Éxodo 18 - Quechua Ayacucho Bible 1987

Moisesman suegron Jetro watukusqanmanta

¹ Moisespa suegron otaq Madian lawpi sacerdote Jetrom uyarirurqa Moisespaq hinaspa Israel runankunapaq Dios tukuy ima rurasqanta, uyarirqataqmi imaynam Egipto nacionmanta Israel runakunata Tayta Dios horqomusqantapas.

² Ñawpaqtaraqmi Moises kacharqa warmin Seforata taytan Jetropa kasqanman chaymi payñataq chaskiykurqa,

³ kacharqaqa iskaynin wawankunatawan kuskatam. Moisespa huknin churinpa sutinmi karqa Gerson, paymantam Moises nirqa: “Forasterom ñoqaqa kani runapa llaqtanpi” nispan.

⁴ Huknin churinpa sutinñataqmi karqa Eliezer, paymantam Moises nirqa: “Abueloypa Diosninmi yanapawarqa hinaspam Faraonpa wañuchiwananmantapas librawarqa” nispa.

⁵ Chunniqpi hinaspa Diospa orqonpa hichpan campamentopi Moises kachkaptinmi suegron Jetro hamurqa Moisespa churinkunapiwan hinaspa warminpiwan.

⁶ Hinaspam Moisesta nirqa: —Ñoqa suegroyki Jetrom hamuni qanman warmikipiwan hinaspa iskaynin wawankunapiwan —nispa.

⁷ Moisesmi suegronman taripaykuspan qonqoranpa pampaman kumuykurqa hinaspam muchaykurqa. Tapunakurqakum imaynam kasqankumanta hinaspam yaykurqaku karpaman.

⁸ Chaymi Moises willakurqa suegronman Tayta Diosqa Faraonta chaynataq Egipto runakunata Israel castarayku tukuy ima rurasqanmanta. Willakurqataqmi tukuy sasachakuykuna hamusqankupi pasamusqantapas chaynataq imaynam paykunata Tayta Dios libramusqantapas.

⁹ Jetromá kusikurqa Egipto runakunamanta libraspa Israel runakunapaq Tayta Dios tukuy allin rurasqanmanta.

¹⁰ Chaymi Jetro nirqa: —Alabasqa kachun Tayta Dios, paymi Egipto runakunamantawan Faraonmanta libramusurqankichik, Egipto runakunapa sirvienten kasqaykichikmantam libramusurqankichik.

¹¹ Egipto runakunaqa karqa Israel runakunapa contranpi alto tukuqllañam chaymi vencesqa karqaku. Kunanmi reqsini Tayta Diosqa llapa dioskunamantapas aswan hatun kasqanta.

¹² Chaymi Moisespa suegron Jetro apamurqa huk animalta wañuchispan Diospaq lliwta kañananpaq. Chaywan kuskata kañananpaqmi apamurqataq huk rikchaq ofrendakunatapas. Chaymanmi hamurqa Aaronpas chaynataq Israel castakunapa llapallan ancianonkunapas Diospa qayllanpi Moisespa suegronwan mikunankupaq.

Queja arreglaqkunata Moises churasqanmanta

¹³ Paqarinnintin punchawmi runakunapa quejan arreglananpaq Moises tiyaykurqa, runakunañataqmi Moisespa ñawpaqninpi sayarqaku tempranomanta tardekama.

¹⁴ Chaymi runakunapaq Moisespa tukuy rurasqanta suegron qawaykuspan nirqa: —¿Imatataq kay runakunawanqa rurachkanki? ¿Imanasqataq sapallayki tiyanki hinaptin llapallan runakunañataq ñawpaqnikipi sayanku tempranomanta tardekama? —nispa.

¹⁵ Hinaptinmi Moisesñataq nirqa: —Diosta tapupunaypaqmi runakuna ñoqaman hamuwanku.

¹⁶ Imapas asuntonku kaptinmi hamunku ñoqaman hinaptinmi paykunapa asuntonta arreglani, yachachinitaqmi Diospa decretonkunatapas chaynataq yachachikuyninkunatapas.

¹⁷ Chaymi Moisesta suegron nirqa: —Manam allinchu chay rurasqaykiqa.

¹⁸ Qamllaqa anchatam pisiparunki chaynataq qanman hamuq runakunapas. Chay rurasqaykiqa sasallañam qamllapaqqa, manam rurayta atiwaqchu sapallaykiqa.

¹⁹ Kunanyá uyariway kay consejasqayta, Diostaqyá qanwan kachun. Qanmi Diosman presentakunayki kay runakunapa rantinpi, apanaykitaqmi paykunapa asuntonkunatapas.

²⁰ Paykunamanyá rimapayay Diospa decretonkunatawan yachachikuyninkunata hinaspayá yachachiy imaynam kawsanankutawan imam ruranankuta.

²¹ Akllay runakunamanta chaypaq hina qarikunata, Dios respetaqkunata, cheqap rimaq qarikunata, apuyaruylla mana munaqkunata. Paykunatam churanki waranqa runakuna kamachiqpaq, pachak runakuna kamachiqpaq, pichqa chunka runakuna kamachiqpaq chaynataq chunka runakuna kamachiqpaq.

²² Paykunam tukuy tiempopi runakunapa quejanta arreglanqaku, llapa sasan kaqkunatañataqmi apamusunki, paykunam facil arreglana quejakunata arreglanqaku. Chaynapim kay sasa llamkasqaykimanta samarinki, chay yanapaqnikikunamá qamtaqa yanapasunki.

²³ Amalaya Diospas chaynata kamachisunkiman, kayta ruraspaykiqa aguantankim, kay llapallan runakunapas hawkallam wasinkuman kutikunqaku.

²⁴ Moisesmá suegronpa nisqanta kasukuspan chaynata rurarqa.

²⁵ Akllarqamá lliw Israel castamanta chaypaq hina qarikunata hinaspam churarqa runakunapi jefekunata waranqa kamachiqpaq, pachak kamachiqpaq, pichqa chunka kamachiqpaq hinaspa chunka kamachiqpaq.

²⁶ Paykunam tukuy tiempopi runakunapa quejankunata arreglaqku. Sasan asuntokunatañataqmi Moisesman apamuqku, facil arreglana quejakunatañataqmi paykuna arreglaqku.

²⁷ Chaymantam Moisesqa aviarqa suegronta chaymi payñataq llaqtanman ripukurqa.