Éxodo 17 - Quechua Ayacucho Bible 1987

Qaqamanta lloqsiq yakumanta

¹ Lliw huñunasqa Israelpa mirayninkunam Tayta Diospa kamachisqanman hina Sin sutiyoq samasqanku chunniqmanta lloqsispanku pasarqaku hinaspam carpankuta sayachispanku samarurqaku Refidim lawpi ichaqa chaypim yaku mana karqachu runakuna tomananpaq.

² Chaymi runakuna Moiseswan atipanakuspanku nirqaku: —¡Qowayku yakuta tomanaykupaq! —nispa. Hinaptinmi Moises paykunata nirqa: —¿Imanasqataq mañapayawankichik? ¿Imanasqataq Tayta Diosta tentaspa pruebankichik? —nispa.

³ Runakunamá chaypi yakumanta kaspanku Moisespa contranpi rimarqaku: —¿Imapaqtaq horqomuwarqankiku Egipto nacionmanta ñoqaykuta, churiykuta hinaspa animalniykuta yakumanta wañuchiwanaykikupaq? —nispa.

⁴ Chaymi Moises qayakurqa Tayta Diosta: —¿Imatataq rurasaq kay runakunawan? Kunanmanta asllatawanqa rumiwanchiki choqaparuwanqaku —nispa.

⁵ Chaymi Moisesta Tayta Dios nirqa: —Runakunapa ñawpaqninman riy hinaspa pusay Israel casta ancianokunata. Apaytaqyá Nilo Mayu waqtasqayki tawnaykitapas. Pasaypuniyá.

⁶ Ñoqam sayachkasaq chimpaykipi Horeb sutiyoq hatun rumipa hawanpi. Rumita waqtaptikim chaymanta yaku lloqsimunqa chaymi runakuna tomanqaku —nispa. Moisesmá rurarqa chaynata Israel casta ancianokuna qawachkaptin.

⁷ Chay sitiotam suticharqaku “Meriba” nispa chaypiqa Israelpa mirayninkuna atipanakusqankurayku. Suticharqakutaqmi “Masah” nispapas chaypiqa Tayta Diosta tentaspa pruebasqankurayku. Paykunam nirqaku: “¿Ñoqanchikwanchu kachkan Tayta Dios icha manachu?” nispa.

Amalec casta runakunawan Israelpa mirayninkuna peleasqankumanta

⁸ Amalec runakunam rirqaku Refidim lawman chaypi Israelpa mirayninkunawan peleanankupaq.

⁹ Chaymi Moises nirqa Josueyta: —Akllay ñoqanchik parte qarikunata hinaspa lloqsiy Amalec runakunawan peleaq. Paqarinmi ñoqa kasaq orqopa puntanpi Diospa tawnanta hapiykuspay —nispa.

¹⁰ Hinaptinmi Josuey rurarqa Moisespa kamachisqanman hina, Amalec runakunawan peleaqmá lloqsirqa. Moisesñataqmi Aaronwan hinaspa Hur sutiyoq runawan seqarqaku orqopa puntanman.

¹¹ Chaymi Moises makinta altoman hoqariptin Israel runakuna vencerqa, makinta uraykachiptinñataqmi Amalec runakuna vencerqa.

¹² Moisespa brazonkuna utiruptinñataqmi paykuna churarqaku huk rumita hinaptinmi Moises tiyaykurqa chaypa hawanpi. Aaronpiwan Hurñataqmi takyachirqaku brazonkunata, Aaronmi kaylawninmanta takyachirqa Hurñataq waklawninmanta chaynapim brazonkuna takyarqa intipa seqaykunankama.

¹³ Hinaptinmi Amalec runakunata Josuey vencerurqa guerrapi peleaspa.

¹⁴ Chaymi Tayta Dios nirqa Moisesta: —Qellqay kayta huk libropi ama qonqarunaykichikpaq hinaspa niy Josueyta: “Chinkachisaqpunim kay pachamanta Amalec runakunata” nispa.

¹⁵ Huk altarta Moises perqaspanmi suticharqa “Tayta Diosmi banderay” nispa.

¹⁶ Chaymi nirqa: Tayta Diospa banderanta hapiy juramentanaykipaq. Tayta Diosmi peleachkan Amalec runakunawan wiña-wiñaypaq.