Éxodo 21 - Quechua Ayacucho Bible 1987

Sirvientekunapa favorninpi leykunamanta

¹ Israel runakunaman kay leykunata qonanpaqmi Moisesman Tayta Dios nirqa:

² —Hebreo castaykimanta sirvientepaq runata rantispaykiqa soqta watam servichikunki, qanchis kaq watapiqa mana pagaspam libre lloqsikunqa.

³ Sapallan yaykumuspaqa sapallanmi lloqsikunqa, warmiyoq yaykumuspaqa lloqsikunqa warminpiwan kuskam.

⁴ Sirviente kachkaptinraq warmita qospan patronnin casarachiptinqa, chay warmiñataq qosanpata qaritapas otaq warmitapas wachakuruptinqa, chay warmim wawankunapiwan patronninpaq kanqa, qosanñataqmi lloqsikunqa sapallan.

⁵ Sichu chay sirviente ninman: “Kuyanim patronniyta, kuyanitaqmi warmiytawan churiykunatapas. Manam libreqa lloqsiymanchu” nispa hinaptinqa,

⁶ patronninmi Diospa qayllanman pusaspan punkuman otaq punkupa marconman asuykachispan alisnawan sirvientepa rinrinta toqorunqa hinaptinmi kawsanankama chay patronninpa sirvientenña kanqa.

⁷ —Pipas warmi churinta sirvientapaq rantikuptinqa chay warmiqa lloqsinqa manam qari sirviente hinachu.

⁸ Chay sirvientata casarakunanpaq patronnin akllaruchkaspanpas chay patronnin mana gustaspanqa kachaykunqam paypa precionta pagaykapuptinku ichaqa engañarusqanraykum huklaw llaqtayoq runamanqa ama rantikunqachu.

⁹ Churinwan casarachispanmi ichaqa warmi churita hina uywanqa.

¹⁰ Chay patron huk warmita casararuspanqa amam pisichinqachu chay casarasqan sirvientapa mikunanta nitaq pachantapas nitaq casada derechontapas.

¹¹ Sichu sirvientapa chay kimsan derechonta patronnin mana ruraptinqa chay sirvientam lloqsikunqa mana pagaspalla.

Runamasin wañurachiqpaq leykunamanta

¹² —Pipas runamasinta maqaspa wañuchiqqa paypas wañuchisqataqmi kanqa.

¹³ Aswanqa pipas mana wañuchiyta munachkaspa Diospa munasqanman hina wañurachiptinqa chay runam ayqenqa ñoqapa akllanay sitioman.

¹⁴ Ichaqa pipas runamasinta wañuchiyta munaspan traicionmanta wañurachiptinqa altarniymantapas horqonkichikmi wañuchinaykichikpaq.

¹⁵ —Pipas taytanta otaq mamanta maqaqqa wañunqapunim.

¹⁶ —Pipas runa masinta suwaspa rantikuruptinqa otaq makinpiraq kaptinqa chay suwaqa wañuchisqam kanqa.

¹⁷ —Pipas taytanta otaq mamanta insultaqqa wañunqapunim.

¹⁸ —Iskay runakuna atipanakuchkaptinku huknin runa rumiwan chamqarunman otaq takarunman, hukninñataq mana wañuspa camachakurunman chaynapi

¹⁹ hatariruspan hawapi tawnawan puriptinqa chay maqaqnintaqa amam wañuchinkichikchu. Ichaqa paganqam onqospan tiempo pierdesqanmanta, paytaqa hampichinqam allinyanankama.

²⁰ —Pipas sirviententa otaq sirvientanta kaspiwan waqtaspa wañurachiptinqa chay runaqa castigasqapunim kanqa.

²¹ Ichaqa chay wañunayaq sirviente huk punchaw otaq iskay punchawraqpas kawsaptinqa patronninqa manam castigasqachu kanqa qollqenpa chanin kasqanrayku.

²² —Qarikuna peleachkaspanku wiksayoq warmita maqaruspa abortarachiptinkuqa hinaspa masta mana dañasqa kaptinqa dañaqnin runam multasqapuni kanqa, warmipa qosanpa mañasqanman hinam paganqa juezkunapa tanteasqanta.

²³ Aswan sinchi dañasqa kaptinqa warmipa vidanmantam vidanwan paganqa.

²⁴ Runaqa pagachun ñawinwanyá hukninpa ñawinmanta, kirunwan hukninpa kirunmanta, makinwan hukninpa makinmanta, chakinwan hukninpa chakinmanta,

²⁵ ninawan puslluchisqanmanta puslluywan, heridasqanmanta heridawan, qoyoyachisqanmanta qoyoyaywan.

²⁶ —Pipas sirviententa otaq servientanta maqaspan ñawinta toqyarachispaqa paytam libreta kachaykunqa ñawinrayku.

²⁷ Chaynataq sirvientenpa otaq sirvientanpa kirunta wichirachispaqa paytam libreta kachaykunqa kirunrayku.

Qonqaymanta wañurachiqkunapaq leykunamanta

²⁸ —Huk bueyes, qaritapas otaq warmitapas waqraruspan wañurachiptinqa bueyesmi rumiwan choqapasqa wañunqa, aychantapas amam mikunqakuchu, bueyespa dueñonmi ichaqa mana culpayoq kanqa.

²⁹ Ichaqa chay bueyes unayña waqrakuq kaptinqa chaynataq dueñonpas avisasqa kachkaspa mana cuidaptinqa chaynapi pitapas wañurachiptinqa bueyesmi rumiwan choqapasqa wañunqa, wañuchisqataqmi kanqa dueñonpas.

³⁰ Ichaqa bueyesniyoqta mana wañuchispanku multaptinkuqa wañuqpa familiankunamanmi paganqa juezpa tanteasqanta.

³¹ Bueyesniyoqwanqa chayna sentenciataqmi rurasqa kanqa pipapas qari churinta otaq warmi churintapas waqraruptinqa.

³² Pipapas huk sirviententa otaq huk sirvientanta bueyes waqraruptinqa dueñonmi paganqa paykunapa patronninman cuarto kilo masnin qollqeta, bueyesñataqmi rumiwan wañuchisqa kanqa.

³³ —Pipas pozopa tapanta kichanman otaq pozota toqospan mana tapanmanchu hinaptinñataq chayman bueyes otaq asnopas wichiykunman hinaptinqa

³⁴ pozopa dueñonmi paganqa qollqeta animalpa dueñonman, chay wañusqa animalñataqmi pozoyoqpaqña kanqa.

³⁵ —Pipapas bueyesnin runamasinpa bueyesninta waqraruspa wañurachiptinqa chay kawsaq bueyestam *f**rantikurunqaku hinaspam chay qollqeta rakinakunqaku lamitadninka chaynataqmi wañusqa bueyestapas partenakunqaku.

³⁶ Ichaqa chay bueyes lliwpa reqsisqan unayña waqrakuq kaptinqa chaynataq dueñonpas mana waqaychaptinqa chay wañuq bueyesmantam sayachipunqa huk bueyesta, chay wañusqa bueyesñataqmi paypaq kanqa.