Éxodo 15 - Quechua Ayacucho Bible 1987

Moisespa takisqanmanta

¹ Chaymi Tayta Diosman Moiseswan Israelpa mirayninkuna takirqaku kay takita: Tayta Diosmanmi takisaq, hatun atiynintam qawachikurqa, caballotapas sillakuqnintapas lamar qochamanmi wischuykurqa.

² Tayta Diosmi kallpanchawaqniy. Tayta Diosmi salvawaqniy. Chaymi ñoqallayqa takipuni. Payqa ñoqapa Diosniymi. Sumaq kasqantam willakuni. Payqa abueloykunapa Diosninmi.

³ Tayta Diosqa guerrapi peleaqmi. Payqa Tayta Dios sutiyoqmi.

⁴ Faraonpa carretankunatam, Faraonpa tropankunatam lamar qochaman wischuykurqa. Akllasqan capitanninkunam Puka Lamar Qochapi chinkaykurqa.

⁵ Qocha ukumanmi rumi hina wichiykurqa. Lamar qocham paykunata pamparurqa.

⁶ Yupaychasqayku Tayta Dios, *f**alleq makillaykim kallpasapallaña. Yupaychasqay Tayta Dios, alleq makillaykiqa enemigoytam chamchaparunña.

⁷ Hatu-hatun atiynikiwanmi contraykipi hatariqkunata chinkarachinki. Tamota hina ruparunanpaqmi piñakuynikita kachaykamurqanki.

⁸ Piñakuywan pukuruptikim yakukunaqa montonakururqa. Huk muralla hinam timpuy-timpuy yakupas sayarurqa. Lamar qochapa uku chawpinmi tikarurqa.

⁹ Enemigom nirqa: “Haypanaykamam qatisaq, qechusqaytam rakinakusaq, chayraqmi saksasqa hina kasaq, espadayta horqospam chinkarachisaq.”

¹⁰ Wayrata pukuykachiptikim lamar qocha paykunata taparurqa. Manchakuypaq yakukunapim titi hina tiyarurqa.

¹¹ Yupaychasqay Dios Taytalláy, qam hina huk diosqa manam kanchu. Qam hina admirakuypaq chuya Diosqa manam kanchu. Qam hina alabanapaq respetana Diosqa manam kanchu. Qam hina milagrokuna ruraq Diosqa manam kanchu.

¹² Atiyniyoq *f**alleq makikitam haywarirqanki. Allpawanmi paykunata millpurachirqanki.

¹³ Prometewasqaykikuman hinam kay librasqayki runakunata pusawachkankiku. Hatun atiynikiwanmi *f**yachanayki wasiman pusawachkankiku.

¹⁴ Runakuna uyariruspam katkatatanqaku. Filistea runakunam nanaywan hapirachikunqaku.

¹⁵ Edom nacionpi kamachikuqkunapas hukmanyarunqakum. Moab nacionpi jefekunapas katkatatanqakum. Canaan lawpi llapallan *f**yachaqkunapas hukmanyarunqakum.

¹⁶ Yupaychasqayku Dios Taytalláy, paykunaqa mancharikuywanyá katkatatachunku. Hatun atiynikiraykuyá rumi hina upallachunku. Runaykikuna pasanaykukamayá paykunaqa upallachunku. Kay rantisqaykikuna pasanaykukamayá upallachunku.

¹⁷ Yupaychasqayku Dios Taytalláy, qanmi yaykuykachiwankiku. Qanmi plantaykuwankiku herenciayki orqopi, *f**yachanaykipaq preparasqayki sitiopi, santuario hatarichisqaykipi.

¹⁸ Tayta Diosmi gobiernanqa wiña-wiñaypaq.

Mariapa takisqanmanta

¹⁹ Faraonpa caballonkunam, carretankunam hinaspa caballeriankunam yaykurqaku lamar qochaman chaymi Tayta Dios paykunapa hawanman lamar qochata kutiykachirqa. Israelpa mirayninkunam ichaqa chakisqa allpallanta lamar qochapa chawpinta pasarqaku.

²⁰ Chaymi Aaronpa panin Maria Diosmanta willakuq kasqanrayku hapiykurqa tinyanta, llapallan warmikunapas paypa qepantam lloqsirqaku tinyankuta tocastin hinaspa tusustin.

²¹ Mariañataqmi takispan nirqa: Tayta Diosman takiychik, hatun atiynintam qawachikurqa. Caballotapas, sillakuqnintapas lamar qochamanmi wischuykurqa.

Mara nisqanku sitiopi qatqe yakumanta

²² Israelpa castankunatam Moises pasachirqa Puka Lamar Qochamanta Shur sutiyoq chunniqman, lloqsispankum mana yakuta tarispa kimsa punchaw rirqaku chunniqninta.

²³ Chaymi “Mara” sutiyoq sitioman chayaruspanku chaypi yaku qatqe kaptin mana tomayta atirqakuchu. Chayraykum Marawan suticharurqaku.

²⁴ Runakunam Moisespa contranpi rimarqaku: —¿Imatataq tomasaqku? —nispa.

²⁵ Chaymi Tayta Diosta Moises mañakuptin pay qawaykachirqa huk sachata, chay sachata yakuman wischuykuptinmi yaku miskiyarurqa. Chaypim qorqa decretotawan imaynam kawsanankupaq kamachikuyta hinaspam chaypitaq paykunataqa pruebarqa.

²⁶ Tayta Diosmi nirqa: —Ñoqaqa yupaychasqayki Tayta Diosmi kani, sichu sumaqta uyariykuwaptikiqa, ñawpaqniypi allin kaqta ruraptikiqa hinaspa kamachikuyniykunata uyariptikiqa chaynataq decretoykunatapas kasukuptikiqa Egipto runakunaman apachisqay onqoykunataqa manam mayqantapas apachimusqaykichu. Ñoqaqa hampiqniki Tayta Diosmi kani —nispa.

²⁷ Paykunam chayarurqaku Elim lawman chunka iskayniyoq pukyukunapa chaynataq qanchis chunka palmera sachakunapa kasqanman hinaspam karpankuta sayachirqaku yakukunapa hichpanpi.