Eclesiastés 8 - Quechua Ayacucho Bible 1987

¹ ¿Pitaq yachayniyoq runa hinaqa kanman? ¿Pitaq imakunamantapas entiendeqqa kanman? Runapa yachayniyoq kayninqa uyantam kancharichin. Qaqchu uya kaynintam tikraykun.

Rey kasukuymanta

² Diospa qayllanpi jurasqaykiman hinayá reypa kamachikusqanta kasukuy.

³ Reypa qayllanmantaqa amayá utqayman lloqsiychu. Amataqyá mana allinmanqa sayapakuychu. Reyqa imam munasqantam ruran.

⁴ Reypa nisqanqa atiyniyoqmi. ¿Pitaq payta ninman: “¿Imatataq rurachkanki?” nispa?

⁵ Kamachikuy kasukuqtaqa manam pasanqachu imapas. Yachayniyoq runaqa yachanmi haykapim ruraytapas. Yachayniyoq runaqa yachanmi imaynam ruraytapas.

⁶ Imapas munaruyqa tiempoyoqllam. Imapas munaruyqa imaynam ruranallam. Runapa sasachakuyninqa llumpayllañam.

⁷ Runaqa manam yachanchu imapas pasananta nitaqmi pipas willanchu imaynam pasananta.

Kawsaymantawan wañuymanta

⁸ Manam pipas dueñochu vidanwanqa chaynapi vidanta hatallinanpaqqa. Manataqmi pipas harkakunmanchu wañunan punchawtaqa. Chay wañuymantaqa manam pipas librakunmanchu. Mana allin ruraqtaqa huchanqa manam lluptichinqachu.

⁹ Kay pachapi llapa ruraykunamanta yachanaypaq churakuykuspaymi tukuy kaykunata rikurqani: Kanmi runapaq tiempo runamasinmanta munaychakuspa ñakarichinanpaq.

Chunkaruq waspiy hinalla kaqkunamanta

¹⁰ Rikurqanim mana allin ruraqkuna allin pampasqa kasqankuta. Rikurqanitaqmi Diospa agradonpaq kawsaqkunañataq llaqtapi qonqasqa kasqankuta. Paykunaqa Diospa templonmanpas yaykuspam lloqsimuqku. Chaypas chinkaruq waspiy hinallam.

¹¹ Runata mana allin rurasqanmanta mana chaylla castigasqankuraykum, wakin runakunapas sonqonkupi chaylla kachkanku mana allinta ruranankupaq.

¹² Huchallikuq runaqa pachak kutita mana allinta rurachkaspapas unaytam kawsakun. Chaywanpas ñoqam yachani: Dios respetaq runakunaqa payta respetasqankuraykum allin kanqaku.

¹³ Mana allin ruraqkunam ichaqa mana allinlla kanqaku. Diosta mana respetasqankuraykum vidanku tukurunqa llantuy hinalla.

¹⁴ Kaypas kay pachapi chinkaruq waspiy hinallataqmi: Kanmi allin ruraq runakuna ichaqa mana allin ruraq runakuna hinam ñakarinku. Kantaqmi mana allin ruraq runakunapas allin ruraqkuna hina gozakuqkuna. Chaypas chinkaruq waspiy hinallam.

¹⁵ Chaymi kusikuy vida allin kasqanmanta rimarini: Runapaq allinqa kanman mikukuyllam, tomakuyllam chaynataq kusikuyllam. Chaykunallamiki kay pachapi Diospa qosqanqa, watakunapi llamkasqanmanta kusichiqninqa.

¹⁶ Ñoqam churakuykurqani yachayta reqsinaypaq hinaspa kay pachapi ruraykunatapas qawanaypaq. Kanmi runa tutapas-punchawpas mana puñunayachikuq.

¹⁷ Diospa tukuy rurasqankunata qawaspaymi cuentata qokuruni: Runaqa manam entiendeyta atinmanchu kay pachapi rurasqa kaqkunamanta, entiendenanpaq maynataña maskaspanpas manam runaqa tarinqachu. Ichapas yachayniyoq runa ninman: “Ñoqam ichaqa yachaniña” nispa. Ichaqa manam cheqaptachu entienderun.