Éxodo 1 - Quechua Ayacucho Bible 1987

Egipto nacionpi Israelpa mirayninkuna ñakarisqanmanta

¹ Israelpa churinkunam Egipto nacionman yaykurqaku, paykunawanmi yaykurqa taytanku Israelpas, sapakamam yaykurqaku familiantin. Israelpa chay churinkunam karqa:

² Ruben, Simeon, Leviy, Juda,

³ Isacar, Zabulon, Benjamin,

⁴ Dan, Neftaliy, Gad hinaspa Aser.

⁵ Israelpa otaq Jacobpa mirayninkunam qanchis chunka karqa. Joseyqa Egipto nacionpiñam kachkarqa.

⁶ Wañukurqañam Joseywan llapallan wawqenkunapas hinaspa llapallan chay wiñaymasinkunapas.

⁷ Ichaqa Israelpa mirayninkunam sisi hinaña mancharikuypaqta mirarurqaku hinaspam sinchi atiyniyoq karqaku chaymi Egipto nacionpas paykunawan huntarurqa.

⁸ Chaymantam Egipto nacionpi munaychakurqa Joseyta mana reqsiq huk mosoq reyña.

⁹ Paymi runankunata nirqa: —Kay Israelpa miraynin runakunaqa llumpayllatañam achkayarunku hinaspapas aswan atiyniyoqmi ñoqanchikmantaqa kachkanku.

¹⁰ Chaynaqa yachaywanyá imatapas rurasunchik paykunapa contranpi chaynapi ama miranankupaq. Yanqañataqmi ima guerrapas karuptin enemigonchikkunaman hukllawakuykuspa peleanman contranchikpi hinaspa ripukunmanku nacionninchikmanta —nispa.

¹¹ Chayraykum Egipto runakuna churarqaku capatazkunata debaldella sasa llamkaykunawan Israelpa mirayninkunata ñakarichinankupaq. Paykunawanmi rurachirqaku kawsaykuna churana Piton llaqtatawan Ramses llaqtata, chay llaqtakunapim Rey Faraon waqaychaq kawsaykunata.

¹² Aswanqa maynata ñakarichiptinkupas aswanraqmi mirarqaku chaynapim Egipto runakuna karqaku mancharisqallaña Israelpa mirayninkunawan.

¹³ Egipto runakunamá maqa-maqarispa servichikurqaku Israelpa mirayninkunawan.

¹⁴ Ñakarichirqakumá mana aguantay atina sasallaña llamkaykunapi, mitu ruraypi, adobe chutaypi hinaspa campopi tukuy llamkaypi. Tukuy chay ruraypim Israelpa mirayninkunawan maqa-maqarispa servichikurqaku.

¹⁵ Egipto nacionpi reyqa kamachirqataqmi Hebreo casta iskay parterakunatapas. Hukninmi karqa Sifra, hukninñataqmi karqa Fua, paykunatam nirqa:

¹⁶ —Hebreo casta warmikunata atiendespaykichikqa qawankichikmi imam kasqanta, qari kaptinqa wañuchinkichikmi, warmi kaptinñataqmi ama imanankichikpaschu —nispa.

¹⁷ Ichaqa parterakunam Diosta respetaspanku Egipto nacionpi reypa kamachisqantaqa mana kasukurqakuchu, qari wawakunataqa manamá wañuchirqakuchu.

¹⁸ Chaymi parterakunata rey qayachispan nirqa: —¿Imanasqataq qari wawakunataqa kawsachirqankichik? —nispa.

¹⁹ Hinaptinmi Egipto nacionpi Rey Faraonta parterakuna nirqaku: —Hebreo casta warmikunaqa manam Egipto warmikuna hinachu. Paykunaqa kallpasapa kaspankum partera manaraqpas chayachkaptin wachakurunkuña —nispa.

²⁰ Parterakunatam Dios favorecerqa chaymi Israel runakuna mirarurqaku ancha munayniyoq karunankukama.

²¹ Parterakuna Diosta respetasqanraykum Diospas familiankunata achkayachirqa.

²² Chaymi Faraon kamachirqa lliw runankunata: —Llapallan Hebreo casta qari wawa naceqtaqa mayumanyá wischuychik, llapallan warmi wawakunatam ichaqa ama imanankichikchu —nispa.