Eclesiastés 7 - Quechua Ayacucho Bible 1987

Yachayniyoq runamantawan sonso runamanta

¹ Miski asnaq olormantapas aswan allinqa honorniyoq kaymi. Runapa nacesqan punchawmantapas aswan allinqa wañukusqan punchawmi.

² Convido wasiman riymantaqa wañuchikuqpa wasinman riymi aswan allinqa. Wañuywanmi llapa runa tukurunku. Kawsaq runakunapas chaymantam piensarinanku.

³ Runapa asikusqanmantaqa llakisqa kasqanmi aswan allinqa. Llakiqa runapa uyantam hukmanyachin ichaqa paypa sonqontam allinyachin.

⁴ Yachayniyoq runakunaqa wañuymantam piensarinku. Sonso runakunam ichaqa kusikuyllamanta piensanku.

⁵ Sonso runakunapa takisqan uyariymantaqa yachayniyoqkunapa qaqchakusqan uyariymi aswan allinqa.

⁶ Sonsopa asikusqanqa tullpapi kichkapa toqyasqan hinallam. Chaypas chinkaruq waspiy hinallam.

⁷ Yachayniyoq runa pitapas ñakarichispaqa sonso runa hinam rurachkan. Yanqamanta regalota chaskikuq runaqa sonqontam mana allinman tikrachkan.

⁸ Ima asuntopapas qallariyninmantaqa chay asuntopa tukupayninmi aswan allinqa Pay tukuq runamantaqa anaq piñakuq runam aswan allinqa.

⁹ Ama chaylla piñakuruq kaychu. Chayna kaspaqa manam kanki yachayniyoqchu.

¹⁰ Ama haykapipas niychu: ¿Imanasqataq ñawpaq tiempokunaqa kunan tiempomantapas aswan allin karqa? nispaykiqa. Manam yachayniyoq hinachu tapukuchkanki chaynataqa.

¹¹ Herenciayoq hinaspa yachayniyoq runaqa favorecenmanmi kay pachapi runakunataqa.

¹² Yachayniyoq runataqa yachayninmi defienden. Chaynataqmi kapuqniyoqtapas qollqen defienden. Chaywanpas yachayniyoq kaymi aswan allinqa. Yachayninmi allinta kawsachin chay runataqa.

¹³ Qawaykuy Diospa rurasqanta. ¿Pitaq derechanman paypa qewisqanta?

¹⁴ Allin punchawkuna tupasuptikiqa chayraykuyá kusikuy. Sasachakuykuna hamusuptikiñataq kaynata piensariy. Chaykunataqa iskaynintapas Diosmi rurarun. Hamuq punchawkunamanta runa mana yachananpaqmi chaynataqa rurarun.

¹⁵ Chinkaruq waspiy hinalla kawsakusqaypim tukuy kaykunata rikurqani: Allin ruraq runapas wañunmi allinta rurachkaspanpas. Mana allin ruraqpas unaytam kawsakun mana allinta rurachkaspanpas.

¹⁶ Amayá alli-allin runaqa kaychu. amataqyá llumpay yachaysapapas kaychu. ¿Imanasqataq kikillayki tukuypaq-tukunki?

¹⁷ Amayá llumpay mana allin ruraqqa kaychu. Amataqyá llumpay sonsoqa kaychu. ¿Imanasqataq manaraq tiempoykipiqa wañuyta munanki?

¹⁸ Allinmi huknin hapiynikipas chaynataq huknin mana dejaynikipas. Dios respetaq runaqa iskayninmantam lloqsinqa.

¹⁹ Llaqtapi gobiernaq chunka runakunamantapas mastaqa yachayninmi kallpanchan yachayniyoq runataqa.

²⁰ Kay pachapiqa manam hukllapas kanchu allin ruraq runaqa. Manam kanchu allinllata ruraspa mana huchallikuq runaqa.

²¹ Ama creeychu llapa rimasqankuta, chaynapim mana uyarinkichu serviqnikipa rimakususqaykita.

²² Qampas allintam yachanki. Achka kutitam runamasikimanta rimakurqanki.

Yachayniyoq karuy munaymanta

²³ Yachayniywanmi tukuy chaykunata pruebarqani. “Yachayniyoq kanaypaqmi munarqani ichaqa mana haypay atina kasqantam cuentata qokuruni.

²⁴ Yachayqa imamantapas aswan karupiraqmi kasqa. Mana pipapas entiendey atinan sasa-sasam kasqa.

²⁵ Chaymi yachayniyoq hinaspa entiendeq kanaypaq estudiarqani. Yuyayniyoq hinaspa razonniyoq kanaypaqmi maskarqani chaynapi sonso kayqa mana allin kasqanta yachanaypaq, chaynapi sonso kayqa loco hina kasqanta yachanaypaq.

²⁶ Chaymi tarirurqani aswan llaki apamuqqa mana allin warmi kasqanta. Paypa sonqonqa toqlla hinam makinkunapas chaqnaq cadena hinam. Diospa agradonpaq kawsaqllam chay warmimantaqa lluptinqa. Huchallikuq runam ichaqa chay warmiwan presocharachikunqa.

²⁷ Ñoqa yachachiqmi sapa asuntopa imam kasqanta entienderuspay tariruni kayta:

²⁸ ¡Manaraqmi tariniraqchu maskasqayta! Waranqa qarikunamantam tariruni Diospa agradonpaq kaqqa huk qarilla kasqanta, chulla qarilla confiakunapaq kasqanta. Ichaqa chulla warmitapas manam tarinichu llapallan warmikunamanta.

²⁹ Aswanqa kayllatam tariruni: Runataqa Diosmi unancharqa munasqanman hina ruraqta, ichaqa mana allin piensaymanmi qokurunku pasaypaqta.