Eclesiastés 3 - Quechua Ayacucho Bible 1987

Tukuy imam tiempoyoqlla

¹ Kay pachapiqa tukuy imam tiempoyoqlla. Imapas munaruyqa tiempoyoqllam.

² Kanmi nacenapaq tiempo. Kanmi wañunapaq tiempo. Kanmi plantanapaq tiempo. Kanmi platasqa horqonapaq tiempo.

³ Kanmi wañuchinapaq tiempo. Kanmi hampinapaq tiempo. Kanmi tuñichinapaq tiempo. Kanmi hatarichinapaq tiempo.

⁴ Kanmi waqanapaq tiempo. Kanmi asinapaq tiempo. Kanmi lutokunapaq tiempo. Kanmi tusunapaq tiempo.

⁵ Kanmi rumikuna cheqechinapaq tiempo. Kanmi rumikuna huñunapaq tiempo. Kanmi abrazanapaq tiempo. Kanmi mana abrazanapaq tiempo.

⁶ Kanmi maskanapaq tiempo. Kanmi chinkachinapaq tiempo. Kanmi waqaychanapaq tiempo. Kanmi wischunapaq tiempo.

⁷ Kanmi pacha llikinapaq tiempo. Kanmi pacha siranapaq tiempo. Kanmi upallanapaq tiempo. Kanmi rimanapaq tiempo.

⁸ Kanmi pitapas kuyanapaq tiempo. Kanmi pitapas cheqninapaq tiempo. Kanmi guerrapi peleanapaq tiempo. Kanmi hawkayaypi kanapaq tiempo.

⁹ ¿Imatataq runaqa horqokun ñakarispa llamkasqanmanta?

¹⁰ Diosmi runakunaman llamkayta qon chaypi llamkanankupaq, chaytam ñoqa qawarqani.

¹¹ Diosqa tukuy imatam tiempollanpi sumaqllataña rurarqa hinaspam runakunaman qorqa wiña-wiñaypaq kaqkunamanta piensanankupaq. Chaywanpas runaqa manam entiendeyta atinmanchu qallariyninmanta tukuyninkama Diospa rurasqantaqa.

¹² Yachasqayman hinaqa runapaqa manam imapas allinqa kanchu aswanqa kusikuyllam hinaspa kawsakunankama allin rurayllam.

¹³ Runapaq allinqa kanman mikukuyllam, tomakuyllam chaynataq llamkasqanmanta kusikuyllam. Tukuy chaykunapas Diosmantam hamun.

¹⁴ Yacharunitaqmi Diospa llapa rurasqankunaqa wiñaypaq kasqanta, chaymanqa manam pipas yapanmanchu nitaq pipas qechunmanchu. Chaykunatam Dios rurarqa runakuna payta respetananpaq.

¹⁵ Kunan sucedekuqmi ñawpaq tiempopi karqaña. Manaraq pasaqkunapas ñam sucedekurqaña. Pasaqtaqa Diosmi yapatawan kutichimunqaña.

Runakuna ukupi engañokuna kasqanmanta

¹⁶ Kay pachapim rikurqani: Allin arreglo kanan sitiopim mana allinta ruranku. Allin ruray kanan sitiopim mana allinta ruranku.

¹⁷ Chaymi sonqoypi piensarqani: “Allin ruraq runatapas Diosmi juzganqa. Mana allin ruraqtapas Diosmi juzganqa. Imapas munaruyqa tiempoyoqllam. Tukuy ima ruraypas Diospa qayllanpiqa tiempoyoqllam.

¹⁸ Ñoqam piensarqani: “Runakunataqa Diosmi entiendechin animalkunaman rikchakuq kasqankuta yachanankupaq.”

¹⁹ Runakunata imam sucedesqanmi animalkunatapas suceden. Runakuna hinataqmi animalkunapas wañun, chaynaqa runapapas chaynataq animalpapas samayninqa hina kaqllam. Runaqa manamá animaltaqa masyanchu. ¡Chaypas chinkaruq waspiy hinallam!

²⁰ Animalpas, runapas hina kaqllamanmi rinku. Llapallankum ñutu allpamanta rurasqa karqaku. Llapallankutaqmi ñutu allpaman kutiykunqaku.

²¹ ¿Pitaq yachan runakunapa espiritun altoman risqanta otaq animalpa espiritun allpaman yaykusqanta?

²² Chaymi cuentata qokuruni: Runapaq allinqa kanman llamkasqanmanta kusikuyllam. Llamkasqanmanta pagonqariki chaykunallam. Paypa qepan tiempopi pasaqtaqa ¿pitaq qawachinman paymanqa?