Ester 6 - Quechua Ayacucho Bible 1987

Mardoqueopa vencesqanmanta

¹ Chay tutam reyqa mana puñuyta atirqachu hinaspam kamachirqa pasaq tiempokunapi sucedekusqanmanta qellqasqankuta qayllanman apamuspanku leenankupaq.

² Chay qellqapim tarirurqaku Bigtan hinaspa Teres sutiyoq runakunapa contranpi Mardoqueopa denunciasqanta, chay runakunaqa iskayninkum karqaku reypa punkunwan cuentallikuqkuna, paykunaqa Rey Asuero wañurachiytam munarqaku.

³ Chaymi rey tapurqa: —¿Mardoqueotaqa yaqachum imallawanpas favorecerqaku otaq yaqachum ima cargollatapas qorqaku? —nispa. Hinaptinmi reypa serviqninkuna nirqaku: —Manam imallatapas paypaqqa rurarqakuchu —nispa.

⁴ Patiopi huk kaqnin puriqta uyarispanmi rey tapurqa: —¿Pitaq purichkan patiopiqa? —nispa. Chay ratoqa Amanmi reypa palacionpa hawa lawnin patioman chayaramuspan chaypi kachkarqa, payqa chaypiqa kachkarqa rurachisqan warkunapi Mardoqueota warkuchinanmanta reyman ninanpaqmi.

⁵ Hinaptinmi reypa serviqninkuna nirqaku: —Wak patiopi sayaq runaqa Amanmi —nispa. Chaymi reyñataq nirqa: —Yaykumuchun —nispa.

⁶ Aman yaykuramuptinmi reyñataq payta tapurqa: —¿Imaynataq hatunchasqa kanman reypa hatunchay munasqan runaqa? —nispa. Chaymi Amanñataq sonqonpi piensarirqa: —¿Pitaq reypa hatunchay munasqanqa kanman mana ñoqa kaspaqa? —nispa.

⁷ Chaymi Amanqa reyta nirqa: —Reypa hatunchay munasqan runapaqqa

⁸ apamuchunkuyá reypa pachankunata, payqa reypa sillakunan caballopi sillachisqayá kachun, churachunkutaqyá reypa umanpi kaq coronawanpas.

⁹ Ancha reqsisqa serviqninmanyá qochunku reypa pachankunatawan caballonta chaynapi chay pachakunawan reypa hatunchay munasqan runata pachachinankupaq, chay silladapa puntanta rispankuyá qayaykachakuchunku kaynata: “Kaynatapunim reyqa hatunchan hatunchay munasqan runataqa” nispa.

¹⁰ Chaymi reyqa Amanta nirqa: —Utqaymanyá horqomuy pachakunay pachakunata, pusamuytaqyá caballoytapas hinaspayá nisqaykiman hina ruramuy Mardoqueo sutiyoq judio runawan otaq palaciopa punkunpi tiyaqwan, amam qonqankichu tukuy imapas nisqaykiman hina paywan rurayta —nispa.

¹¹ Chaymi Amanqa chay pachakunata hapiykuspan chaynataq caballotapas alistaykuspan Mardoqueota pachachirqa hinaspam caballopi silladata pusarqa llaqtapa plazanta, payqa ñawpaqnintam rirqa kaynata qaparistin: —Kaynatapunim reyqa hatunchan hatunchay munasqan runataqa —nispa.

¹² Chaymantam Mardoqueoqa kutirirqa reypa palacionpa punkunman, Amanñataqmi ancha llakisqallaña umantapas tapakuykuspan wasinman kutikurqa kallpaylla.

¹³ Amanmi tukuy ima pasarusqanmanta willakurqa Zeres sutiyoq warminman, willakurqataqmi llapallan amistadninkunamanpas chaymi yachaysapa runakuna warmin Zerespiwan kaynata nirqaku: —Chay Mardoqueo judio kaptinqa paypa ñawpaqninpim wichiytaña qallaykunki, paytaqa manam venceyta atiwaqchu, aswanqa cheqaptapunim wichiypaqña-wichiykunki —nispa.

¹⁴ Paykunawan parlachkaptinraqmi reypa serviqninkuna chayarurqaku utqayllamanña Esterpa convido rurasqanman Amanta pusanankupaq.