Ester 5 - Quechua Ayacucho Bible 1987

Reypa qayllanman Esterpa yaykusqanmanta

¹ Kimsa punchaw pasaruptinmi Ester pachakurqa reina pachawan hinaspam reypa kanan patioman yaykurqa, chay patioqa karqa reypa salanpa chimpanpim, reyqa tiyachkasqa hina maymi tiyananpim, chay tiyananqa karqa palacioman yaykunapa chimpanpim.

² Payqa reina Esterta patiopi sayachkaqta rikuykuspanmi favoreceykurqa, makinpi kaq qorimanta tawnanta haywariykuptinmi Esterñataq asuykuspan tawnanpa puntanta llapchaykurqa.

³ Chaymi reyñataq tapurqa: —Reina Ester ¿imataq pasasunki? ¿Imataq qampa mañakuynikiqa? Ñoqaqa gobiernasqay naciontapas parteykusqaykim —nispa.

⁴ Chaymi Esterñataq nirqa: —Reynilláy, agradoykipaq kaptinqa kunanyá Amanwan kuska hamuychik convido rurasqayman —nispa.

⁵ Hinaptinmi reyñataq kamachikurqa: —Chaypunilla riychik Esterpa mañakusqanman hina, qayamuychiktaqyá Amantapas —nispa. Chaynapimá reyqa hamurqa Esterpa rurachisqan convidoman.

⁶ Reymi convidopi vinota tomachkaspan Esterta nirqa: —¿Imatataq mañakuwanki qanman qonaypaq? ¿Imataq qampa mañakuynikiqa? Ñoqaqa qoykusqaykim gobiernasqay nacionpa partentapas —nispa.

⁷ Chaymi Esterñataq nirqa: —Ñoqapa mañakuyniyqa hinaspa ruegakuyniyqa kaymi:

⁸ Reynilláy, sichum favorecewaspaykiqa kay mañakusqaytawan ruegakusqaytayá “arí” niykullaway, chaskiykullawayá agradoykipaq kaptinqa, paqarinyá huktawan hamuy Amanpiwan kuska rurachisqay convidoman, paqarinñam mañakusqayki imam mañakunaytaqa —nispa.

Mardoqueota warkurachinanpaq Aman alistakusqanmanta

⁹ Chay punchawmi Aman ancha kusisqallaña lloqsirqa aswanqa reypa palacionpa punkunpi Mardoqueota rikuruspanmi paypa contranpi anchallataña rabiarurqa, payqa rabiarurqa ñawpaqninpi Mardoqueo mana sayariptinmi nitaq manchakuyllamantapas mana kuyuriptinmi.

¹⁰ Chaywanpas aguantakuykuspanmi Amanqa wasinman chayarurqa hinaspam qayachimurqa amistadninkunata, qayachimurqataqmi warmin Zerestapas.

¹¹ Paykunapa qayllanpim alabakurqa achkallaña qori-qollqenkunamanta, alabakurqataqmi achkallaña churinkunamantapas, tukuy imawan rey hatunyarachisqanmantapas, kamachikuqkunapa hawanpi kasqanmantapas chaynataq reypa serviqninkunapa hawanman rey churasqanmantapas.

¹² Amanqa nirqataqmi: —Reina Esterqa manam pitapas convidarqachu reywan kuskataqa ichaqa ñoqallatam qayaykuwan, ñoqaqa paqarinpaqpas reywan kuskam convidasqa kachkani,

¹³ chaywanpas tukuy chaykunaqa manam gustoypaqchu, chaynaqa kachkani Mardoqueo sutiyoq judio runata sapa kutilla reypa palacionpa punkunpi tiyaqta qawaspaymi —nispa.

¹⁴ Chaymi warmin Zereswan llapallan amistadninkuna kaynata nirqaku: —Iskay chunka iskayniyoq metro sayayniyoq warkunatayá rurarachiy hinaspayá paqarinpuni reyta niy chaypi Mardoqueo warkusqa kananpaq, chaynapiyá qamqa kusisqaña yaykuy convidoman —nispa. Chayna nisqanku Amanpa agradonpaq karuptinmi payqa rurachirqa huk warkunata.