Efesios 3 - Quechua Ayacucho Bible 1987

Mana judio kaqkunamanpas Pablopa willakusqanmanta

¹ Ñoqa Pablom Jesucristorayku preso kachkani mana judio kaqkunapa allinnikichikpaq.

² Yachankichikñachusmi Dios favorecewaspa qamkunaman willanaypaq kamachiwasqantaqa.

³ Diosmi reqsichiwarqa pakasqa kaqkunata, chaykunamantaqa ñawpaqtaraqmi asllatapas qellqamurqaykichikña.

⁴ Chayta leespaykichikmi cuentata qokunkichik Cristomanta pakasqa kaqkuna yachasqayta.

⁵ Kaykunataqa ñawpaq tiempopi runakunamanqa Diosqa manam reqsichirqachu, kunanmi ichaqa akllasqan *f**apostolninkunaman hinaspa paymanta willakuqkunaman Espirituntakama reqsichin.

⁶ Pakasqa kaqkunaqa kaymá: Jesucristomanta allin noticiawanmi mana judio kaqkuna judiokunapa herencia chaskiqmasinña rikurirun, paykunawan hukllaña kasqankuraykum Cristo Jesuspi Diospa promesan chaskiqmasinña karunku.

⁷ Favorninraykullam atiyninwan Dios churaykuwarqa Jesucristomanta allin noticiakunata willakunaypaq.

⁸ Llapallan iñiqkunamanta mana valeqpaq hapikuchkaptiypas ñoqataraqmi Dios favoreceykuwarqa mana *f**judio kaqkunaman Cristomanta hatun valorniyoq pakasqa kaq allin noticiata willakunaypaq.

⁹ Tukuy imapas unanchaq Diosmi qallariymantapuni kikillanpaq waqaychakusqanta yachaykachiwarqa, pakasqa kaqtam kunawarqa llapallanman willakunaypaq.

¹⁰ Chaynapim altokunapi atiyniyoqkunapas hinaspa munaychakuqkunapas iñiqkunata hukllamanña huñunasqata qawaspanku yachanqaku Diosninchikqa mana haypay atina yachayniyoq kasqanta.

¹¹ Diosmá ñawpaqmantapuni imam munasqanta Señorninchik Jesucristowan rurarqa.

¹² Jesucristoman iñiywan hapipakuspallam Diosmanqa asuykunchik mana manchakuspa.

¹³ Chaynaqa qamkunarayku ñakarisqaywanqa amayá hukmanyaruychikchu, chayqa aswanraq alabakunaykichikpaqmi.

Cristopa kuyawasqanchikmanta

¹⁴ Chayraykum qonqorakuykuspay Dios Taytanchikta mañakuchkani.

¹⁵ Paypa sutintam apan hanaq pachapi llapallan kaqkunapas chaynataq kay pachapi llapallan kaqkunapas.

¹⁶ Taytanchiktam mañakuchkani hatu-hatun kayninman hina Espiritunpa atiyninwan sonqoykichikta kallpanchananpaq.

¹⁷ Chaynapim confiakuptikichik sonqoykichikpi Cristo kanqa hinaptinmi allin sapichakusqa hina hinaspa ukuneqpi cimientasqa hina kuyanakuypi takyankichik.

¹⁸ Mañakuchkanitaqmi llapallan iñiqkunawan kuska Cristopa kuyawasqanchikta entiendenaykichikpaqpas, paypa kuyakuyninqa tupuyta atiptinchikpas kanman mayna anchoch, mayna largoch, mayna ukuch hinaspa mayna hatuncha.

¹⁹ Mañakuchkanitaqmi imawanpas mana tupachiy atina Cristopa kuyakuyninta yachanaykichikpaqpas chaynapi Dioswan huntasqa kanaykichikpaq.

²⁰ Chaynaqa Diosllatayá hatunchasun, payllam ñoqanchikpiqa atiyninwan ruran mañakusqanchikmantapas hinaspa piensasqanchikmantapas aswan llimparichkaqtaraq.

²¹ Llapallan iñiqkunayá Jesucristorayku Diosta hatunchasun wiña-wiñaypaq.