Éxodo 13 - Quechua Ayacucho Bible 1987

¹ Tayta Diosmi Moisesta nirqa:

² —Qoway llapallan piwikunata, Israelpa mirayninkunamanta punta nacemuqkunaqa ñoqapam runakuna kaspa otaq animalkuna kaspapas —nispa.

³ Chaymi Moises nirqa runakunata: —Amam qonqankichikchu kay punchawta, kay punchawpim Egipto nacionpi sirviente kasqaykichikmanta lloqsirqankichik. Tayta Diosmá hatun atiyninwan kaymanta horqosurqankichik. Chaynaqa amam mikunkichikchu qonchuyoq tantataqa.

⁴ Qamkunam kunan lloqsichkankichik Abib sutiyoq killapi.

⁵ Tayta Diosmi yaykuchisunkichik Canaan casta runakunapa, Het casta runakunapa, Hiv casta runakunapa hinaspa Jebus casta runakunapa allpanman. Abueloykichikkunamanmi jurarqa tukuy imakunapapas kasqan allpata qosunaykichikpaq. Chayman yaykuspaykichikmi kay fiestata rurankichik hina chay Abib sutiyoq killapi.

⁶ Qanchis punchawmi mikunkichik mana qonchuyoq tantata, qanchis kaq punchawpiñataqmi kanqa Tayta Diosta adorana fiesta.

⁷ Qanchisnintin punchawmi mikunkichik mana qonchuyoq tantata. Maymi kasqaykichikpiqa amam kanqachu imapas qonchuwan poqosqaqa nitaq qonchupas.

⁸ Churikichikmanmi chay punchawpi willankichik: “Kaytaqa rurachkanchik Egipto nacionmanta Tayta Dios horqomuwasqankuraykum” nispa.

⁹ Ama qonqanaykichikpaqmi kayqa kanqa señal chaynapi makikichikpi hinaspa urkuykichikpi marka apachkaq hina Tayta Diospa yachachikuynin simillaykichikpi kananpaq. Tayta Diosqa hatun atiyninwanmi Egipto nacionmanta horqomusurqankichik.

¹⁰ Kay decretotamá rurankichik watan watan imam punchawninpi.

¹¹ —Qanmanpas, abueloykikunamanpas juramentasqanman hina Canaan casta runakunapa allpanman Tayta Dios yaykuchisuptikim hinaspa qoykusuptikim

¹² punta naceq llapallan qari wawata Tayta Diosman qonkichik, qonkitaqmi punta naceq orqo animaltapas, chaykunaqariki Tayta Diospaqñam.

¹³ Asnopa punta wawantam ichaqa cambianki huk carnerowan, mana cambiaspaqa kunkantam qewirunki. Llapallan piwi qarikunatapas cambiankitaqmi.

¹⁴ Churiki qepa punchawta tapuspa: “¿Imataq kayqa?” nisuptikiqa paytam ninki: “Tayta Diosmi sirviente kasqaykumanta hatun atiyninwan Egipto nacionmanta horqomuwarqaku.

¹⁵ Faraon sonqonta rumiyarachispan mana kachariwaptinkum runapa piwi churinmanta qallarispa animalpa piwinkama llapa piwikunata Tayta Dios wañurachirqa Egipto nacionpi. Chayraykum wañuchiniku Tayta Diospaq llapallan punta nacemuq animalkunata, cambianikutaqmi llapallan qari piwiykutapas.

¹⁶ Chaynaqa qampaqmi kanqa huk señal makikipiwan urkuykipi marka apachkaq hina chaynapi Tayta Dios hatun atiyninwan Egipto nacionmanta horqomuwasqankuta ama qonqanaykipaq” nispa.

Sayaq puyupi hinaspa ninapi Tayta Dios compañasqanmanta

¹⁷ Israel runakunata Faraon kachaykuruptinmi hichpalla kachkaptinpas Filistea casta runakunapa nacionninman riq ñannintaqa Dios mana pusarqachu. Diosmi piensarqa: —Yanqam runakunaqa guerrapi kaspanku mancharikuspa Egipto nacionman kutikunmanku —nispa.

¹⁸ Chaymi Diosqa runakunata muyuchirqa Puka Lamar Qocha law chunniq ñanninta chaymi Israelpa mirayninkunaqa tropa-tropa lloqsirqaku Egipto nacionmanta.

¹⁹ Moisesqa apachirqataqmi Joseypa cuerpontapas. Joseymi kawsachkasparaq Israelpa mirayninkunata jurachirqa: —Diosmi cheqaptapuni watukamusunkichik, chayna kaptinmi tulluykunata kaymanta apankichik —nispa.

²⁰ Chaymi Sucot lawmanta pasaspanku Etam lawpi karpankuta sayachispanku samarurqaku chunniqpa qallariyninpi.

²¹ Tayta Diosmi paykunapa ñawpaqninta punchaw rirqa sayanpa puyupi ñanninkupi pusananpaq, tutañataqmi rirqa sayanpa ninapi paykunata achkinanpaq chaynapi punchawpas tutapas rinankupaq.

²² Runakunapa ñawpaqninmantaqa manam punchawpi sayanpa puyupas nitaq tutapi sayanpa ninapas karunchakurqachu.