Eclesiastés 1 - Quechua Ayacucho Bible 1987

Tukuy imaqa yanqallapaq kasqanmanta

¹ Kay palabrakunaqa yachachikuqpa rimasqankunam. Paymi karqa Davidpa churin chaynataq Jerusalen llaqtapi rey.

² Yachachikuqmi nin: ¡Chinkaruq waspiy hinallam tukuy imaqa! ¡Pasaypaq chinkaruqllam tukuy imaqa!

³ ¿Imatataq runaqa horqokun llamkasqanmanta, kay pachapi tukuy ñakariywan llamakasqanmanta?

⁴ Wañurunmi miraykuna. Nacemunmi miraykuna. Allpam ichaqa hina kaqlla.

⁵ Intim qespimun. Intim seqaykun. Maymi lloqsimusqanmanmi kallpan. Kasqallan qespimunanpaqmi kallpan.

⁶ Wayram pukun surlawman hinaspam muyurin norte lawman. Muyuspa-muyuspam pasan wayraqa. Maymi muyusqanmanmi kutiykun wayraqa.

⁷ Llapallan mayukunam rin lamar qochaman. Lamar qochañataqmi mana huntanchu yakuwan. Mayukunapas qallarimusqanmanmi kutiykun huktawan.

⁸ Tukuy imam runata amichin. Rimayninmantapas mastaraqmi amichin. Ñawim mana saksanchu qawasqanwan. Rinripas manam saksanchu uyarisqanwan.

⁹ Tukuy ima kaqkunaqa hina kaqllam kanqa. Tukuy ima rurasqa kaqkunaqa hina kaqllam kanqa. Manam imapas mosoqqa kanchu kay pachapiqa.

¹⁰ Manam imapas kanchu: “Kayqa mosoqmi” ninanchik. Wiñay tiempomantam karqaña manaraq kachkaptinchik.

¹¹ Ñawpaq kaqkunamantam manaña runakuna yuyarinkuchu. Qepa hamuqkunapas manam yuyarinqakuchu. Hamuq kaqkunamantam mana yuyarinqakuchu.

Yachachikuqta imakunam pasasqanmanta

¹² Ñoqa yachachikuqmi Israel nacionpi rey kaspay Jerusalen llaqtapi gobiernarqani

¹³ hinaspam kay pachapi runakunapa tukuy rurasqanta yachaywan entiendenaypaq suma-sumaqta tapukachakurqani. Sasa-sasa llamkaytam Dios qorqa runakunaman ruranankupaq.

¹⁴ Kay pachapi llapa rurasqakunata qawaykuspaymi cuentata qokuni tukuy chaykunaqa chinkaruq waspiy hinalla kasqanta otaq wayrata hapirunapaq qatikachay hinalla kasqanta.

¹⁵ Qewisqataqa manam derechayta atichwanchu. Faltaq kaqtaqa manam yupayta atichwanchu.

¹⁶ Sonqoypim nikurqani: “Jerusalen llaqtapi llapallan ñawpaq gobiernaqkunamanta masta hatunchakuruspaymi aswan yachaysaparaq rikuriruni. Hayparunim sinchi yuyayniyoq kayta chaynataq yachaytapas.

¹⁷ Churakuykurqanim yachayniyoq kayta entiendenaypaq chaynataq mana yuyayniyoq kaytapas hinaspa loco hina ruraytapas entiendenaypaq. Tukuy kaykunapas wayrata hapirunapaq qatikachay hinalla kasqantam yacharuni” nispa.

¹⁸ Achka yachayniyoq runaqa achka uma nanaytam tarinqa. Yachayninman yapaq runaqa llakikuytam yapakunqa.