Éxodo 16 - Quechua Ayacucho Bible 1987

Cielomanta hamuq mikuymanta

¹ Lliw huñunasqa Israelpa mirayninkunam Elim lawmanta pasarqaku Sin sutiyoq chunniqman chayanankukama, chay chunniqqa kachkan Elim lawmanta Sinai lawman rinapa chawpinpim, chaymanqa chayarqaku huk killaña Egipto nacionmanta lloqsisqanku hawam otaq iskay kaq killapa chunka pichqayoq punchawninpim.

² Chay chunniqpim lliw huñunasqa Israelpa mirayninkuna rimarqaku Moisespa chaynataq Aaronpa contranpi.

³ Chay runakunam nirqaku: —Allinchá kanman karqa Egipto nacionpiraq Tayta Dios wañurachiwaptinkuqa, chay nacionpiqa aychayoq mankakunapa ladonpim tiyarqaniku, saksanaykukamam mikukuq kaniku, kunanñataqmi kay chunniqman pusaramuwankiku llapachallaykuta yarqaymanta wañuchiwanaykikupaq —nispa.

⁴ Chaymi Tayta Dios nirqa Moisesta: —Ñoqam parata hina cielomanta mikuyta chayachipamusqaykichik. Runakunam lloqsispanku sapa punchaw huñunqaku chay punchawpaq kamaqllata chaynapim yachasaq yachachikuyniyman hina kawsasqankuta otaq chayna mana kawsasqankutapas.

⁵ Soqta kaq punchawpi apamusqankuta preparaptinkuqa iskay punchawpaqmi kanqa, manam sapa punchawpaq huñusqanku hinallañachu —nispa.

⁶ Chaymi Israelpa llapallan mirayninkunata Moiseswan Aaron nirqa: —Tardemanmi yachankichik Egipto llaqtamanta Tayta Dios horqomususqaykichikta.

⁷ Paqarin madrugawñataqmi qawankichik Tayta Diospa kanchayninta, payqa uyarirunmi contranpi rimasqaykichikta. Ñoqaykuqa ¿pitaq kaniku contraykupi rimanaykichikpaqqa? —nispa.

⁸ Moisesmi nirqataq: —Tardemanmi Tayta Dios aychata qosunkichik mikunaykichikpaq, paqarin madrugawñataqmi qosunkichik mikuyta saksanaykichikkama. Tayta Diosqa uyarirunmi paypa contranpi rimasqaykichikta. Ñoqaykuqa ¿pitaq kaniku? Qamkunapa rimasqaykichikqa manam ñoqaykupa contraykupichu aswanqa Tayta Diospa contranpim —nispa.

⁹ Hinaptinmi Aaronta Moises nirqa: —Israelpa mirayninkunata lliwta huñunaspa niy: “Asuykamuychik Tayta Diospa qayllanman, rimasqaykichiktam pay uyarirun” nispa.

¹⁰ Lliw huñunasqa Israelpa mirayninkunata Aaron rimapayachkaptinmi qawarirurqaku chunniq lawta hinaptinmi Tayta Diospa kanchaynin kachkasqa puyupi.

¹¹ Chaymi Tayta Dios rimapayarqa Moisesta:

¹² —Ñoqam uyarirqani Israelpa mirayninkunapa rimasqanta, paykunatayá niy: “Tutaykuqtam mikunkichik aychata, achikyaqtañataqmi saksankichik mikuywan chaymi yachankichik ñoqaqa yupaychasqaykichik Tayta Dios kasqayta” nispa.

¹³ Tardeykuqtamá yutukuna hamuruspa taparurqa campamentota, paqarinnin madrugawñataqmi campamentopa muyuriqninpi karqa sulla kaqlla.

¹⁴ Sulla waspiruptinñataqmi chunniqpiqa allpapa hawanpi lasta hina qasa kachkasqa.

¹⁵ Israelpa mirayninkuna rikuruspankum mana ima kasqanta yachaspanku ninakurqaku: “¿Imataq kayqa?” nispa. Chaymi Moises paykunata nirqa: —Kayqa Tayta Diospa qosusqaykichik mikuymi.

¹⁶ Kaymi Tayta Diospa kamachikusqan: “Huñuychik sapakama mikunaykichikpaq kamaqta. Karpaykichikpi haykam runapa kasqanman hinam iskay kilotakama hoqarinkichik sapa punchaw” nispa.

¹⁷ Chaynatamá Israelpa mirayninkuna rurarqaku, wakinmi huñurqa achkata wakinñataqmi asllata.

¹⁸ Chaymi tupuptinku mana puchurqachu achka huñuqpapas nitaqmi pisirqachu aslla huñuqpapas. Sapakamam huñurqaku mikunankupaq kamaqllata.

¹⁹ Chaymi Moises nirqa: —Kay mikuytaqa amam paqarinpaqqa mayqannikichikpas puchuchinkichikchu —nispa.

²⁰ Aswanqa wakiqninkum Moisespa kamachisqanta mana kasukuspanku puchururqaku paqarinnintinkama hinaptinmi ururuspan asnarirurqa chaymi Moises piñakururqa paykunapa contranpi.

²¹ Sapa madrugawmi huñurqaku sapakama mikunankupaq kamaqta, puchuqninñataqmi intipa rupayninwan chullururqa.

²² Soqta kaq punchawpiqa huñurqaku huk chaynatawanmi. Tawa kilotam huñurqaku sapakamapaq hinaptinmi chay huñunakuyninkumanta llapallan kamachikuqkuna hamurqaku Moisesman willanankupaq.

²³ Hinaptinmi paykunata Moises nirqa: —Kaymi Tayta Diospa nisqan: “Paqarinmi ñoqa Tayta Diospaq sapaqchasqa samana punchaw. Tantanaykichiktapas kunan tantaychik, yanunaykichiktapas kunan yanuychik, puchuqtañataq waqaychaychik paqarinpaq” nispa.

²⁴ Paykunam Moisespa kamachisqanman hina waqaycharqaku paqarinnintinkama chaymi mana asnarirqachu nitaq urururqachu.

²⁵ Chaymi Moises nirqa: —Mikuychik kunan Tayta Diospaq samana punchaw kasqanrayku, campopiqa manam kunanqa imatapas tarinkichikchu.

²⁶ Soqtantin punchawmi huñunkichik. Ichaqa qanchis kaq punchawqa samana punchawmi, chaypiqa manam imapas kanqachu.

²⁷ Wakin runakunam lloqsirqaku qanchis kaq punchawpi huñuq hinaspam mana tarirqakuchu imatapas.

²⁸ Chaymi Tayta Dios nirqa Moisesta: —¿Haykapikamataq mana kasukunkichikchu kamachikuyniykunatapas chaynataq yachachikuyniykunatapas?

²⁹ Amam qonqankichikchu, ñoqam qoykichik samana punchawta chayraykum soqta kaq punchawpiqa mikuytapas qoykichik iskay punchawpaqña. Chaynaqa qanchis kaq punchawpiqa, sapakamam maymi kasqaykichikpi kankichik, amayá pipas lloqsichunchu maymi kasqanmantaqa —nispa.

³⁰ Chaymi runakuna samarqaku qanchis kaq punchawpi.

³¹ Chay hoqarisqankutam Israel castakuna suticharqaku “*f**maná” nispa, chayqa karqa culantropa muhun hina yuraqmi, gustonñataqmi karqa mielniyoq galleta hina.

³² Chaymantam Moises nirqa: —Kaymi Tayta Diospa kamachikusqan: Iskay kilo yaykuq tupumanyá huntachiychik chay mikuyta chaynapi miraynikichikpaq waqaychasqa kananpaq. Chaymi paykuna qawanqaku Egipto nacionmanta horqomuspa qosqay mikuyta —nispa.

³³ Hinaptinmi Moises nirqa Aaronta: —Chay mikuyta mankapi churay iskay kilota hinaspa waqaychay Tayta Diospa ñawpaqninpi chaynapi miraynikikunapaq waqaychasqa kananpaq —nispa.

³⁴ Tayta Diospa Moisesman kamachisqanpi hinamá Aaron churarqa, Chunkantin Kamachikuypa ñawpaqninpim waqaychasqa karqa.

³⁵ Chaynatam Israelpa mirayninkuna mikurqaku chay *f**maná sutiyoq mikuyta tawa chunka watapuni, mikurqakuqa runakunapa yachanan allpaman yaykunankukamam otaq Canaan allpaman yaykunankukamam.

³⁶ Iskay kilo tuputam Hebreo rimaypi sutichanku gomerwan. Chay gomerqa efa sutiyoq tupupa chunkaman rakisqapa hukninmi.