpa hawanman chaqchurqa.

⁷ Contrato librota hapiykuspanmi leerqa runakuna uyarinanpaq, chaymi paykunañataq nirqaku: —Tayta Diospa tukuy nisqanta ruraspam kasukusunchik —nispa.

⁸ Chaymi Moises yawarta hapiykuspan runakunaman challastin nirqa: —Kay yawarmi ñoqanchikwan Tayta Diospa contrato rurasqanpa señalnin, chay contratotaqa rurarqa imaynam rimapayawasqanchikman hinam —nispa.

⁹ Moises seqaptinmi paywan rirqa Aaron, Nadab, Abiu hinaspa Israel casta qanchis chunka ancianokuna.

¹⁰ Chaypim Israelpa Diosninta rikurqaku. Chakinpa sarusqanmi kachkasqa suma-sumaq kichasqa cielo hina hinaspa safiro alhaja rumi hina.

¹¹ Diosqa manam imanarqachu Israelpa castan kamachikuqkunataqa chaymi Diosta qawarqaku hinaspam mikuspanku tomarqaku.

Sinai Orqopi Moises kasqanmanta

¹² Tayta Diosmi Moisesta nirqa: —Seqamuy ñoqapa kasqay orqoman hinaspa chaypi suyaway, tabla rumikunapi qellqasqay yachachikuytawan kamachikuytam qanman qosqayki chaynapi runakunaman yachachinaykipaq —nispa.

¹³ Chaymi Moisesqa yanapaqnin Josueypiwan pasarqa Diospa kasqan orqoman.

¹⁴ Chaymi ancianokunata nirqa: —Kayllapi suyaykuwayku kutimunaykukama. Aaronwan Hurpas qamkunawanmi kachkan, pipapas quejan kaptinqa paykunaman rispamá willakunkichik —nispa.

¹⁵ Moises orqoman seqaruptinmi orqota puyu tapaykurqa.

¹⁶ Tayta Diospa kanchayninñataqmi tiyaykurqa Sinai Orqopa hawanman, puyum soqta punchaw orqota taparurqa. Qanchis kaq punchawpiñataqmi puyu ukumanta Moisesta Tayta Dios qayamurqa.

¹⁷ Tayta Diospa kanchaynintam rikurqaku Israelpa mirayninkuna orqopa puntanpi lenguachkaq ninata hina.

¹⁸ Chaymi Moises puyu ukuman yaykuspan seqarqa orqoman. Moisesmi chay orqopi karqa tawa chunka punchaw hinaspa tawa chunka tutan.