Esdras 6 - Quechua Ayacucho Bible 1987

¹ Chaymi Rey Dario kamachikurqa Babilonia nacionpi qori-qollqe waqaychana wasipi reykunapa rurasqanmanta willakuq librokunapi maskanankupaq.

² Hinaptinmi Media law Ecbatana llaqtapi reypa *f**yachanan palaciopi tarirqaku librota, chay libropim yuyarinapaq kayna qellqasqa kasqa:

³ Rey Ciropa gobiernasqan punta kaq watapim kikin Rey Ciro kamachirqa kaynata: “Jerusalen llaqtapi Diospa templonmantam kaynata nini: ‘Cimientonkunayá churasqa kachun, perqankunapas mosoqmanta hatarichisqayá kachun chaypi Diospaq animalkunapas wañuchipusqa kananpaq. Sayayninmi kanqa iskay chunka qanchisniyoq metron, anchonpas kanqa iskay chunka qanchisniyoq metrontaqmi.

⁴ Hatun rumikunatam churanqaku kimsa seqeta, chaypa hawanmanñataqmi churanqaku huk seqe vigakunata, chay ruraypi gastokunaqa reypa qori-qollqenmantayá pagasqa kachun.

⁵ Rey Nabucodonosormi Jerusalen llaqtapi Diospa templonmanta horqorurqa qori-qollqemanta serviciokunata hinaspam Babilonia llaqtaman aparurqa. Chaykunatapas kutichichunkuyá maymi kasqan Jerusalen llaqtapi Diospa templonman’ nispa.”

⁶ Chayraykum Rey Dario kamachirqa Eufrates Mayupa waklawninpi gobiernaq Tatnaitawan Setar-boznaita hinaspa paykunawan kuska Eufrates Mayupa waklawninpi kamachikuq runakunata, paykunatamá kaynata nirqa: Anchuriychik,

⁷ ama michakuychikchu Diospa templon chaypi ruranankuta. Judiokunapa prefectonyá paykunapa kamachiqninkunapiwan maymi kasqanpi mosoqmanta hatarichichunku Diospa templonta.

⁸ Ñoqataqmi kamachimuykichik judiokunapa kamachiqninkuna Diospa templonta hatarichiptinku imaynam yanapanaykichikpaq: Eufrates Mayupa waklawninmanta reypaq impuestokuna huñusqawanyá pagaychik lliw gastokunata, chaynapi rurasqanku mana sayarunanpaq.

⁹ Qoychiktaqyá sapa punchaw Jerusalen llaqtapi sacerdotekunapa imam mañakusqantapas, malta torokunatapas chaynataq carnerokunatapas, chaykunataqa qonkichik hanaq pachapi munaychakuq Diosman wañuchispa kañapunankupaqmi. Qoychiktaqyá mañakusqanku trigotapas, kachitapas, vinotapas hinaspa aceitetapas.

¹⁰ Chaynapim hanaq pachapi munaychakuq Diospaq animalkunata wañuchipunqaku hinaspam allin kanaykupaq mañakunqaku ñoqapaqpas chaynataq churiykunapaqpas.

¹¹ Sichum pipas kay kamachikusqayta mana kasukuptinqa paypa wasinmanta qeruta horqospankuyá chaypa puntanpi hoqarichunku wañunanpaq, wasinpas tuñichisqayá kachun mana kasukusqanrayku.

¹² Jerusalen llaqtapi sutinmanta reqsichikuq Diosyá chinkachichun llapa reyta otaq runakunatapas Jerusalen llaqtapi Diospa templonta tuñichiptinkuqa otaq decretoytapas cambiaptinkuqa. Ñoqa Dariom kay kamachikuyta qoni, chaynayá rurasqa kachun.

Diospa templonta ruraspanku qespichisqankumanta

¹³ Mayupa waklawninpi gobiernaq Tatnaiwan, Setar-boznaimi paykunawan kuska kamachikuq runakunapiwan Rey Dariopa kamachikusqanta imam kaqta rurarqaku.

¹⁴ Chaynapim judiokunapa kamachiqninkuna aswan-aswan hatarichirqaku Diosmanta willakuq Hageopa hinaspa Idopa churin Zacariaspa nisqanman hina. Chay templo hatarichisqankumá qespichisqa karqa Israelpa yupaychasqan Diospa kamachisqanman hina chaynataq Rey Ciropa, Rey Dariopa hinaspa Rey Artajerjespa kamachisqanman hina, paykunaqa karqa qatinastinpi Persia nacionpa reyninkunam.

¹⁵ Rey Dario soqta watamanña gobiernachkaptinmi Diospa templon qespichisqa karqa Adar sutiyoq killapa kimsa kaq punchawninpi.

¹⁶ Hinaptinmi Israelpa mirayninkuna, sacerdotekuna, Leviy castakuna chaynataq llapallan preso pusasqakunamanta kutimuqkuna Diospa templonta dedicarqaku kusikuyllawanña.

¹⁷ Diospa templonta dedicaspankum wañuchirqaku pachak malta torokunata, iskay pachak carnerokunata chaynataq tawa pachak malta carnerokunatapas, wañuchirqakutaqmi chunka iskayniyoq chivatokunatapas, chaykunataqa wañuchirqaku Israel casta runakunapa huchanraykum. Huk chivatotam wañuchirqaku sapa ayllupaq.

¹⁸ Churarqakutaqmi sacerdotekunatapas muyuyninpi ruranankupaq, Leviy casta runakunatapas churarqakum rakisqa kasqankuman hina, chaynataqa churarqaku Moisespa libronpi qellqasqanman hinam Jerusalen llaqtapi Diosta servinankupaq.

¹⁹ Preso pusasqa kutimuqkunam rurarqaku Pascua Fiestata punta kaq killapa chunka tawayoq punchawninpi.

²⁰ Sacerdotekunam Leviy castakunapiwan chuyanchakurqaku, llapallankum tukuy imapi preparasqaña karqaku hinaspam animalkunata wañuchirqaku Pascua Fiestapaq, chaynatam rurarqaku preso pusasqa kasqankumanta kutimuqkunapaq, ayllunku sacerdotekunapaq chaynataq kikinkupaqpas.

²¹ Chay Pascua mikuytam mikurqaku preso pusasqakunamanta Israel casta kutimuqkuna, paykunawan kuskataqmi mikurqaku chaylawkunapi runakunapa millakuypaq rurasqankunamanta rakikuqkunapas hinaspam taqrukurqaku Israelpa yupaychasqan Tayta Diosta adoranankupaqña.

²² Qanchis punchawnintinmá rurarqaku kusikuyllawanña Mana Qonchuyoq Tanta Fiestata, Tayta Diosmi Asiria nacionpi reywan favorecechirqa Israel yupaychasqan Diospa templon ruraypi yanapananpaq. Chayraykum paykunata Tayta Dios kusichirqa.