Eclesiastés 6 - Quechua Ayacucho Bible 1987

¹ Rikurqanitaqmi kay pachapi runakunapaq llumpay sasa kaqta:

² Diosmi qon wakin runaman qori-qollqetawan tukuy imata chaynataq reqsisqa kaytapas. Manataqmi sonqonpa tukuy ima munasqantapas faltachinchu, ichaqa Diosmi mana provechachinchu chaykunamanta gozakunanpaq, aswanqa chay runapa mana reqsisqan runañam provechakun. Chaypas chinkaruq waspiy hinallam chaynataq onqoy hina mana allinllam.

³ Sichu runa pachak churiyoq kanman hinaspa unay watata kawsanman, ichaqa achka watata kawsakuspanpas allin kaqmanta mana gozakuptinqa chaynataq sepulturallapipas mana pampasqa kaptinqa, ñoqam chay runamanta nini: “Abortasqa wawam paymanta aswan allinqa” nispa.

⁴ Abortasqa wawaqa yanqapaqmi nacemun. Tutayayllapim chinkarunpas. Tutayayllapitaqmi sutinpas qonqasqa kanqa.

⁵ Chay abortasqa wawaqa intita mana rikuchkaspapas chaynataq mana imata yachachkaspapas, chay runamanta aswan hawkaraqmi samakunqa.

⁶ Chay runa allin kaqmanta mana gozakuspan iskay waranqa watataña kawsaptinpas ¿manachu iskayninku chulla sitiollaman rinqaku?

⁷ Mikunallanpaqmi ñakariywan llamkan runaqa. Ichaqa manam sonqonpas tiyanchu mikusqanwanqa.

⁸ Yachayniyoq runaqa ¿imapitaq masyan sonso runataqa? Wakcha runataqa ¿imapaqtaq servinman runamasinwan kawsasqanqa?

⁹ Runapa rikusqanmi aswan allinqa paypa imapas munarusqanmantaqa. Chaypas chinkaruq waspiy hinallam. Wayrata hapirunapaq qatikachay hinallañam.

¹⁰ Kunan kaqqa ñawpaqmantaraqmi sutiyoqña karqa. Runapa kasqanqa ñam yachasqaña karqa. Manam pipas atipanakunmanchu paymanta aswan atiyniyoq runawanqa.

¹¹ Achka rimaykunaqa mirarachinmi mana valeq kaqkunatapas. Chayna rimaymantaqa ¿provechanmanchu imallatapas?

¹² Chinkaruq waspiy hinallam runapa pisi watakuna kawsasqanqa, chay watankunaqa pasarunpas llantuy hinallam. Runapa kawsakusqanpi imapas allin kasqantaqa ¿pitaq yachan? Paypa wañukusqanpa qepantaqa ¿pitaq willanman kay pachapi pasaqkunamanta?