Eclesiastés 9 - Quechua Ayacucho Bible 1987

Runakunaqa wañuqlla kasqanmanta

¹ Llapa chaykunata estudiaruspaymi yacharuni: Allin ruraqkunapas chaynataq yachayniyoqkunapas rurasqankupiwanmi Diospa makillanpi kachkan. Runaqa manam yachanchu kuyakuypas otaq cheqnikuypas payman hamunanta.

² Llapallantam hina kaqlla pasan. Allin ruraqtapas hina kaqlla pasan. Mana allin ruraqtapas hina kaqllam pasan. Allin runatapas hina kaqllam pasan. Mana allin runatapas hina kaqllan pasan. Diospa chaskisqan runatapas hina kaqllam pasan. Hina kaqllam pasan Diospa mana chaskisqan runatapas, Diospaq animal wañuchipuqkunatapas, Diospaq animal mana wañuchipuqkunatapas. Huchayoq runatapas hina kaqllam pasan. Mana huchayoq runatapas hina kaqllam pasan. Juraq runatapas, juray manchakuqtapas hina kaqllam pasan.

³ Kay mana allinmi pasakun kay pachapi lliw ruraykunapi: Llapallantam hina kaqlla pasan. Llapa runakunapas piensan mana allinllatam, wañunankukaman loco hina rurayllapi piensanku, chaymantañam rinku wañuqkunapa kasqanman.

⁴ Kanraqmi esperanza kawsaq runapaqqa. Wañusqa leonmantaqa kawsaq allqom aswan allinqa.

⁵ Wañunanmantam yachanku kawsaqkunaqa. Manam imatapas yachanchu wañuqkunaqa. Ima pagotapas manam chaskinchu wañuqkunaqa. Manam pipas yuyarinkuñachu wañuqkunamantaqa.

⁶ Tukurunñam kuyakuyninqa. Tukurunñam cheqnikuyninqa. Tukurunñam sientekuyninpas. Kay pachapi tukuy ruraykunapiqa manañam kanqachu ima rurananpas.

⁷ Mikunaykitayá mikuy kusikuywan. Vinoykitayá tomay sonqomanta kusikuywan. Diosqa agradakunmi rurasqaykikunawan.

⁸ Tukuy tiempo yuraq pachallawan pachakuy. Miski asnaq aceiteta umaykiman tukuy tiempo hinakuy.

⁹ Kuyasqayki warmikiwanyá vidata pasay tukuy tiempoqa. Kay pachapi chinkaruq waspiy hinallam Diospa qosusqayki vidaykiqa. Chayna allin kawsakuyllam sasa llamkasqaykipa pagonqa.

¹⁰ Kallpaykiman hina ruray ima ruranaykitapas. Wañuruspaqa manañam rurankichu imatapas. Manañam piensankichu imatapas. Manañam yachankichu imatapas. Manañam yuyankichu imatapas.

Runakuna ukupi engañokuna kasqanmanta

¹¹ Kay pachapim kaykunatapas rikurqanitaq: Manam apurawman kallpaqchu carrerapiqa ganan. Manam valeroso soldadochu guerrapiqa ganan. Mana yachayniyoq runapaqpas pisinmanmi mikuyqa. Entiendeq runapaqpas pisinmanmi qori-qollqeqa. Yachaysapa runapaqpas pisinmanmi favorqa. Aswanqa sapakamapaqmi hamun tiempon. Aswanqa sapakamapaqmi hamun suerten.

¹² Runapas wañunan horamantaqa manam yachanchu. Challwapas mallapa hapirunanmantaqa manam yachanchu. Urpitupas toqllapa hapirunanmantaqa manam yachanchu. Chaynam runapas mana allin horapi wañunanmanta mana yachanchu. Qonqayllamanta hapirachikuspan wañurunantam mana yachanchu.

Yachayniyoq kaymi imamantapas aswan allinqa

¹³ Kay pachapim rikurqanitaq hatunpaq rikchakapuwaq kay yachayta:

¹⁴ Karqam aslla runayoq taksa llaqtacha. Chaypa contranpim ancha atiyniyoq rey hamuruspan muyuriqninpi hatun perqata hatarirachirqa vencenanpaq.

¹⁵ Chay llaqtachapim karqa yachayniyoq wakcha runa. Paymi yachayninwan chay llaqtachata librarurqa vencesqa kananmanta. Ichaqa manam pipas paymanta yuyarirqachu.

¹⁶ Chaymi nini: Valeroso kaymantapas aswan allinqa yachayniyoq kaymi. Chaywanpas wakcha runapa yachayninqa despreciasqam, nisqankunataqa manañam pipas kasuyta munankuchu.

¹⁷ Sonso runakunapa reyninpa qaparkachasqan uyarinamantaqa, yachayniyoqpa hawkalla rimasqan uyariymi aswan allinqa.

¹⁸ Guerrapaq armakunamanta aswan allinqa yachayniyoq kaymi. Huk huchallikuq runaqa achka allinkunatapas pierderachinmanmi.