Eclesiastés 10 - Quechua Ayacucho Bible 1987

¹ Olorkuna ruraqpa olornintam wañusqa chuspikuna asnarirachin. Tumpa sonso hina ruraypas yachayniyoq runapa yachaynintam chinkarachin. Chayqa reqsisqa kaynintam pierderachin.

² Yachayniyoq runaqa allinkunallapim piensan. Sonso runañataqmi mana allinkunallapi piensan.

³ Mana yuyayniyoq runaqa kawsasqanpipas mana yuyayniyoq kasqantam qawachikun. Mana entiendeq hinaspa mana yuyayniyoq kasqantam llapallanman qawachikun.

⁴ Kamachikuq contraykipi piñakuruptinqa ama dejaychu llamkasqaykita. Humillakuspallaykim pampachachikunki llumpay piñachisqaykimanta.

⁵ Yacharunitaqmi kay pachapi huk mana allinmanta, chay pantaymi hamun gobiernaqkunamanta.

⁶ Mana yuyayniyoq runakunatam alto puestokunapi churanku. Apukunatañataqmi bajo puestokunapi churanku.

⁷ Rikurqanim sirvientekuna caballokunapi sillasqa puriqta, kamachikuqkunatañataq sirvientekuna hina chakillankuwan puriqta.

⁸ Pozo uchkuq runaqa uchkusqanmanmi wichiykunqa. Pipas perqa taqmaqtaqa culebram kachurunqa.

⁹ Pipas rumikuna horqoqqa rumikunawanmi hapirachikunqa. Pipas yantata chitqaqqa yantasqanpim waqtakurunqa.

¹⁰ Laqoyasqa hachawanqa runam aswan kallpawanraq waqtanqa. Yachayniyoq runam ichaqa yachayninman hina allinta ruranqa.

¹¹ Manaraq mansoyachisqa culebra kachuruptinqa manañam ima ruraytapas atinmanchu mansoyachiqninqa.

¹² Yachayniyoqpa rimasqankunaqa uyariqkunatam favorecenqa. Sonso runapa rimasqankunam ichaqa kikillanta millpurunqa.

¹³ Rimayta qallaykuspanmi riman mana pasaqkunallata. Rimayta tukuruspanñataqmi riman aswan mana valeqkunallata.

¹⁴ Mana yuyayniyoq runaqa rimayllam-rimanqa. Manam pipas yachanchu qepan hamuq tiempopi imapas pasananmantaqa. ¿Pitaqsi willanqa paypa qepanta imapas pasaqmantaqa?

¹⁵ Sonso runaqa ñakarispam llamkan llumpayta. Payqa manam reqsinchu llaqtaman riq ñanta.

¹⁶ Warmallaraq reyniyoq nacionqa ¡imaynaraq kanqa! Chaypi kamachiqkunapas tutapaymantapuni convidollapi kaptinqa ¡imaynaraq kanqa!

¹⁷ ¡Mayna kusisqam reqsisqa runapa churin reyniyoq nacionqa! ¡Mayna kusisqam horallanpi mikuqkunapa gobiernasqan nacionqa! Paykunaqa kallpanchakunankupaqmi mikunku. Manam sinkakunankupaqchu paykunaqa huñunakunku.

¹⁸ Qella runapa wasinpa qatanqa wichirirunmi. Mana llamkay munaqpa wasintaqa parapas sutunmi.

¹⁹ Convidotaqa ruranku kusikunankupaqmi. Vinoqa kawsaspa gozakunapaqmi. Qollqeqa tukuy ima ruraqmi.

²⁰ Reytaqa ama ñakaychu piensaspallapas. Aputaqa ama ñakaychu puñunayki cuartopipas. Alton pawaq urpitum piensasqaykita aparunman. Raprayoqkunam rimasqaykikunata willaramunman.