Éxodo 14 - Quechua Ayacucho Bible 1987

Puka Lamar Qochata chimpasqankumanta

¹ Tayta Diosmi Moisesta nirqa:

² —Israelpa mirayninkunata nimuy kutirispanku, Pi-hahirot lawpa chimpanpi karpankuta sayachispa samanankupaq. Samanqakuqa lamar qochamanta Migdol lawman riq Baal-zefon lawpa chimpanpim. Lamar qochapa patanpi karpaykichikta sayachispaykichikmi samankichik.

³ Faraonmi ninqa: “Israelpa mirayninkunaqa purunpim pantaruspanku chunniqwan wichqarachikunku” nispa.

⁴ Faraonpa soqontam rumiyarachisaq qatimusunaykichikpaq chaymi Faraonpa contranpi hinaspa lliw tropanpa contranpi rurasqayrayku alabasqa kasaq. Chaymi Egipto runakuna yachanqa ñoqaqa Tayta Dios kasqayta —nispa. Israel runakunaqa chaynatamá rurarqaku.

⁵ Chaymi Egipto nacionpi reyman willarqaku Israel castakunapa lluptisqankuta hinaptinmi Faraonqa serviqninkunapiwan paykunamanta hukmantaña piensarurqaku hinaspam nirqaku: —Israel castata manaña serviwananchikpaq kachaykuspaqa yanqatam rurarunchik —nispa.

⁶ Carretanta caballokunaman wataspanmi pusarqataq guerrapaq runankunatapas.

⁷ Pusarqam soqta pachak akllasqa carretakunata, pusarqataqmi Egipto nacionpi llapallan carretakunatapas, sapa carretapim huk capitan rirqa.

⁸ Tayta Diosmi Egipto nacionpi Rey Faraonpa sonqonta rumiyarachirqa hinaptinmi Israelpa mirayninkunata qatirqa. Israelpa mirayninkunaqa llumpay qari-qarillañam lloqsirqaku.

⁹ Egipto runakunamá Faraonpa llapallan caballonkunawan, carretankunawan, caballeriankunawan hinaspa tropankunawan Israel runakunata qatispa hayparurqaku lamar qochapa hichpanpi samachkaqta, hayparurqankuqa Baal-zefonpa chimpan Pi-hahirotpa ladonpim.

¹⁰ Faraon hichpaykamuptinñam Israelpa mirayninkuna musyakururqaku Egipto runakuna paykunapa qepan hamusqanta chayraykum hatu-hatunta mancharikuspanku Tayta Diosman qaparispa mañakurqaku.

¹¹ Moisestam nirqaku: —Eqipto nacionpi sepultura kachkaptinmi yanqa horqomuwarqankiku kay chunniqpi wañunaykupaq. ¿Imanasqataq kayta rurawankiku Egipto nacionmanta horqoramuwaspaykiku?

¹² ¿Manachu Egipto nacionpiraq nirqaykiku: “Dejaykuwayku Egipto runakunata servinaykupaq” nispa? Allinchá kanman Egipto runakuna serviyniyku, chunniqpi wañunaykumantaqa —nispa.

¹³ Chaymi runakunata Moises nirqa: —Ama manchakuychikchu, sayaychik hinaspa qawaychik Tayta Diospa kunan salvawasqanchikta, kaytaqa kunanpunim qamkunawan ruranqa. Egipto runakuna kunan qawasqaykichiktaqa manañam qawankichikñachu wiña-wiñaypaq.

¹⁴ Tayta Diosmi peleapusunkichik qamkunapaqqa, qamkunaqa hawkallayá kaychik.

¹⁵ Chaymi Tayta Dios nirqa Moisesta: —¿Imanasqataq ñoqataraq mañakuwachkanki? Pasananpaqyá kamachiy Israelpa mirayninkunata.

¹⁶ Qamñataq tawnaykita hoqarispayki haywariy lamar qochapa hawanman, lamar qocha rakikuruptinmi chakisqa chawpinta Israelpa mirayninkuna pasanqa.

^17-18 Ñoqam rumiyarachisaq Egipto runakunapa sonqonta qamkunapa qepaykichikta yaykumunankupaq hinaptinmi Faraonpi, lliw tropankunapi, carretankunapi hinaspa caballeriankunapi imam rurasqayrayku alabasqa kasaq. Chayraqmi Egipto runakunaqa yachanqaku ñoqaqa Tayta Dios kasqayta.

¹⁹ Chaymi Israel tropakunapa ñawpaqnin riq Diospa angelnin pasarurqa paykunapa qepanmanña, sayanpa puyupas paykunapa ñawpaqninmantam pasarurqa qepankumanña.

²⁰ Chaymi Egipto tropakunapa campamentonpa hinaspa Israel tropakunapa campamentonpa chawpinpi churakururqa chay puyu hinaptinmi tutayay karqa Egipto runakunapaq, Israel runakunapaqñataqmi achkirqa, chaynapimá chay tutayaypi kaq Egipto runakunaqa mana paykunaman asuykurqachu.

²¹ Hinaptinmi Moises makinta haywarirqa lamar qochapa hawanman chaymi Tayta Dios tukuy chay tuta intipa qespimunan lawmanta sinchi wayrawan lamar qochata rakinarachirqa hinaptinmi lamar qochapa chawpin chaki rikurirurqa.

²² Chaymi Israelpa mirayninkuna pasaykurqaku lamar qochapa chakichisqa chawpinta, yakukunam karurqa perqa hina *f**alleq lawninkupi hinaspa *f**ichoq lawninkupi.

²³ Hinaptinmi Egipto runakuna qatiykuspa yaykururqaku paykunapa qepanta lamar qochaman. Yaykurqamá Faraonpa llapallan caballonkuna, carretankuna chaynataq caballeriankunapas.

²⁴ Chaymi achikyamuchkaqtaña Egipto runakunapa tropanta Tayta Dios qawarirqa sayanpa nina puyumanta hinaspam chaqwarurqa Egipto runakunapa tropanta.

²⁵ Chaymi carretankunapa ruedanta cienegarachirqa sasallataña rinankupaq hinaptinmi Egipto runakuna nirqaku: —Ayqesunchik Israel runakunamanta, ñoqanchikpa contranchikpiqa Tayta Diosmi peleachkan —nispa.

²⁶ Chaymi Tayta Dios nirqa Moisesta: —Haywariy makikita lamar qochapa hawanman chaynapi yakukuna Egipto runakunaman, carretankunaman hinaspa caballeriankunaman kutiykunanpaq —nispa.

²⁷ Moisesmi makinta haywariykurqa lamar qochapa hawanman hinaptinmi achikyaykuchkaqtaña lamar qocha imaynam kasqanman kutiykurqa chaymi Egipto runakuna ayqechkaspanku yakuwan tupanakururqaku. Tayta Diosmi lamar qochapa chawpinpi Egipto runakunata chinkarachirqa.

²⁸ Yakukunam kasqallan kutiykuspan carretakunata hinaspa caballeriakunata taparurqa, Israel castakunapa qepanta lamar qochaman yaykuq Faraonpa lliw tropankunaqa manam chullallapas puchurqachu.

²⁹ Israelpa castankunam ichaqa lamar qochapa chakisqa chawpinta pasarurqaku. Yakukunam karurqa perqa hina *f**alleq lawninkupi hinaspa *f**ichoq lawninkupi.

³⁰ Chaynatam Tayta Dios chay punchaw Egipto runakunamanta Israel runakunata salvarurqa hinaptinmi Israel runakuna qawarqa lamar qochapa patanpi wañusqa Egipto runakunata.

³¹ Israel runakunam qawarqa Egipto runakunapa contranpi Tayta Diospa hatun milagro rurasqanta chaymi runakuna Tayta Diosta respetarqaku hinaspam confiakurqaku Tayta Diospi chaynataq serviqnin Moisespipas.