Ester 3 - Quechua Ayacucho Bible 1987

Judiokunapa contranpi Aman hoqarikusqanmanta

¹ Chaykuna pasaruptinmi Rey Asuero hatuncharqa Agagpa mirayninmanta kaq Hamedata sutiyoq runapa churin Amanta, tiyanantapas churarurqa paywan kaq llapallan kamachiqkunapa tiyananmantapas aswan altopiraqmi.

² Chaymi reypa zaguan punkunpi kaq llapallan serviqninkuna Amanpa qayllanpi qonqoranpa pampaman kumuykurqaku, chaynataqa rurarqaku reypuni kamachikusqanraykum, Mardoqueom ichaqa mana qonqorakurqachu nitaq kumuykurqachu.

³ Chaymi zaguan punkupi kaq reypa serviqninkuna Mardoqueota nirqaku: —¿Imanasqataq manaqa kasukunkichu reypa kamachikuynintaqa? —nispa.

⁴ Sapa punchaw chaynata tapupayachkaptinkupas manam payqa kasukurqachu chaymi Amanman willaykurqaku cheqapchus Mardoqueoqa chayna rurasqanpi hinalla kananpaq, ñam Mardoqueoqa willakururqaña Juda nacionniyoq kasqanta.

⁵ Amanñataqmi qawaykurqa paypa qayllanpiqa Mardoqueo mana qonqorakusqanta nitaq mana kumuykusqanta chaymi payqa anchallataña rabiarurqa.

⁶ Mardoqueollata wañurachiy munasqanqa asllapaq rikchakapuptinmi, Amanqa munarqa Mardoqueopa lliw castankunatawan tukuruyta, payqa munarqa Rey Asueropa gobiernasqanpi *f**yachaq llapallan judio runakuna wañurachiytam. Ñataqmi willaykurqakuña pikunam Mardoqueopa ayllunkuna kasqantapas.

Judio runakuna wañuchisqa kanankupaq decretomanta

⁷ Nisan sutiyoq killapim otaq watapa qallariynin killapim Rey Asuero chunka iskayniyoq watamanña gobiernachkaptin Amanpa ñawpaqninpi “pur” nisqanku suerteta choqarqaku, chaytaqa rurarqaku judio runakunata haykapim wañuchinankupaqmi otaq ima killapim chaynataq ima punchawpim wañuchinankupaqmi, hinaptinmi Adar sutiyoq killapi hinaspa chay killapa chunka kimsayoq punchawninpi tuparurqa.

⁸ Chaymi Amanqa nirqa Rey Asuerota: —Gobiernasqayki provinciakunapim cheqesqa hinaspa rakinasqa huk casta runakuna *f**yachachkan, leyninkupas sapaqmi llapallan runakunapa leyninmantapas, chay runakunaqa manataqmi leynikitapas kasukunkuchu, chayna kawsasqankuqa manam allinpunichu qampaqqa.

⁹ Allinpaq rikchakapusuptikiqa decretaykuyá paykuna chinkachisqa kanankupaq, ñoqañataqmi kimsa pachak kimsa chunkan kilo qollqeta qosaq qori-qollqeki waqaychaqman —nispa.

¹⁰ Chaymi reyñataq makinmanta anillonta horqoykuspan judio runakunapa enemigon Amanman qoykurqa, payqa karqa Agag sutiyoq runapa miraynin Hamedata sutiyoq runapa churinmi.

¹¹ Amantamá rey kaynata nirqa: —Qollqe munachiwasqaykiqa qampaqyá kachun, chay runakunawanqa tanteasqaykiman hinayá ruray —nispa.

¹² Watapa qallariynin killapa chunka kimsayoq punchawninpim reypaq qellqaqkuna qellqarqaku Amanpa lliw kamachikusqanman hina reypa prefectonkunaman, sapa provinciapi kaq subprefectokunaman hinaspa sapa llaqtapi gobernadorkunaman, qellqarqakuqa sapa provinciapi imaynam qellqasqankuman hinam chaynataq llapa runakunapa rimayninkuman hinam. Rey Asueropa sutinpi qellqaspankum paypa anillonwan sellarqaku.

¹³ Carta apaqkunatam chaylla pasachirqaku reypa gobiernasqan llapallan provinciakunaman. Chay decretopim kamachisqa karqa chunka iskayniyoq killapa otaq Adar sutiyoq killapa chunka kimsayoq punchawninpi judio runakunata wañuchinankupaq, paykunataqa huk punchawllapi wañuchispam chinkachinanku karqa mozokuna kaptinpas, yuyaqkuna kaptinpas, wawakuna kaptinpas chaynataq warmikuna kaptinpas, kamachirqataqmi kapuqninkunata hapikuykunankupaqpas.

¹⁴ Sapa provinciakunamanmi kay qellqasqa leypa copianqa apachisqa karqa chaynapi llapallanku chay punchawpiqa judio runakunapa contranpi chaylla hatarinankupaq.

¹⁵ Reypa *f**yachanan Susa llaqtapim chay leyqa qosqa karqa chaymi reypa kamachisqanrayku kallpayllaman carta apaqkunaqa lloqsirqaku, Aman sutiyoq runañataqmi reywan tiyaykuspa upyakurqaku, Susa llaqtapiñataqmi runakunaqa ancha hukmanyasqallaña karqaku.