Éxodo 11 - Quechua Ayacucho Bible 1987

Piwikuna wañunanpaq willakuymanta

¹ Tayta Diosmi Moisesta nirqa: —Huk castigotawanmi Faraonman apamusaq chaynataq Egipto runakunamanpas, chay castigokunapa qepantam kaymanta kachaykusunkichik hinaspam qarqorusunkichik qalay-qalayta.

² Israel runakunamanyá nimuy qaripas-warmipas vecinonkumanta qori-qollqe alhajakunata mañakunankupaq.

³ Chaymi Egipto runakunawan Israel runakunata Tayta Dios favorecechirqa. Moisespas ancha respetasqa runam karqa Egipto nacionpi, respetasqataqmi karqa Faraonpa serviqninkunapa hinaspa lliw runakunapa ñawpaqninpipas.

⁴ Chaymi Faraonta Moises nirqa: —Tayta Diosmi kaynata nin: “Chawpi tutatam ñoqa lloqsimusaq Egipto nacionpa chawpinta.

⁵ Hinaptinmi Egipto nacionpi lliw piwikuna wañunqa, tronopi tiyaq Faraonpa piwi churinmanta qallarispa maraypa ladonpi tiyaq sirvientapa piwinkama, wañunqataqmi llapa animalpa piwinpas.

⁶ Hatun waqaymi kanqa lliw Egipto nacionpi, chayna waqayqa manam haykapipas karqachu manataqmi haykapipas kanqachu.

⁷ Ichaqa lliw Israelpa kaqninkunataqa manam pipas imananqachu runatapas nitaq animaltapas. Chaynapim yachankichik Egipto runakunamanta Israel runakunataqa Tayta Dios sapaqchasqanta” nispa.

⁸ Faraontam Moises nirqa: —Llapallan serviqnikikuna ñoqaman hamuwaspanmi ñawpaqniypi qonqorakuykuspa niwanqaku: “Lloqsiy llapallan qatisuqniki runakunapiwan” nispa. Chaymantañam lloqsisaq. Chaynata rimaruspanmi Moises lloqsirqa Faraonpa ñawpaqninmanta llumpay piñasqallaña.

⁹ Chaymantam Moisesta Tayta Dios nirqa: —Faraonqa manam kasusunkichikchu, chaynapim Egipto nacionpi milagroykunata achkayachisaq —nispa.

¹⁰ Moisespiwan Aaronmá tukuy chay milagrokunata rurarqaku Faraonpa ñawpaqninpi. Ichaqa Faraonpa sonqonta Tayta Dios rumiyarachiptinmi Israelpa mirayninkunata Egipto nacionmanta mana kacharirqachu.