Éxodo 19 - Quechua Ayacucho Bible 1987

Israelpa mirayninkuna Sinai Orqoman chayasqankumanta

¹ Egipto nacionmanta Israelpa mirayninkuna kimsa killa lloqsimusqanku hawañam chay punchawpuni chayarqaku Sinai chunniqman.

² Paykunamá Refidim lawmanta pasaspanku chayarurqaku Sinai chunniqman, chaypim karpankuta sayachirqaku chunniqpi. Sinai Orqopa ñawpaqninpimá Israel runakunaqa samarurqa.

³ Chaymi Moises seqarqa Dioswan tupamunanpaq hinaptinmi Tayta Dios qayamurqa orqomanta: —Kaynatam ninki Jacobpa castankunata otaq Israelpa mirayninkunata:

⁴ “Qamkunaqa qawarqankichikmi Egipto runakunata imam rurasqayta, qawarqankichiktaqmi aguilapa rapranpi hina ñoqapa kasqayman qamkunata hoqarimusqaytapas.

⁵ Chaynaqa kunanqa nisqayta kasuspaykichikqa chaynataq contratoytapas cumplispaykichikqa qamkunamá kankichik wakin runakunamanta akllakusqay runaykuna. Kay pachaqa ñoqapam.

⁶ Llapallaykichikmi ñoqapaq kankichik reyta serviq sacerdotekuna, ñoqallata serviwanaykichikpaq sapaqchasqa nacion.” Kay nisqaykunatam Israelpa mirayninkunaman willanki.

⁷ Moises pasaspanmi runakunapa ancianonkunata qayarqa hinaspam willarqa Tayta Diospa llapallan kamachisqan palabrankunata.

⁸ Hinaptinmi lliw runakuna chulla runa hinalla nirqaku: —Tayta Diospa tukuy kamachisqantaqa rurasaqkum —nispa. Moisesñataqmi kutispan runakunapa nisqanta Tayta Diosman willarqa.

⁹ Chaymi Tayta Dios nirqa Moisesta: —Ñoqam hamusaq yanay-yanay puyupi qanwan rimanaypaq chaynapi runakuna uyarispanku tukuy tiempo qampi confiakunankupaq —nispa. Moisesñataqmi runakunapa nisqanta Tayta Diosman willarqa.

¹⁰ Chaymi Tayta Dios nirqa: —Runakunaman rispayki kunan hinaspa paqarin punchaw preparamuy adorawanankupaq, pachankuta taqsakuspankuyá

¹¹ minchapaq allichakuchunku, mincham ñoqa Tayta Dios uraykamusaq Sinai Orqopa hawanman llapallan runakuna qawachkaptin.

¹² Orqopa muyuriqninpim señalkunata churanki chaykamalla rispanku ama pasanankupaq. Kaynatamá paykunata ninki: “Amam orqomanqa seqankichikchu nitaqmi patallantapas sarunkichikchu, pipas chayna ruraqqa cheqaptapunim wañurunqa” nispa.

¹³ Mana kasukuqtaqa ama llachpaspallam choqapankichik otaq flechankichik. Animal kaptinpas otaq runa kaptinpas wañuchinkichikmá. Corneta unay waqaruptinñam seqanqaku orqomanqa —nispa.

¹⁴ Moisesmi orqomanta uraykamurqa runakunapa kasqanman, uraykamuspamá Diosta adoranankupaq runakunata prepararqa, taqsakurqakutaqmi pachankutapas.

¹⁵ Moisesmi nirqa runakunata: —Minchapaq preparakuychik, amam puñunkichikchu warmikichikwanpas —nispa.

¹⁶ Chay punchaw chayaramuptinmi achikyaqta rayokuna, llipyakuna, rakta yana puyukuna orqopa hawanpi karqa, cornetakuna sinchillataña waqaptinmi campamentopi kaq llapallan runakunapas katkatatarqaku.

¹⁷ Chaymi Moises campamentomanta runakunata lloqsichimurqa Dioswan tupanankupaq hinaptinmi orqopa ñawpaqninpi sayarqaku.

¹⁸ Orqopa hawanman Tayta Dios ninapi uraykamusqanraykum enteron Sinai Orqo qosnirirqa. Chay qosnim hoqarikurqa huk hornopa qosniynin hinaraq, enteron orqom katkatatarqa sinchillataña.

¹⁹ Cornetañataqmi aswan sinchitaraq waqarqa chaymi Moises rimapayaptin Dios contestarqa rayo hina qaparillawanña.

²⁰ Tayta Diosmi Sinai Orqopa puntanpa hawanman uraykamurqa hinaspam chayman rinanpaq Moisesta qayarqa hinaptinmi Moisesñataq seqarqa.

²¹ Chaymi Moisesta Tayta Dios nirqa: —Uraykuspayki runakunata anyamuy, señal churasqaykita ama chimpamunankupaq hinaspa qawawanankupaq, yanqañataqmi achkallaña wañurunmanku.

²² Ñoqaman asuykuq sacerdotekunapas adorawanankupaqyá preparakuchunku, yanqañataq paykunatapas castigaruyman —nispa.

²³ Chaymi Moisesñataq Tayta Diosta nirqa: —Sinai Orqomanqa runakunaqa manam seqanmankuchu, qanmi kamachiwarqankiku: “Orqopa muyuriqninpi señalta churay hinaspa sapaqchay” nispa.

²⁴ Chaymi Moisesta Tayta Dios nirqa: —Uraykuy hinaspa seqamuy Aaronwan ichaqa sacerdotekunawan runakunaqa amam chimpamunqakuchu orqopa muyuriqninpi señal churamusqaykitaqa, chay señaltaqa churarqanki ñoqapa kasqayman ama seqamunakupaqmi, chimpamuptinkuqa yanqañataqmi paykunatapas castigaruyman —nispa.

²⁵ Runakunapa kasqanman Moises uraykamuspanmi chaykunata willarqa.