Éxodo 22 - Quechua Ayacucho Bible 1987

Dañomanta leykuna

¹ —Pipas suwakurunman bueyesta otaq ovejatapas hinaspañataq nakarunman otaq *f**rantikurunmanpas hinaspaqa huk bueyesmantam sayachipunqa pichqa bueyestaña, huk ovejamantañataqmi qonqa tawa ovejataña.

² —Sichu suwata tarirunmanku suwakunanpaq wasi yaykuchkaqta hinaspa maqaruspa wañurachinmanku hinaptinqa chay maqaqninqa manam runa wañuchiqpaqchu sentenciasqa kanqa.

³ Ichaqa achikyaqtaña chay suwata wañurachiptinqa chay maqaqninmi runa wañuchiqpaq sentenciasqa kanqa. Chay suwakuq kawsachkaspanraq hapirachikuspam ichaqa dueñonman lliwta sayachipunqapuni, mana imapas sayachipunanpaq kaptinqa rantikusqam kanqa suwakusqanmanta pagananpaq.

⁴ —Suwapa makinpi bueyesta, asnota otaq ovejata kawsachkaqtaraq tariruptinkuqa chay suwam huk chaynatawanraq sayachipunqa.

⁵ —Pipas animalninta qaykunman chakranpi otaq uvas chakranpi michinanpaq hinaptinñataq hukpa tarpukuyninta dañorachinman hinaspaqa sayachipunqam allinnin kaqwan chakranmanta chaynataq uvas chakranmantapas.

⁶ —Pipas ninawan kañachkaptin chay nina kichkakunaman chayaruspa ruparunman huñusqa kawsayta otaq sayaq kawsaytapas hinaptinqa chay nina ratachiqmi dueñonman sayachipunqapuni kañasqanmanta.

⁷ —Pipas qollqenta otaq imantapas churachikunman runamasinman hinaptinñataq chay churapakuq runapa wasinmanta pipas suwarunman, chay suwata tariruptinkuqa chay suwam sayachipunqa huk chaynatawanraq.

⁸ Chay suwata mana tariptinkuqa chay churapakuqmi Diospa qayllanman pusasqa kanqa chaynapi runamasinpa kapuqnin suwakusqanmanta otaq mana suwakusqanmantapas jurananpaq.

⁹ —Sichum pipas bueyesta otaq asnota otaq ovejata otaq pachata otaq imatapas hapikuykuchkaspan ninmanraq llullakuspan: “Ñoqapam kayqa” nispa hinaptinqa Diospa qayllanpim arreglanqaku, culpayoq kaqmi sayachipunqa huk chaynatawanraq.

¹⁰ —Pipas runamasinman qonman asnonta otaq bueyesninta otaq ima animalnintapas waqaychapunanpaq hinaptin chay animal wañurunman otaq maqapasqa karunman otaq mana pipapas rikusqanta suwasqa karunman hinaptinqa

¹¹ chay waqaychaqmi Tayta Diospa qayllanpi juramentanqa chay runamasinpa kapuqnintaqa mana suwakusqanmanta hinaptinmi animalpa dueñonqa cheqap kasqanpaq chaskinqa chaynapim chay animal waqaychaqqa mana sayachinqachu.

¹² Aswanqa qawachkaptin animal suwasqa karuptinqa sayachipunqam dueñonman.

¹³ Purun animal wañurachiptinqa apamunqam puchunta hinaptinmi mana paganqachu purun animalpa wañurachisqanmanta.

¹⁴ —Pipas runamasinmanta prestakunman uywanta hinaptin dueñonpa mana rikusqanta imanakurunmanpas otaq wañurunmanpas hinaptinqa sayachipunqapunim.

¹⁵ Ichaqa dueñon qawachkaptin wañuruptinqa manam sayachipunqachu, alquilasqa kaptinqa alquilerllantam pagapunqa.

Runamasinkuwan allin kawsanamanta leykuna

¹⁶ —Manaraq compromisoyoq doncella sipasta pipas engañaruspa paywan puñuruspaqa pagapunqam sipaspa taytanman hinaspam chay sipaswan casarakunqa.

¹⁷ Taytan mana casarachiyta munaptinqa casarachkaq hinam engañasqanmanta sipasman qollqenpi paganqa.

¹⁸ —Brujataqa wañuchinkichikpunim.

¹⁹ —Pipas animalwan huchallikuqqa wañunqapunim.

²⁰ —Adoranaykipaqqa Tayta Diosllapaqmi animaltaqa wañuchinki, huk dioskunapaq animal wañuchiqqa wañunqapunim.

²¹ —Forasterotaqa amam engañankichu nitaqmi ñakarichinkichu. Qamkunapas Egipto nacionpim forastero karqankichik.

²² —Amam pi viudatapas nitaq mana tayta-mamayoqtapas ñakarichinkichu.

²³ Ñakarichisqaykirayku pay mañakuwaptinqa uyarisaqpunim.

²⁴ Chaynata ruraptikichikqa sinchita piñakuspaymi guerrawan wañuchisqaykichik, warmikichikñataqmi viuda kanqa, churikichikkunapas mana taytayoqmi kanqaku.

²⁵ —Qanwan kaq huk wakcha runayman qollqeta prestaspaykiqa amam miraynillan cobrakuq runa hinaqa kankichu, amam llumpay mirayniyoqtaqa cobrankichu.

²⁶ Runamasikipa pachanta prendapi hapispaykiqa manaraq inti seqaykuchkaptinmi kutiykachipunki

²⁷ chaylla maytukuykunanpaq kasqanrayku. Mana chayqa ¿imapitaq puñunman? Pay mañakamuwaptinmi uyarisaq kuyapayakuq kasqayrayku.

²⁸ —Amam Diostaqa insultankichu, amataqmi llaqtamasiki autoridadtapas ñakankichu.

²⁹ —Ama demoraspam qowanki cosechaykikunamanta kaqtaqa chaynataq uvasnikimanta kaqtapas. —Piwi churikitaqa qowankipunim.

³⁰ Qowankitaqmi vacaykikunapa chaynataq ovejaykikunapa punta kaq wawankunatapas, nacesqanmantam qanchis punchaw kanqa mamanwan, pusaq punchawninmanñataqmi ñoqaman qowanki.

³¹ —Qamkunaqa kankichik ñoqallapaqña sapaqchasqa runakunam chaymi ama mikunkichikchu purun animalpa wañuchisqan aychataqa, chay aychataqa allqokunamanmi wischuykunkichik.