Esdras 3 - Quechua Ayacucho Bible 1987

Dios adorananku altarta huktawan hatarichisqankumanta

¹ Qanchis kaq killa chayaramuptinmi Israelpa castan llapallan runakuna llaqtankupiña kachkaspa chulla runa hinalla huñunakururqa Jerusalen llaqtapi.

² Hinaptinmi Josadacpa churin Josuey, sacerdotemasinkunapiwan, Salatielpa churin Zorobabelpas ayllunkunapiwan hatarichirqaku Israelpa yupaychasqan Diospa altarninta, chaypa hawanpi Diospaq animalkunata wañuchispankum lliwta kañapurqaku imaynam Diospa runan Moisespa yachachisqanman hina.

³ Hatarichirqakumá allin tiyaq altarta, chaynataqa rurarqaku chay allpapi runakunata manchakusqankuraykum, chaypa hawanpim Tayta Diospaq animalta wañuchispanku lliwta kañaqku sapa tempranon hinaspa sapa tarden.

⁴ Rurarqakutaqmi Ramada sutiyoq hatun fiestatapas imaynam qellqasqaman hina, Diospaqpas animalta wañuchispankum lliwta kañaqku sapa punchaw. Costumbrenkuman hinamá haykam kañana kaqta sapa punchaw kañaqku.

⁵ Chaymantam animalkunata wañuchispanku Diospaq kañaqku sapa punchaw, kañaqkutaqmi llullu killa punchawpipas chaynataq Tayta Diospaq sapaqchasqa llapallan huñunakuy punchawpipas, kañaqkutaqmi pipapas kikinmanta Tayta Diosman llapallan ofrecey munasqankutapas.

⁶ Qanchis kaq killapa punta punchawninmantam qallarirqaku Tayta Diospaq animalta wañuchispa lliw kañapuyta, ichaqa Tayta Diospa templonpa cimientonkunaqa manaraqmi churasqachu karqa.

⁷ Qollqetam qorqaku albañilkunamanwan carpinterokunaman, qorqakutaqmi mikuytapas, tomanapaq kaqtapas hinaspa aceitetapas Sidon hinaspa Tiro llaqtayoqkunaman chaynapi Libano montemantaraq lamar qochanta Jope llaqtakama cedro kullukunata apamunankupaq. Chaytaqa rurarqaku Persia nacionpi Rey Ciropa munasqanman hinam.

Diospa templon cimientasqankumanta

⁸ Iskay wataña Jerusalen llaqtapi Diospa templonman chayasqanku hawañam chay iskay kaq watapa iskay kaq killanpi Salatielpa churin Zorobabel Josadacpa churin Josueypiwan hinaspa paykunapa ayllunkunapiwan qallaykurqaku Diospa templon hatarichiyta. Chay runakunam karqa sacerdotekuna, Leviy castakuna chaynataq Babilonia nacionpi llapallan presochasqa kasqankumanta Jerusalen llaqtaman kutimuqkuna. Chay templo ruraypaqmi Leviy casta runakunata iskay chunka watayoqmanta hanayman churarqaku chay obrata rurachinankupaq.

⁹ Josueymi churinkunawan hinaspa ayllunkunawan chaynataq Hodaviaspa mirayninmanta Cadmielpa churinkunapiwan chulla runa hinalla rirqaku Diospa templonpi llamkaqkunata llamkachinankupaq. Chaynatam rurarqa Henadadpa churinkunapiwan hinaspa ayllunkunapiwan, paykunaqa karqa Leviy ayllumanta kaq runakunam.

¹⁰ Tayta Diospa templonpa cimientonta albañilkuna churachkaptinkum sacerdotekuna chaypaq hina pachasqakama cornetillata aptarikuspanku sayarirqaku. Leviy castamanta Asafpa mirayninkunapas sayarirqakutaqmi platillontinkama Tayta Diosta alabanankupaq, chaynataqa rurarqaku Israel nacionpa reynin Davidpa kamachikusqanman hinam.

¹¹ Takiqkunam alabaspanku hinaspa Tayta Diosman graciasta qospanku takirqaku: Payqa ancha allinmi, Payqa Israel casta runakunata wiñaypaq kuyapayaqmi Llapallan runakunam hatun kusikuywan qaparispa Tayta Diosta alabarqaku, chaynataqa takirqaku Tayta Diospa templonta cimientasqankuraykum.

¹² Chaypim tarikurqaku sacerdotekuna, Leviy castakuna chaynataq ayllukunapa achka jefenkunapas, paykunamanta machuña kaqkunam rikurqaku punta kaq templota, chayraykum chay templopa cimientonkuna churasqa kasqanta rikuspanku qaparillawanña waqarqaku, wakinkunañataqmi kusikuymanta qaparirqaku.

¹³ Runakuna nisyullataña qaparisqankuraykum mana pipas reqsiyta atirqachu mayqenmi kusikuywan qapariy kasqanta otaq mayqenmi waqaywan qapariy kasqanta. Chay qaparisqankum karusukama uyarikurqa.