Esdras 5 - Quechua Ayacucho Bible 1987

Diospa templon qespichisqankumanta

¹ Diosmanta willakuq Hageowan Idopa churin Diosmanta willakuq Zacariasmi Juda lawpi hinaspa Jerusalen llaqtapi *f**yachaq judiokunaman willarqaku Israel kamachiq Diosninkupa sutinpi.

² Chaymi Salatielpa churin Zorobabelwan Josadacpa churin Josuey kaqllamanta qallarirqaku Jerusalen llaqtapi Diospa templon rurayta, paykunataqa yanaparqakum Diosmanta willakuqkunapas.

³ Chay tiempopim paykunaman rirqaku Eufrates Mayupa waklawninpi gobiernaq Tatnaiwan Setar-boznai compañaqninkunapiwan, paykunam nirqaku: —¿Pitaq kamachisurqankichik kay templota kaqllamanta hatarichinaykichikpaq hinaspa kay perqakunatapas qespichinaykichikpaq? —nispa.

⁴ Hinaptinmi willarqaniku chay templo hatarichiq runakunapa sutinkunata.

⁵ Aswanqa Diosniykum judiokunapa kamachiqninkunata waqaychawarqaku, hinaptinmi hinalla rurarqaniku Rey Darioman willachiptiyku cartamuwanankukama.

⁶ Eufrates Mayupa waklawninpi gobiernaq Tatnaimi, Setar-boznaipiwan hinaspa Eufrates Mayupa waklawninpi kamachikuqmasinkunapiwan Rey Darioman cartarqaku.

⁷ Chay apachisqanku cartam kaynata nirqa: Reyllayku Dario, rimaykamullaykikum.

⁸ Yachayá, ñoqaykum rirqaniku Juda lawpi kaq hatun Diospa templonman, chay templotam hatun labrasqa rumikunawan hatarichichkanku, perqankunapas ñam vigakunawan churasqaña kachkan, apurawllamanña rurasqankuraykum temploqa qespiykuchkanña.

⁹ Tapurqanikum kamachikuqkunata: “¿Pitaq kamachisurqankichik kay templota hatarichinaykichikpaq chaynataq kay perqankunatapas qespichinaykichikpaq” nispa.

¹⁰ Paykunapa sutinkutapas tapurqanikum qanman willamunaykupaq, paykuna kamachiq runakunapa sutinkunatapas tapurqanikum qanman qellqamunaykupaq.

¹¹ Paykunam niwarqaku: “Ñoqaykuqa kaniku hanaq pachapi chaynataq kay pachapipas munaychakuq Diospa serviqninkunam. Kay mosoqmanta hatarichisqayku temploqa ñawpaqmantaraqmi rurasqa karqa, chaytaqa Israel nacionpi hatun reymi rurachispan qespichirqa.

¹² Ichaqa hanaq pachapi munaychakuq Diosta abueloyku piñachisqanraykum paykunata qoykurqa Caldea lawmanta kaq Babilonia nacionpa reynin Nabucodonosorman. Chay reymi chay templota tuñichispan presochasqata Babilonia lawman paykunata pusarqa.

¹³ Chaywanpas Babilonia nacionpa reynin Cirom gobiernay qallarisqan watapi, kikinpuni kamachirqa Diospa kay templon mosoqmanta rurasqa kananpaq.

¹⁴ “Chay rey Nabucodonosormi Jerusalen llaqtapi Diospa templonmanta horqorurqa qori-qollqemanta serviciokunata hinaspam Babilonia llaqtapi templonman churarurqa. Chay serviciokunatam Rey Ciro horqorurqa Babilonia llaqtapi templomanta hinaspam qoykachirqa Sesbasarman, paytam churarqa prefecto kananpaq.

¹⁵ Rey Cirom Sesbasarta kamachirqa: ‘Jerusalen llaqtaman rispaykiyá Diospa templonta mosoqmanta maymi kasqanpi hatarichimuy hinaspayá chay temploman churamuy kay serviciokunata’ nispa.

¹⁶ Sesbasar rispanmi Jerusalen llaqtapi Diospa templonpa cimientonkunata churarqa, chaymantapunim kunankama temploqa perqachikuchkan ichaqa manaraqmi qespichisqachu kachkan” nispa.

¹⁷ Chaynaqa reyllayku, allinpaq rikchakapusuptikiqa, maskachiyá reykunapa rurasqanmanta willakuq librokunapi, chay librokunaqariki kachkan Babilonia llaqtapim, qawaykuyá cheqapchu Rey Ciro kamachisqa kay Jerusalen llaqtapi Diospa templon mosoqmanta hatarichisqa kananpaq, chayna kaptinqa, reyllayku, willachimuwaykuyá kay asuntomanta munasqaykita.