Éxodo 10 - Quechua Ayacucho Bible 1987

Aqarway uru castigomanta

¹ Tayta Diosmi Moisesta nirqa: —Yaykuy Faraonman, paypa sonqontawan serviqninkunapa sonqontam rumiyarachini, chaynataqa ruraruni kay señalniykunata paykuna ukupi qawachinaypaqmi.

² Chaynataqa rurachkani Egipto nacionpi rurasqaymanta churikikunaman hinaspa willkaykikunaman willanaykipaqmi. Chaynapim yachankichik ñoqaqa Tayta Dios kasqayta.

³ Chaymi Moiseswan Aaron yaykurqaku Faraonman hinaspam nirqaku: —Hebreo castakunapa yupaychasqan Tayta Diosmi nin kaynata: “¿Haykapikamataq ñoqapa qayllaypi mana humillakunkichu? Kachariy runaykunata adoramuwananpaq.

⁴ Runaykunata mana kachariyta munaptikiqa paqarinmi kachamusaq aqarwaykunata enteron nacionnikiman.

⁵ Aqarwaykunam allpata tapaykunqa pampapas mana rikuy atinakama. Chay aqarway urukunam runtu paramanta puchuqkunata mikunqa, mikunqataqmi campopi llapallan iklliq sachakunatapas.

⁶ Chay aqarwaykunataqa huntarachisaqtaqmi palacioykikunamanpas, lliw serviqnikikunapa wasinmanpas chaynataq Egipto nacionpi lliw runakunapa wasinmanpas. Chaykunataqa taytaykichikkunapas nitaq abueloykichikkunapas kunankamam mana rikurqakuchu kay Egipto nacion kasqanmantapuni” nispa. Moisesmi chay rimayta tukuruspan Faraonpa qayllanmanta lloqsikurqa.

⁷ Chaymi Faraonta serviqninkuna nirqaku: —¿Haykapikamataq kay runa sasachakuyllata qowasunchik? Kachariy Israel runakunata yupaychasqanku Tayta Diosta adoramunankupaq. Yachankiñam lliw Egipto nacionqa paykunarayku purmachisqa kasqanta.

⁸ Faraonmi Moisestawan Aaronta qayachispan nirqa: —Rispaykichik adoramuychik yupaychasqaykichik Tayta Diosta. Ichaqa ¿pikunataq chay riqkunaqa kachkankichik? —nispa.

⁹ Chaymi Moisesñataq nirqa: —Tayta Diosta adoranayku fiesta kasqanraykum risaqku warmaykupiwan, yuyaqniykupiwan, qari-churiykupiwan hinaspa warmi churiykupiwan. Qatikusaqkum ovejaykutawan vacaykutapas.

¹⁰ Chaymi Faraonñataq nirqa: —Tayta Dios qamkunawanña kaptinpas manam warmaykichikkunatawanqa kacharikichikmanchu. Qamkunaqa mana allintam piensachkankichik.

¹¹ Manam chaynaqa kanmanchu, riychik qari kaqkunalla hinaspa adoramuychik Tayta Diosta. Chaytaqa qamkunam mañakurqankichik —nispa. Chaynata Faraon rimaruspanmi paykunata ñawpaqninmanta qarqorachirqa.

¹² Chaymi Moisesta Tayta Dios nirqa: —Egipto allpapa hawanman makikita haywariy aqarwaykuna hamuspan runtu parapa puchusqan lliw qorakunatapas mikunanpaq —nispa.

¹³ Hinaptinmi Moises haywarirqa tawnanta Egipto allpapa hawanman chaymi Tayta Dios tutantin punchawnintin intipa qespimunan lawmanta wayrata pukuchimurqa allpapa hawanman. Chaymi paqarinnin punchawpaq intipa qespimunan lawmanta wayra aparamurqa aqarwaykunata.

¹⁴ Lliw Egipto nacionpa hawanman aqarway hamuruspanmi nana-nanaq tiyarurqa, chayna aqarwayqa manam karqachu nitaqmi kanqachu.

¹⁵ Lliw allpatamá taparurqa pampapas tutayanankama, runtu paramanta puchuq allpapi qoratam mikururqa, mikururqataqmi sachakunapa lliw ruruntapas. Lliw Egipto nacionpim verdeqa mana imapas puchurqachu sachakunapi nitaq qorakunapipas.

¹⁶ Chaymi Faraon utqayllamanña Moisestawan Aaronta qayachimuspan nirqa: —Yupaychasqaykichik Tayta Diospa contranpiwan qamkunapa contraykichikpim huchallikuruni.

¹⁷ Ichaqa kunanllañayá pampachaykuwaychik huchayta hinaspayá mañakuychik yupaychasqaykichik Tayta Diosta kay plagallatañapas ñoqamanta wischunanpaq chaynapi ama wañunaykupaq —nispa.

¹⁸ Moisesmi Faraonpa ñawpaqninmanta lloqsispan Tayta Diosta mañakurqa.

¹⁹ Chaymi Tayta Dios intipa seqaykunan lawmanta sinchi wayrata pukurachimuspan aqarwayta wischururqa Puka Lamar Qochaman, manam chulla aqarwaypas Egipto nacionpiqa puchurqachu.

²⁰ Ichaqa Tayta Diosmi Faraonpa sonqonta rumiyarachirqa chaymi Israelpa mirayninkunata mana kacharirqachu.

Sinchi tutayay castigomanta

²¹ Tayta Diosmi Moisesta nirqa: —Makikitayá cielo lawman hoqariy Egipto nacionpi tutayay kananpaq, chay tutayayqa kanqa llachpaypas atinaraqmi —nispa.

²² Chaymi Moises makinta hoqarirqa cielo lawman hinaptinmi yanay-yanay tutayay kimsa punchaw Egipto nacionpi karurqa.

²³ Kimsa punchawpunim mana pipas rikunakurqakuchu nitaqmi maymi kasqanmantapas lloqsirqakuchu. Israelpa llapallan mirayninkunapa yachasqallanpim ichaqa achkiy karqa.

²⁴ Chaymi Moisesta Faraon qayachispan nirqa: —Rispaykichik adoramuychik Tayta Diosta, pusaychiktaqyá warmaykichiktapas. Ovejaykichikwan vacaykichikyá ichaqa quedachun —nispa.

²⁵ Chaymi Moisesñataq nirqa: —Cheqaptaqa qanmi qowankikuman animalkunataqa yupaychasqayku Tayta Diospaq wañuchispa kañanaykupaq.

²⁶ Animalniykupas ñoqaykuwanmi rinqa, manam chullallapas quedanqachu, yupaychasqayku Tayta Dios adoranaykupaqqa chay animalkunamantam hapirisaqku. Manaraqmi yachanikuchu chayanaykukama imawanmi Tayta Dios adoraytapas —nispa.

²⁷ Aswanqa Tayta Diosmi Faraonpa sonqonta rumiyarachirqa, chayraykum kachariyta mana munarqachu.

²⁸ Aswanqa Faraonmi Moisesta nirqa: —Pasaway qayllaymanta, ama masta rikurimuwaychu, yapatawan hamuwaptikiqa wañurachisqaykim —nispa.

²⁹ Hinaptinmi Moises nirqa: —Allintapunim ninki: “Manañam yapatawanqa hamusqaykiñachu” nispa.