Eclesiastés 5 - Quechua Ayacucho Bible 1987

Cumplinapunim prometekusqanchiktaqa

¹ Diospa templonman yaykuspaykiqa kasukunaykipaqyá asuykuy. Amayá sonso runakuna hinaqa ruraychu. Paykunam animal wañuchisqanku kañasqa ofrendata presentanku ichaqa manam yachankuchu chay rurasqankuqa mana allin kasqanta.

² Amayá mana piensarispaqa apurawman rimaychu. Amayá hawanpi-ukunpiqa Diosman prometekuychu. Diosqa kachkan hanaq pachapim. Qamqa kachkanki kay pachapim. Amayá llumpaytaqa rimaychu.

³ Pensamientopa intusqan kayqa muspayllatam apamun. Llumpay rimayqa sonsopa rimanallantam apamun.

⁴ Diosman prometekuspaykiqa ama unaspayá cumpliypuni. Sonso runakunaqa manam payta agradanchu. Chaynaqa cumpliypuniyá prometekusqaykita.

⁵ Prometekuspa mana cumplinaykimanta aswan allinqa kanman mana prometekuymi.

⁶ Amam rimaynikiqa huchallichisunkichu chaynapi prometekusqaykita apaq hamuptin: “Pantarurqanim” nispa ama ninaykipaq. ¿Imapaqtaq rimasqaykikunawanqa Diosta piñachiwaq chaynapi rurasqaykikunata chinkarachinanpaq?

⁷ Achka muspayqa hinaspa achka rimayqa chinkaruq waspiy hinallam, qamyá ichaqa Diosta respetay.

Riquezakunaqa mana valesqanmanta

⁸ Huk kaqnin llaqtapi wakchakunata autoridad ñakarichisqanta qawaspaykiqa chaynataq allin arreglota derechonpi mana ruraptinkuqa amayá admirakuychu. Chay autoridadpa hawanpim kachkan aswan huk autoridad, paykunapa hawanpipas hukkunaraqmi kachkan.

⁹ Chaywanpas allpapa rurunqa llapallanpaqmi. Kikin reypas allpapa rurunwantaqmi mantienekun.

¹⁰ Qollqe kuyaq runaqa maynaña qollqewanpas manam contentakunmanchu. Achka imayoqpas kayta munaqqa manam contentakunmanchu. Chaypas chinkaruq waspiy hinallam.

¹¹ Runapa kapuqninkuna miraruptinqa provechaqninkunapas mirantaqmi. Manam imatapas horqokunchu dueñonqa. Gustotaqa tarin qawasqallanwanmi.

¹² Asllata otaq achkata mikuspanpas miskitam puñukun llamkakuq runaqa. Achka kapuqninkunaraykum mana puñunchu apu runaqa.

¹³ Onqoy hina mana allintam kay pachapi rikurqani. Qori-qollqe waqaychayqa hatalliqninpa mana allinninpaqmi.

¹⁴ Chay kapuqninkunataqa mana allin negociopim yanqacharun. Hinaptinmi churin kaqpas mana imayoqña rikurirun.

¹⁵ Mamanmanta naceq wawaqa manam imatapas apamunchu. Chaynam wañukuqpas llamkasqanpa pagontaqa mana apanqachu.

¹⁶ Kaypas onqoy hina mana allinmi. Imaynam kay pachaman hamurqa. Chaynam kasqallan kutikunqa. Llamkasqanmantam mana horqonchu imatapas. Wayrapa aparunallanmi llamkasqanpas.

¹⁷ Chaymantapas kawsanankamam tutayayllapi mikun. Afanllawanmi, onqoyllawanmi, rabiallawanmi mikun.

¹⁸ Sumaqtaqa rikchakapuwan kaymi: Runapaq allinqa kanman mikukuyllam, tomakuyllam chaynataq Dios kawsachinan punchawkama ñakariywan llamkasqanmanta kusikuyllam. Chayllam paypa pagonqa.

¹⁹ Diosqa pimanpas qonmi qori-qollqetawan tukuy imata. Payllataqmi runamanqa qon chaykunamanta mikunanpaq, pagonta chaskinanpaq chaynataq ñakariywan llamkasqanmanta kusikunanpaqpas.

²⁰ Runata kusikuyllapi Dios kawsachisqanraykum, runataqa vidanmanta mana pasaypaq imapas qokunchu.