Ester 9 - Quechua Ayacucho Bible 1987

Judio runakuna vencesqankumanta

¹ Chunka iskayniyoq killapim otaq Adar sutiyoq killapa chunka kimsayoq punchawninpim reypa kamachikusqan decretoman hina judio runakunata enemigonkuna munaychakunanku karqa, judio runakunaraqmi chay cheqniqninkunapiqa munaychakurqaku.

² Rey Asueropa gobiernasqan llapallan provinciakunapim judio runakunaqa huñunakururqaku mana allin ruray munaqninkunawan peleanankupaq, ichaqa manam pipas chay enemigonmantaqa paykunapa contranpi sayariyta atirqakuchu, llapallan runakunam mancharisqallaña karqaku chay Judio runakunarayku.

³ Chaymi provinciakunapi reypa churasqa llapallan hatun kamachikuqkuna, prefectokuna, subprefectokuna hinaspa autoridadkuna Mardoqueota manchakuspanku judio runakunataña yanaparqaku.

⁴ Mardoqueoqa ancha munayniyoqmi karqa reypa palacionpi, Mardoqueopa munayniyoq kasqantam provinciakunapipas lliw yacharurqaku, payqa aswan-aswan munayniyoqmi hoqariypaq-hoqarikurqa.

⁵ Judio runakunaqa llapallan enemigonkunawanmi munasqankutaña rurarqaku, paykunaqa enemigonkunatamá espadawan wañuchispa puchukachirqaku.

⁶ Reypa *f**yachanan Susa llaqtapim judio runakunaqa wañuchispa puchukarachirqaku pichqa pachak runakunata.

⁷ Paykunaqa wañuchirqakumá Parsandata sutiyoq runatapas, Dalfon sutiyoq runatapas, Aspata sutiyoq runatapas,

⁸ Porata sutiyoq runatapas, Adalia sutiyoq runatapas, Aridata sutiyoq runatapas,

⁹ Parmasta sutiyoq runatapas, Arisai sutiyoq runatapas, Aridai sutiyoq runatapas hinaspa Vaizata sutiyoq runatapas.

¹⁰ Kay wañuchisqanku chunkantin runakunaqa karqa judio runakunapa enemigon Amanpa churinkunam, Amanqa karqa Hamedata sutiyoq runapa churinmi. Ichaqa paykunaqa manam qechurqakuchu chay wañuchisqanku runakunapa kapuqninkutaqa.

¹¹ Hina chay punchawllapitaqmi reypa *f**yachanan Susa llaqtapipas wañuchisqankumanta reyman willarqaku.

¹² Hinaptinmi reyñataq reina Esterman nirqa kaynata: —Kay ñoqapa *f**yachanay Susa llaqtapipas judio runakunam wañurachinku pichqa pachak runakunata, wañurachinkutaqmi Amanpa chunkantin churinkunatapas, chaynaqa ¿imatawanraqtaq mañakuwanki? ¿imatawanraqtaq ruranayta munachkanki? Imapas mañakusqaykiqa rurasqam kanqa —nispa.

¹³ Chaymi Esterñataq nirqa: —Agradoykipaq kaptinqa kay Susa llaqtapi judio runakunayá kunan decretoman hina paqarinpas rurachunku, chaynataqyá Amanpa chunkantin churinkunapa ayantapas warkuchunku warkunakunapi —nispa.

¹⁴ Reymi kamachirqa chaynata ruranankupaq, decretotapas Susa llaqtapi qoykuptinmi Amanpa chunkantin churinkunapa ayanta warkurqaku.

¹⁵ Susa llaqtapi kaq judio runakunam Adar sutiyoq killapa chunka tawayoq punchawninpi huktawan huñunakururqaku hinaspam Susa llaqtapi wañurachirqaku kimsa pachak runakunatawan ichaqa manam qechurqakuchu imankutapas.

¹⁶ Reypa gobiernasqan provinciakunapi wakin judio runakunapas huñunakurqakum defiendekunankupaq, chaynapiñam paykunaqa enemigonkumanta hawka karqaku, paykunapas cheqniqninkunatam wañurachirqaku qanchis chunka pichqayoq waranqa runakunata ichaqa manam qechurqakuchu imankutapas.

¹⁷ Adar sutiyoq killapa chunka kimsayoq punchawninpim tukuy kaykunaqa pasakurqa, chay killapa chunka tawayoq punchawninpiñataqmi samarqaku hinaspam paykunaqa chay punchawpi convidota ruraspanku kusikurqaku.

¹⁸ Susa llaqtapi kaq judio runakunam huñunakurqaku hina chay Adar sutiyoq killapa chunka kimsayoq punchawninpi, huñunakurqakutaqmi paqarinnintin chunka tawayoq punchawpipas, paykunaqa chunka pichqayoq punchawpiñam samakurqaku hinaspam chay punchawta rurarqaku convidanakuspa kusikuy punchawta.

¹⁹ Chayraykum mana murallasqa llaqtachakunapi *f**yachaq judio runakunapas Adar killapa chunka tawayoq punchawninpiqa kusikuywan convidota ruranku, regalokunatapas apachinakunkutaqmi sapakama vecinonkunawan.

Purim sutiyoq fiestamanta

²⁰ Tukuy kaykunamanta qellqaspan Mardoqueo apachirqa cartakunata. Rey Asueropa gobiernasqan llapallan provinciakunapi kaq judio runakunamanmi payqa apachirqa. Apachirqataqmi hichpallapi *f**yachaqkunamanpas chaynataq karupi kaqkunamanpas.

²¹ Adar killapa chunka tawayoq hinaspa chunka pichqayoq punchawninpi watan-watan fiestata ruranankupaqmi payqa kamachirqa.

²² Chaynataqa kamachikurqa judio runakuna enemigonmanta hawkaña kasqanku punchawraykum chaynataq llakikuyninkupas kusikuymanña tikrakusqan killa kasqanraykum chaynataq waqayninkupas kusikuy punchawmanña tikrakurusqanraykum. Kamachirqataqmi chay punchawkunapiqa convidanakuspa kusikunankupaqpas, vecinonkuman sapakama mikuyta apachinankupaqpas chaynataq wakchakunaman regalokuna qonanku punchawkuna kananpaqpas.

²³ Chaymi judio runakunaqa Mardoqueopa qellqasqanta chakispanku chay fiesta ruray qallarisqankuman hina rurarqaku.

²⁴ Agagpa miraynin Hamedata sutiyoq runapa churin Amanmi tantearurqa judio runakuna puchukarachiyta, payqariki karqa judio runakunapa enemigonmi, Amanqa “pur” sutiyoq suertetam choqarqa paykunataqa puchukarachispa tukurunanpaq. “Pur” ninanqa “suerte” ninanmi.

²⁵ Reina Ester ñawpaqninman hamuruptinmi reyqa chay asuntomanta yacharurqa hinaspam cartawan kamachikurqa judio runakunapa contranpi kaq Aman sutiyoq runapa mana allin tanteasqan kikillanman wichiykunanpaq chaynataq churinkunatapas hinaspa kikintapas warkunapi warkurunankupaq.

²⁶ Chay punchawkunam Purim sutiwan sutichasqa karqa, “purim” ninanqa “suertekuna” ninanmi. Chayraykum Mardoqueopa cartanman hina, qawasqankuman hina hinaspa kikinku ukupi pasasqanman hina

²⁷ judio runakunaqa kamachirqaku kikinkupas, mirayninkupas chaynataq paykunaman llapallan hukllawakuqkunapas mana qonqaruspa iskay punchawpuni fiestata ruranankupaq, chaytam rurananku karqa imaynam chay qellqasqanman hina watan-watan imam tiempollanpi.

²⁸ Kamachirqakutaqmi chay iskaynin punchawpiqa lliw mirayninkunapiwan hinaspa ayllunkunapiwan provinciakunapipas chaynataq llaqtakunapipas fiestata ruranankupaq chaynapi judio runakunapipas hinaspa mirayninkunapipas kay Purim punchawkunaqa mana qonqasqa kananpaq, aswanqa chay punchawkunapiqa fiestata ruranankupaq.

²⁹ Hinaptinmi Abihailpa churin reina Ester judio Mardoqueopiwan hatun atiyniyoq kayninkuman hina qellqarqaku iskay kaq cartata, chay cartaqa rimarqa Purim sutiyoq fiestamantam.

³⁰ Chaymi Mardoqueo apachirqa cartakunata llapallan judio runakunaman chaynataq Rey Asueropa gobiernasqan pachak iskay chunkan qanchisniyoq provinciakunamanpas. Mardoqueqa chay runakunataqa kuyakuywan hinaspa confianzawanmi rimapayarqa.

³¹ Judio Mardoqueopiwan Reina Esterpa kamachisqanman hinaqa señalasqanku tiempopim kay Purim punchawkunapiqa kikinku hinaspa mirayninku fiestata rurananku karqa, kamachirqataqmi kikinkupas chaynataq mirayninkupas imaynam ayunanankupaq chaynataq waqanankupaqpas.

³² Chaynapimá Purim fiestamanta Esterpa kamachikuyninqa allin takyachisqa karqa, chayqa libropi qellqasqam karqa.