Eclesiastés 4 - Quechua Ayacucho Bible 1987

¹ Qawarispaymi kay pachapi tukuy ñakariyta rikurqani: Ñakariqkunam waqanku ichaqa manam pipas consuelaqnin kanchu. Atiyniyoqkunam ñakarichinku ichaqa manam pipas consuelaqnin kanchu.

² Kawsaqkunamantapas aswan allinqa wañuqkunam. Kunankama kawsaqkunamantapas allinqa wañukuqkunam.

³ Kay pachapi mana allinkunata manaraq rikusqankuraykum, wañuqkunamantapas aswan allinqa manaraq nacemuqkuna. Kay pachapi mana allinkunata manaraq rikusqankuraykum, kawsaqkunamantapas aswan allinqa manaraq nacemuqkuna.

⁴ Rikurqanitaqmi tukuy llamkayqa hinaspa tukuy imapa allin qespisqanqa runakuna envidiachisqanta. Chaypas chinkaruq waspiy hinallam, wayrata hapirunapaq qatikachay hinallam.

⁵ Sonso runaqa makinkunatam chupqakuykun. Chaynapim wakchayayman wichikuykun.

⁶ Ñakariywan llamkaspa iskaynin makinpi imayoqpas runamantaqa otaq wayrata hapirunanpaq qatikachaq runamantaqa hawkayaypi kawsakuspa huknin makillanpi kapuqniyoq runam kanman aswan allinqa.

⁷ Yapatawan qawarispaymi kay pachapi rikurqani huk chinkaruq waspiy hinalla kaqta:

⁸ Kanmi runa mana piyniyoq, mana churiyoq, mana wawqeyoq. Ichaqa mana samaykuspanmi llamkachkan. Apuyasqanwan mana contentakuspanmi llamkachkan. Manam tapukunchu: “¿Pipaqtaq ñoqaqa ñakariywan llamkani?” nispa. “¿Imanasqataq vidaypiqa mana kusikunichu?” nispa. Chaypas chinkaruq waspi hinallam chaynataq sasa llamkayllam.

Huklla kaspaqa atisunmi

⁹ Chulla runalla kanamantaqa iskay runam aswan allinqa. Iskayninkum llamkasqankumanta chaskinqaku. Aswan mastam pagonkuta chaskinqaku.

¹⁰ Iskayninkumanta huknin wichiykuptinqa hukninmi wichiqta hatarichinqa. Ichaqa ¡imaynaraq kallanman sapallan wichiykuq runaqa! Wichiykuptinqa manam pipas, hatarichinqachu paytaqa.

¹¹ Qonichinakunkum iskay puñuqkunaqa. ¿Piwantaq qonichinakunman sapallan puñuqqa?

¹² Vencerachikunmanmi chullalla runaqa ichaqa defiendekunmankum iskay runaqa. Manam facillataqa tipirunmankuchu kimsa pata qaytutaqa.

Yachayniyoq kayqa manam yuyaq runakunallapaqchu

¹³ Allin consejokunata mana chaskiq machuyasqa sonso reymanta aswan allinqa yachayniyoq wakcha mozom.

¹⁴ Chayna mozoqa carcelmanta lloqsiruspanpas otaq nacionpi wakcha nacespanpas gobiernanmanmi.

¹⁵ Kay pachapi kawsaspa puriqkunatam rikurqani reypa rantinpi kaq mozopa favorninpi kasqankuta.

¹⁶ Manaña yupay atina yanapaqnin runakuna kaptinpas qepa wiñaykunaqa manam paymanta contentochu karqaku. Chaypas chinkaruq waspiy hinallam. Wayrata hapirunapaq qatikachay hinallam.