Eclesiastés 11 - Quechua Ayacucho Bible 1987

¹ Lamar qochaman tantata wischuchkaq hinayá aypukuy tantaykita. Punchawkuna pasaruptinmi tarirunki kaqllamanta.

² Qanchisman otaq pusaqman aypuy kapuqnikikunata. Manam yachankichu nacionman ima desgraciakuna hamunanta.

³ Puyukuna armakuptinqa allpamanmi paramunqa. Sachaqa surlawman wichiykusqanpim kuchparayanqa. Sachaqa norte lawman wichiykusqanpim kuchparayanqa.

⁴ Wayramunallanta suyaq runaqa manam tarpukunqachu. Puyumunallanta qawaq runaqa manam cosechanqachu.

⁵ Qamqa manam yachankichu wayrapa mayninmi risqanta. Qamqa manam yachankichu warmipa wiksanpi wawapa tulluchankuna wiñasqanta. Chaynam mana yachankichu tukuy ima ruraq Diospa rurasqankunata.

⁶ Tutapaymanta muhuykita tarpuy. Ama pisipaspayki chisinkuytapas tarpuy. Manam yachankichu mayqen tarpusqaykim wiñamunanta. Manataqmi yanchankichu iskayninku igualla wiñamunanta.

⁷ Qawanapaq sumaqllañam achkiyqa. ¡Mayna allinmi intipa kanchaynin qawayqa!

⁸ Runa unay wata kawsaspaqa chaynataq chay watakunapi kusikuspanqa, yuyarichunyá tutayay hina achka sasachakuy punchawkuna hamunanmanta. Tukuy ima hamuqkunaqa chinkaruq waspiy hinallam kanqa.

Mozokunapaq consejokuna

⁹ Yaw mozo, qamqa mozo kaynikipi gozakuy. Mozo kachkaspallaraq gozakuy. Kawsakuy sonqoykipa munasqanman hina. Kawsakuy ñawikipa qawasqanman hina. Ichaqa ama qonqaychu Dios juzgasunaykita. Ichaqa ama qonqaychu chaykunamanta juzgasunaykita.

¹⁰ Chaynaqa wischuyñayá sonqoykipi llakikuykunata. Chaynaqa saqeyñayá sasachakuynikikunata. Mozoyaypas chinkaruq waspiy hinallam. Mozo kaypas chinkaruq waspiy hinallam.