Éxodo 23 - Quechua Ayacucho Bible 1987

Allin arreglo ruranapaq leykunamanta

¹ —Amam willakachakunkichikchu yanqa rimaykunataqa. —Amataqmi falso testigo kanaykipaqqa mana allin runakunawanqa rimanakunkichu.

² Achkallaña kaptinkupas amam chaqrukunkichu mana allin ruraqkunamanqa, testigakuspaqa amam sayapakunki achka runakunamanchu. Cheqapllatam rimankiqa.

³ Amataqmi wakchamanpas sayapakunkichu pleitonpiqa.

⁴ —Enemigoykipa chinkaq bueyesnintapas otaq asnontapas tarispaykiqa kutirachipunkipunim.

⁵ Cheqnisuqnikipa cargayoq asnon llasaywan urmaruqta rikuspaykiqa amam qawayllaqa-qawankichu aswanqa yanapaykunkim sayarinanpaq.

⁶ —Wakcha runa pleitopi kaptinqa amam negankichu allin arreglo rurayta.

⁷ —Llulla runataqa amam chaskinkichu mana culpayoq allin ruraq runata wañuchinaykipaqqa, culpayoq kaqkunataqa castigasaqpunim.

⁸ —Amam chaskinkichu mana allin ruranaykipaq regalotaqa, chay regalokunaqa allin ruraqkunatapas pantachinmi, allin ruraq runakunapa cheqap rimasqantapas muyuchinmi.

⁹ —Amam ñakarichinkichu forastero runataqa, qamkunaqa forasteropa imaynam kasqantaqa yachankichikmi. Forasteromá karqankichik Egipto nacionpi.

Chakrakuna samachinamanta

¹⁰ —Soqta watam chakraykipi tarpuspa cosechanki.

¹¹ Aswanqa qanchis kaq watapiqa chakraykitam samachinki, chaynataqa ruranki castaykimanta wakchakuna pallapakuspan mikunankupaqmi. Puchuqnin kaqtañataqmi purun animalkuna mikunqa, chaynallatam ruranki uvas huertaykiwanpas chaynataq aceitunas huertaykiwanpas.

¹² —Soqta punchawmi ruraynikita ruranki, qanchis kaq punchawpiñataqmi samanki chaynapi bueyesnikipas, asnoykipas samananpaq. Chaynapim wasikipi naceq sirvientekipas hinaspa wasikipi samakuq forasteropas kallpata hapinqa.

¹³ —Kasukuychikyá tukuy nisqaykunata. Amam yuyarinkichikchu nitaqmi rimankichikchu sapaq dioskunapa sutintaqa.

Watapi kimsa hatun fiestakunamanta

¹⁴ —Watapim kimsa kutita hatun fiestata rurapuwanki.

¹⁵ Mana Qonchuyoq Tanta Fiestatam ruranki. Kamachisqayman hinamá qanchis punchawpuni mana qonchuyoq tantata mikunki. Chay fiestataqa ruranki Abib sutiyoq killapim, chay killapim Egipto nacionmanta lloqsimurqankichik. Mana imayoqqa amam pipas ñawpaqniymanqa asuykamunqachu.

¹⁶ —Rurankitaqmi tarpusqaykimanta Cosecha Qallariy Fiestatapas chaynataq Cosecha Tukuy Fiestapas, kaytaqa ruranki sapa wata cosecha tukuytam.

¹⁷ —Watapim kimsa kutita llapallan qarikuna ñoqa Señor Diosman asuykamuwanqaku.

¹⁸ —Animalta wañuchispaykiqa yawarnintawan kuskataqa amam ofrecewankichu qonchuyoq tantataqa, amataqmi paqarinnin punchawkamaqa wirantapas puchuchinkichu.

¹⁹ —Chakraykipi punta kaq allin rurutam yupaychasqayki ñoqa Tayta Diospa wasiyman apamunki. —Amam uña cabrachataqa mamanpa lechepiqa yanunkichu.

Israel casta runakunata Tayta Diospa angelnin pusasqanmanta

²⁰ —Ñoqam qampa ñawpaqnikita angelta kachachkani risqaykipi waqaychasunaykipaq chaynapi allichapusqay sitioman chayachisunaykipaq.

²¹ Paypa nisqanta uyarispayá kasukuy, amayá hatariychu paypa contranpiqa, payqariki ñoqapa rantiypim kachkan, mana kasukuq kasqaykichikmantaqa manam payqa pampachasunkichikchu.

²² Ichaqa cheqaptapuni nisqanta uyarispayki tukuy kamachisqayta ruraptikiqa enemigoykikunapa enemigon kaspaymi paykunapa contranpi kasaq.

²³ Angelniy pusasuspaykim chayachisunki Amor casta runakunapa, Het casta runakunapa, Ferez casta runakunapa, Canaan casta runakunapa, Hiv casta runakunapa hinaspa Jebus casta runakunapa kasqanman. Paykunataqa ñoqam chinkachisaq.

²⁴ Paykunapa taytacha-mamachanmanqa amam qonqorankichu nitaqmi adorankichu. Paykunapa rurasqanta hinaqa amam qatipakunkichu aswanqa lliwtam puchukachinki hinaspam suytu rumi adorasqankutapas lliwta ñutupanki.

²⁵ Yupaychasqaykichik ñoqa Tayta Diosllatam adorawankichikqa hinaptinmi bendecisaq mikunaykitawan tomanaykita, ñoqataqmi qamkunamantaqa onqoykunatapas wischusaq.

²⁶ Llaqtaykipiqa warmikunapas manam abortanqachu nitaqmi mana wachakuqpas kanqachu, unaytam kawsachisqayki.

²⁷ —Ñawpaqnikichikta riptiymi yaykunaykichik allpapi runakuna anchallataña mancharikuspa chaqwachisqa kanqaku. Enemigoykikunam ñawpaqnikimanta ayqekunqa.

²⁸ Qampa ñawpaqnikitam wayliskunata kachasaq chaynapi Hiv casta runakunata, Canaan casta runakunata hinaspa Het casta runakunata qampa ñawpaqnikimanta wischunanpaq.

²⁹ Chay runakunataqa manam huk watallapichu ñawpaqnikimantaqa wischusaq, watallapi qarqoruptiyqa allpam purunyarunman hinaptinmi purun animalkunapas miraruspan contraykichikpi karunman.

³⁰ Miranaykikamam chay runakunataqa as-asllamanta ñawpaqnikimanta wischusaq hinaptinmi chay allpaqa qamkunapaqña kanqa.

³¹ Qanman qosqay nacionpa linderonmi kanqa Puka Lamar Qochamanta qallarispa Filistea Runakunapa Lamar Qochankama chaynataq chunniqmanta qallarispa Eufrates Mayukama. Chay lawkunapi *f**yachaqkunataqa qamkunamanmi qosqaykichik wischunaykichikpaq.

³² —Paykunawanqa amam contratota rurankichu nitaq diosninkuwanpas.

³³ Allpaykipiqa amamá *f**yachanqakuchu, yachaptinkuqa diosninkuta adoraspam huchallikuwaq ñoqapa contraypi chaynapim qamkunapaqqa kanman urmachiq rumi hina.