Éxodo 12 - Quechua Ayacucho Bible 1987

Pascua fiestamanta

¹ Moisesmanwan Aaronmanmi Egipto nacionpi Tayta Dios nirqa:

² —Watapa qallariynin kay killam qamkunapaq allin reqsisqa kanqa.

³ Israelpa lliw huñunakuyninpim ninki: “Kay killapa chunka punchawninmanmi familianman hina sapakama hapinqa malta carnerota otaq malta chivatota. Huk familiapaqmi kanqa huk animal.

⁴ Aswanqa chay animalta mikunankupaq wakiqninpa aslla familian kaptinqa vecinontam qayamunqa animalta haykam mikunanpaq haypaqta otaq sapakamapa mikusqanman hina.

⁵ Chay animalqa kanqa huk watayoq orqo sano animalmi. Kanmanmi carneropas otaq chivatopas.

⁶ Chay animaltaqa waqaychankichik kay killapa chunka tawayoq punchawninkamam, Israel casta lliw runakunam inti seqaykuruptinña wañuchinqaku.

⁷ Yawarta chaskispankum hinanqaku maypim mikunanku wasi punkupa iskaynin sarpunman hinaspa punkupa chakaqninmanpas.

⁸ Chay tutam mikunqaku ninapi kankasqa aychata, mikunqakutaqmi mana qonchuyoq tantatawan qatqe verdurapa llaqentapas.

⁹ Chawa aychataqa amam mikunkichikchu nitaq yakupi yanusqatapas, enteronmi ninapi kankasqa kanqa umanpas, piernankunapas hinaspa ukunninkunapas.

¹⁰ Amataqmi puchuchinkichikchu paqarinnintin punchawpaqqa, puchuruptinqa kañarunkichikmi.

¹¹ Mikunkichikqa utqaymanmi illanapaq hina allin pachasqa. Usutaykichikpas sumaq watasqa hinaspa tawnaykichikpas hapirisqallam kankichik. Ñoqa Tayta Diospa *f**Pascuaymi kayqa.

¹² Chay tuta Egipto nacionninta pasaspaymi wañuchisaq runapa piwinkunatawan animalpa lliw piwinkunata, castigasaqtaqmi Egipto lliw dioskunatapas. Ñoqa Tayta Diosmi chaynata nini.

¹³ “Egipto nacionpi wañuchiptiyqa yawarmi kanqa señal maymi qamkunapa kasqaykichik wasipi, yawarta qawaspaymi pasarusaq hinaptinmi mana qamkunapi wañuy castigo kanqachu.

¹⁴ Chay punchawmi qamkunapaq kanqa yuyarinaykichik punchaw chaymi hatun adorawanaykichik fiestata rurankichik. Ñoqa Tayta Diospaq kay hatun adorawanaykichik fiestatam rurankichik tukuy miraynikichikpi wiñaypaq decretota hina.

¹⁵ Qanchis punchawmi mikunkichik mana qonchuyoq tantata, qallariynin punchawpipunim wischunkichik qonchuta wasikichikmanta, chaynataqa rurankichik qallariynin punchawmanta qanchis punchawkamam. Pipas qonchuyoqta mikuqqa Israel castamanta qarqosqam kanqa.

¹⁶ Qallariy punchawpi hinaspa qanchis kaq punchawpim ñoqapaq kanqa hatun huñunakuy, chay punchawkunapiqa amam llamkankichikchu. Ruraspaqa-rurankichik sapakamapaqmi mikunallaykichikta.

¹⁷ Rurankichikmá Mana Qonchuyoq Tanta Fiestata, chay punchawpunim tropa-tropata Egipto nacionmanta horqosqaykichik. Chayraykum chay punchawta waqaychankichik tukuy miraynikichikpi wiñaypaq decretota hina.

¹⁸ Qallariy killapim mikunkichik mana qonchuyoq tantata, chaytaqa mikunkichik killapa chunka tawayoq punchawninpa tardenmanta qallarispam iskay chunka hukniyoq punchawpa tardenkama.

¹⁹ Qanchis punchawmi wasikichikpi mana kanqachu qonchu, pipas qonchuyoq mikuqqa forastero kaspapas otaq castamasikichik runa kaspapas Israel castapa huñunakuyninmanta qarqosqam kanqa.

²⁰ Amam imatapas qonchuyoqtaqa mikunkichikchu, maypiña *f**yachaspapas mana qonchuyoq tantatamá mikunkichik.”

²¹ Chaymi Israel casta llapallan ancianokunata Moises qayachimuspan nirqa: —Hapimuychik carnerota otaq chivatota familiaykichikpaq hinaspa wañuchiychik *f**Pascua Fiestata ruranaykichikpaq.

²² Hapiychik huk aptay hisopo sutiyoq plantata hinaspa medianopi kaq yawarman challpuspa chaywan hinaychik punkupa chakaqninmanwan punkupa iskaynin law sarpunman, wasikichikmantaqa amayá mayqannikichikpas lloqsiychikchu achikyanankama.

²³ Tayta Diosqa Egipto runakunapa piwi churinta wañuchistinmi pasanqa, punkupa chakanpi hinaspa iskaynin sarpunkunapi yawarta qawaykuspanmi ichaqa karullanta pasarunqa, chaynapimá Tayta Diosqa wasikichikmanqa manaña yaykuchinqachu wañuchiqta.

²⁴ Kay decretotam wiñaypaq kasukunkichik churikichikkunapiwan.

²⁵ Tayta Diospa prometesusqaykichikman hina qosunaykichik allpaman yaykuspaqa kay Pascua Fiestatamá rurankichik.

²⁶ “¿Imataq kay fiestapi rurasqaykichikqa?” nispa churikichik tapusuptikichikqa

²⁷ kaynatam ninkichik: “Tayta Diospaq *f**Pascuapi wañuchina animalmi kayqa. Paymi Egipto nacionpi Israelpa mirayninkunapa wasinpa hawallanta pasarurqa, Egipto runakunatam ichaqa wañuchirqa, familiaykutaqa libraykurqamá” nispa. Chaykunata Moises rimayta tukuykuptinmi Israel runakuna qonqorakuykuspa Diosta adorarqaku.

²⁸ Israelpa mirayninkuna pasaspankum rurarqaku Moisesmanwan Aaronman Tayta Diospa kamachisqanman hina.

Piwikunapa wañusqanmanta

²⁹ Tayta Diosmi wañurachirqa Egipto nacionpi llapallan piwikunata, chawpi tuta horatam payqa wañuchirqa palacionpi gobiernaq Faraonpa piwinmanta qallarispa carcelpi kaq presopa piwinkama, wañuchirqataqmi llapa animalkunapa piwintapas.

³⁰ Chay tutam Faraon hatarirqa llapallan serviqninkunapiwan hinaspa lliw Egipto runakunapiwan, hatu-hatun waqaymi karqa, Egipto nacionpiqa manam huk wasipas wañuymantaqa salvakurqachu.

³¹ Chaymi Moisestawan Aaronta chay tuta Faraon qayachispan nirqa: —Qamkunaqa Israelpa mirayninkunapiwanyá kaymanta pasawaychik. Runaykunapa chawpinmanta lloqsispayá nisqaykichikpi hina rispa adoramuychik Tayta Diosta.

³² Nisqaykichikpi hinataqyá qatiychik ovejaykichiktapas, vacaykichiktapas. Rispayá Diosta mañakamuychik ñoqapaqpas —nispa.

³³ Chaymi Egipto runakuna apurarqaku Israel runakunata chay llaqtamanta lloqsinankupaq. Paykunam piensarqaku llapallanku wañuruyta.

³⁴ Israel runakunam tanta masankupas manaraq qonchuchasqa kachkaptin artesata pachankuwan wankuykuspa hombronkupi aparqaku.

³⁵ Israelpa mirayninkunaqa Moisespa kamachisqanpi hinam Egipto runakunamanta mañakurqaku qori-qollqe alhajakunatawan pachankuta.

³⁶ Egipto runakunawanmi Tayta Dios favorecechirqa, Israel runakunapa tukuy mañakusqankutam qorqaku, chaynatamá paykunaqa qechururqaku Egipto runakunapa tukuy imanta.

Israelpa mirayninkunapa lloqsisqanmanta

³⁷ Chaymi Israelpa mirayninkuna pasakurqaku Ramses llaqtamanta Sucot lawman. Chaki-puri qarikunallam yaqa soqta pachak waranqa karqa, wawakunaqa manam yupasqachu karqa.

³⁸ Paykunawantaqmi lloqsirqa nana-nanaq tukuy rikchaq runakunapas chaynataq achka-achka ovejakunawan vacakunapas.

³⁹ Egiptomanta apamusqanku mana qonchuyoq otaq mana poqosqa masamantam tortillakunata rurarqaku, Egipto nacionmanta qarqomuptinkum mana tiemponku karqachu manataqmi mikuytapas rurakurqakuchu.

⁴⁰ Israelpa mirayninkunapa Egipto nacionpi *f**yachasqankum karqa tawa pachak kimsa chunkan wata.

⁴¹ Chaymi tawa pachak kimsa chunkan wata pasaruptin chay punchawpuni Tayta Diospa llapallan tropankuna Egipto nacionmanta lloqsirqaku.

⁴² Egipto nacionmanta chay tuta horqonanpaqmi Tayta Dios tukuy tuta cuidarqa. Chayraykum chay tutata yuyarispa Israelpa llapallan mirayninkunaqa rikchananku tukuy mirayninkupi.

Pascua Fiesta kamachikuykunamanta

⁴³ Tayta Diosmi nirqataq Moisestawan Aaronta: —Kaymi kay *f**Pascuamanta decreto: Pascua Fiestapi mikunaykichik animaltaqa amam mikunqachu extranjero runaqa.

⁴⁴ Qollqewan rantisqa lliw sirvientekunam ichaqa mikunqaku señalasqa kaspanku.

⁴⁵ Samapakuq runawan llamkapakuq runaqa amam chaytaqa mikunqachu.

⁴⁶ Sapakamam wasillaykichikpi mikunkichik. Amam kay aychataqa horqonkichikchu chay wasimanta hawamanqa nitaqmi tulluntapas pakinkichikchu.

⁴⁷ Llapallan huñunasqa Israel castakunam chaynataqa ruranqa.

⁴⁸ Pipas extranjero runa qanwan *f**yachaspa Tayta Diospa *f**Pascuan ruray munaqqa, puntatam lliw qarikuna señalachikunqa hinaspañam asuykunqa Pascua Fiestata rurananpaq, chaynata ruraspaqa castamasikichik hinañam kanqa. Mana señalachikuspaqa amamá pipas mikunqachu.

⁴⁹ Hina chay yachachikuyllam kanqa castamasikichikpaqpas hinaspa extranjero runa qamkunawan *f**yachaqpaqpas —nispa.

⁵⁰ Moisesmanwan Aaronman Tayta Diospa kamachisqanpi hinamá Israelpa llapallan mirayninkunaqa rurarqaku.

⁵¹ Chay punchawpunim tropa-tropata Israelpa mirayninkunata Tayta Dios horqorqa Egipto nacionmanta.