Eclesiastés 12 - Quechua Ayacucho Bible 1987

¹ Mozollaraq kachkaspaykiyá unanchaqnikimanta yuyariy. Mana allin tiempokuna manaraq hamuchkaptinyá paymanta yuyariy. Yanqañataqmi chay tiempokunapi niwaq: “Manañam gozakunaypaq tiempoñachu” nispa.

² Intipa achkiynin manaraq tutaykuruchkaptinyá qamqa yuyariy. Achkiypas manaraq chinkaruchkaptinyá qamqa yuyariy. Yuyariyá killapa achkiyninpas manaraq tutaykuruchkaptin. Yuyariyyá lucerokunapa achkiyninpas manaraq tutaykuruchkaptin. Yuyariyyá pararamuptin puyukunapas hinallaraq kachkaptin.

³ Machuyaruptikiqa waqaychasuqniki makikikunam katkatatanqa. Chay tiempopiqa kallpayoq piernaykikunam eqoyarunqa. Waqoykikunapas asllayarusqanraykum manaña kutanqachu. Ventanamanta qawaqkunapas manañam rikukunqachu.

⁴ Machuyaruptikiqa hawa lawman punkum wichqakurunqa. Molinopa qapariyninmi menosyarunqa. Urpitupa waqasqan hinallañam vozninpas rikurirunqa. Takinanpaq vozninpas pasaypaqtam menosyarunqa.

⁵ Altokunapi kaspam manchakunki. Ñanpi kaqkunatam manchakunki. Almendras sachapa sisan hinam soqoyarunqa chukchaykipas. Aqarway uru hinam sasallataña purinkipas. Llapa ima munanaykim chinkarunqa. Wañuq runaqa wiñaypaq *f**yachanan sitiomanmi rinqa. Wañukuqmanta waqaqkunam callenta waqastin rinqa.

⁶ Yuyariyá unanchaqnikimanta manaraq wañukuchkaspa, qollqe cadena hina manaraq tipiruchkaspa, qori tazon hina manaraq pakiruchkaspa, pukyupa patanpi puyñu hina manaraq pakiruchkaspa.

⁷ Ñutu allpamanta rurasqa cuerpoykim imam kasqan allpaman kutiykunqa. Espirituykiñataqmi qosuqniki Diosman kutiykunqa.

⁸ Yachachikuqmi nin: ¡Chinkaruq waspiy hinallam tukuy imaqa! ¡Pasaypaq chinkaruqllam tukuy imaqa!

Runapa imam rurananmanta

⁹ Yachachikuq runaqa manam yachayniyoqllachu karqa, aswanqa runakunamanmi yachachirqa imam yachasqanta. Payqa yuyaymanaspataqmi estudiarqa achkallaña rikchanachiykunata hinaspam chaykunata qatinasninpi qellqarqa.

¹⁰ Chay yachachikuqmi sumaq palabrakuna tariypi rirqa cheqap kaqman hina sumaqllataña allinta qellqananpaq.

¹¹ Yachayniyoq runakunapa nisqankunaqa tuksina puakuna hinam, paykunapa hukllaman huñuruspa nisqankuqa allin takasqa estacakuna hinam. Chaykunaqa chullalla michiqpa qosqanmi.

¹² Chaynaqa churilláy, allinnikipaqyá chaykunallawan consejachikuy. Librokuna qellqaytaqa manam haykapipas tukunmankuchu. Llumpay estudiaypas pisipaytaqmi.

¹³ Nisqaykunam tukurunña. Lliwmi uyarisqaña. Chaynaqa Diostayá respetay qamqa. Paypa kamachikuyninkunatayá kasukuy qamqa. Chayllam runapa tukuy rurananqa.

¹⁴ Diosqa runakunapa tukuy rurasqanmantam juzganqa. Allin rurasqanmantapas Diosmi juzganqa Mana allin rurasqanmantapas Diosmi juzganqa. Pakasqapi rurasqanmantapas Diosmi juzganqa.