Ester 4 - Quechua Ayacucho Bible 1987

Contrankupi decretorayku judio runakuna llakikuypi kasqankumanta

¹ Tukuy kaykunata Mardoqueo yacharuspanmi pachankunata llikipakurqa hinaspam luto pachawan pachakuruspan uchpawanpas maqchikurqataq umanman hinaspam llaqtapa chawpinta pasarqa llakimanta qapariyllawanña.

² Luto pachawan reypa palacion ukuman yaykunanpaq mana permitisqa kasqanraykum payqa punkukamalla chayarqa.

³ Reypa kamachisqan decreto sapa provinciakunaman chayasqanpim judio runakunaqa karqaku huk hatun llakikuypi, chayraykum paykunaqa ayunowan qaparkachastin luto pachawan churakurqaku, puñurqakupas uchpakunapiñam.

Castankunapa favorninpi reyta Ester mañakusqanmanta

⁴ Serviqnin sipaskunam yaykuspanku Esterman willarqaku, hina chaynallatataqmi willarqaku serviqnin runakunapas, reinapas sinchillataña llakikuspan Mardoqueoman pachata apachirqa chaynapi chay luto pachankunata horqokuspan chay apachisqan pachawanña pachakunanpaq ichaqa payqa manam chaskirqachu.

⁵ Reypa churasqan serviqnin Hatac sutiyoq runata Ester qayaykuspanmi Mardoqueoman kacharqa chaynapi imam pasakusqanmantawan imanasqam chayna pachasqa kasqanmanta tapumunanpaq.

⁶ Chaynapim Hatac sutiyoq runaqa lloqsirqa Mardoqueowan tupananpaq, Mardoqueoqa reypa palacionpa chinpan plazapim kachkarqa.

⁷ Mardoqueom payman willarqa tukuy ima pasakusqanmantawan imaynam judio runakunaqa chinkachisqa kanankumanta, willarqataqmi Aman sutiyoq runaqa reyman qollqe qoy munasqantapas, payqa chay qollqetaqa ofrecekurqa judio runakuna wañuchisqa kanankupaqmi.

⁸ Qorqataqmi judio runakuna chinkachisqa kanankupaq Susa llaqtapi decreto qosqanpa copiantapas chaynapi Esterman qawaykachiptin paypas leenanpaq. Kunarqataqmi reyman rispa paypa qayllanpi castankunapa favorninpi mañakunanpaqpas.

⁹ Hatac sutiyoq runa Esterpa kasqanman kutirispanmi willarqa Mardoqueopa willamusqankunata.

¹⁰ Chaymi Esterqa Hatac sutiyoq runawan Mardoqueoman kaynata willachimurqa:

¹¹ —Reypa llapallan serviqninkunawan gobiernasqan provinciakunapi runakunaqa yachankupunim reypa leyninqa kayna nisqanta: “Qaripas otaq warmipas mana qayasqa kachkaspan reypa ukulaw pationman yaykuqqa wañuchisqam kanqa, yaykuspaqa-yaykunman pimanpas qori tawnanta rey haywariykuptillanmi” nispa. Ñoqaqa kimsa chunka punchawñam mana qayasqachu karqani reyman yaykunaypaqqa.

¹² Esterpa nisqankunatam willarqaku Mardoqueoman, willaykuptinkum payñataq Esterman kunarqa kaynata:

¹³ —¿Reypa palacionpi kaspaykichum wañunaykimanta judia kachkaspapas lluptiyta piensachkanki?

¹⁴ Sichum kunan rimarinayki kachkaptin upallakuykuptikiqa judio runakunapa libraqninqa huklawmantachiki hamunqa, chaywanpas qamqa taytaykipa ayllunkunapiwanmi puchukanki. Ichapas kunan hina horapaq reina kayman qamqa chayarqanki —nispa.

¹⁵ Chaymi Esterñataq willachimurqa kaynata:

¹⁶ —Susa llaqtaman rispaykiyá judio runakunata huñuramuy hinaspayá ayunaychik ñoqapaq, kimsa punchawpunim tutantin punchawnintin ama mikunkichikchu hinaspapas amataqmi tomankichikchu. Ñoqapas serviqniy sipaskunawanmi ayunasaq, leyman hinaqa mana yaykuna kachkaptinpas reymanmi yaykusaq, wañunay kaptinpas hinachiki wañurusaq —nispa.

¹⁷ Chaymi Mardoqueo pasaspan Esterpa tukuy kamachisqanta hina rurarqa.