Daniel 9 - Quechua Ayacucho Bible 1987

Llaqtamasinkunapaq Daniel mañakusqanmanta

¹ Asuero sutiyoq reypa churin Dariom Caldea lawpi gobiernayta qallaykurqa, Rey Darioqariki karqa Media nacionniyoq runakunapa castanmi.

² Pay gobiernayta qallarichkaptinmi ñoqa Daniel estudiachkarqani Diosmanta willakuq Jeremiaspa libronta, chay libropim rimachkan Jerusalen llaqtaqa qanchis chunka watapuni purmachisqa kananmanta, chaynatam Tayta Dios Jeremiasman nirqa.

³ Hinaptinmi ñoqañataq ruegakuspay ayunowan Señor Diosta mañakurqani, paytaqa mañakurqani hawaypi uchpallaña luto pachayoqmi.

⁴ Chaynaqa yupaychasqay Tayta Diosta mañakuspaymá huchaykumanta willakurqani kaynata nispa: —Hatu-hatun manchakuypaq Señor Diosnilláy, qamqariki kasuqnikikunawan contrato rurasqaykitaqa cumplinkipunim, cumplinkitaqmi kamachikuynikikuna kasukuqkunawan rurasqayki contratotapas.

⁵ Ñoqaykuqa qampa contraykipi huchallikuruspam llumpa-llumpayta mana allinkunata ruraruniku, mana kasukuspataqmi kamachikuynikikunatapas hinaspa leynikikunatapas qepanchakuruniku.

⁶ Manam uyarirqanikuchu servisuqniki qanmanta willakuqkunatapas, paykunaqariki qanmantam willakurqaku ñoqaykupa reyniykumanpas, kamachiwaqniykumanpas, abueloykumanpas chaynataq nacionniykupi llapallan runakunamanpas.

⁷ Señorllayku, qamllam kanki tukuy imapas allin ruraqqa, llapallan Judapa castankunam ichaqa kunan hina penqayllapi kachkaniku. Jerusalen llaqtapi *f**yachaqkunapas, tukuy hinastinpi *f**yachaq Israel castakunapas penqayllapim kachkaniku. Qanmiki ñoqaykutaqa tukuy hinastinman cheqerachiwarqankiku qampa contraykipi hatariruspa traicionarusqaykurayku.

⁸ Dios Taytallayku, ñoqaykuqariki chayna penqayllapimá kachkaniku reyniykupiwan, kamachiqniykupiwan hinaspa abueloykupiwan, chaynaqa kachkaniku qampa contraykipi huchallikurusqaykuraykum.

⁹ Ichaqa Señor Diosnillayku, qamqariki llakipayariykuwaspaykikum huchaykutapas pampachaykunki, ñoqaykuqariki chaykunawanmi mana kasurqaykikuchu.

¹⁰ Yupaychasqayku Dios Taytalláy, manam ñoqaykuqa uyarirqanikuchu imam yachachiwasqaykikutapas chayman hina kawsanaykupaq, chaykunataqa willachiwarqankiku serviqniki willakuqkunawanmi.

¹¹ Israelpa castankunaqa llapallaykum mana kasukurqanikuchu imam yachachiwasqaykikuta hinaspam qamtaqa manataq uyariytapas munarqanikuchu chaymi ñoqaykuqa qampa contraykipi huchallikurusqaykurayku juramentaspa ñakasqaykiwan ñakasqa kachkaniku, chaytaqariki serviqniki Moisesmi qellqarqa qosqayki yachachikuykunapi.

¹² Chaynaqa qamqa ñam cumplirunkiña contraykupi Moiseswan qellqachisqaykitaqa chaynataq kamachiqniykupa contranpi qellqachisqaykitapas, chaynapim chay hatun desgraciaqa cumplikurqa Jerusalen llaqtapi, manam chaynaqa rurasqa karqachu haykapipas kay pachapiqa.

¹³ Moisespa qellqasqan yachachikuykunaman hinam kay tukuy desgraciaqa chayaramuwanku chaywanpas, yupaychasqayku Dios Taytalláy, ñoqaykuqa manam maskarqanikuchu qampa yanapakuynikitaqa, manataqmi wanakurqanikuchu mana allin rurasqaykumantaqa, cheqap kaqnikikunataqa manam uyariqpas tukurqanikuchu.

¹⁴ Chayraykum qam Tayta Diosqa kay mana allinta alistaykuspa ñoqaykuman kachaykamunki. Yupaychasqayku Dios Taytalláy, qamqariki tukuy imapas allin ruraqmi kanki, ñoqaykum ichaqa niwasqaykiku uyariytapas mana munarqanikuchu.

¹⁵ Señor Diosnillayku, hatun atiynikiwanmi runaykikunataqa horqomurqanki Egipto nacionmanta, chaynapim qamqa anchallataña reqsichikurqanki kunankama. Chaywanpas ñoqaykuqa huchallikuruspam mana allinta rurarqaniku.

¹⁶ Señornillayku, allin ruraq kasqaykiman hinayá Jerusalen llaqtaykipa contranpiqa amaña piñakuyñachu nitaq rabiakuyñachu, chay llaqtapimiki kachkan qampaq sapaqchakusqayki orqopas ichaqa huchaykuraykum hinaspa abueloykupa mana allin rurasqankuraykum chay Jerusalen llaqtamantaqa muyuriqniykupi nacionkuna burlakuchkan, burlakuchkankutaqmi qampa runaykikunamantapas.

¹⁷ Chaynaqa Diosnillayku, kunanyá uyariykuway kay serviqnikipa mañakullasqayta hinaspa ruegakullasqayta, qamqa sutillaykiraykuyá favoreceykuy wak purmachisqa santuarioykita.

¹⁸ Diosnilláy, kurkuykuspayá uyariykullaway, ñawillaykitapas kichariykuspayá qawariykullaway, arí kaynamá sutikiwan sutichasqa llaqtaqa purmachisqa kachkan. Manam ñoqaykuqa mañakuchkaykiku allin rurasqaykupi confiakuspaykuchu, ñoqaykuqariki confiakuchkaniku ancha llakipayakuq kasqaykipim.

¹⁹ Señorlláy, qamqa uyariykuwayá, Señorlláy, pampachaykuwayá. Señorlláy, qamqa sumaqtayá uyariykuway. Qamqa ama demoraspayá ruraykuypuni. Diosnilláy, qamqa kikillaykiraykuyá ama unamuychu, Jerusalen llaqtaykiwan runaykikunaqa sutikiwan sutichasqam kachkan —nispa.

Qanchis chunka semanamanta

²⁰ Yupaychasqay Tayta Diostam hinallaraq rimapayaspay mañakuchkarqani, huchaykunatapas hinaspa llaqtamasiykunapa huchantapas paymanmi willachkarqani, paypaq sapaqchakusqan moqopaqmá ruegakuchkarqani.

²¹ Chaynata mañakuchkaptiyraqmi Diosman ofrenda ofrecena tardeykuq horata ñoqapa kasqayman pawastin chayaramurqa runaman rikchakuq angel Gabriel hinaspam hapiykuwarqa, hina paytaqmi rikuriykuwarqa chay puntallaraq revelacionniypipas.

²² Entiendechiwananpaqmi rimapayawaspan kaynata nirqa: —Daniel, ñoqaqa hamurqani qamta entiendechinaypaqmi.

²³ Ruegakuyta qallaykuptillaykiraqmi Diosqa uyariykusurqankiña. Ñoqaqa hamurqani chay uyarisusqaykita qanman willanaypaqmi. Payqariki llumpaytam kuyasunki. Chaynaqa allinta yuyaymanaspayá chay imam qawasqaykimanta entiendenaykipaq uyariway:

²⁴ Qanchis chunka semanam llaqtamasikikunapaq tanteasqa kachkan. Diospaq sapaqchasqa Jerusalen llaqtaykipaqpas hina chaynallam kachkan. Chayraqmi mana kasukuq kayninkupas tukunqa. Chayraqmi huchallikuyninkupas taninqa. Chayraqmi mana allin rurasqankupas pampachasqa kanqa. Wiñaypaqñam ruranqaku paykunaqa allin kaqkunatapas. Chayraqmi cumplikunqa revelacionnikipi imam qawasqaykipas. Chayraqmi cumplikunqa Diosmanta willakuqkunapa imam willakusqankupas. Diosllapaqña sapaqchasqam kanqa Chuyay-chuyay kaqpas.

²⁵ Daniel, kay willasqatayá yachay sumaqta. Daniel, kay willasqaytayá entiendey sumaqta. Kamachikuy lloqsimuptinmi Jerusalen llaqta huktawan hatarichisqa kanqa. Kamachikuy lloqsimuptinmi Jerusalen llaqta mosoqmanta perqasqa kanqa. Chay tiempomanta huk Akllasqa Kamachikuq hamunankamam pasanqa qanchis semanakuna. Pasanqataqmi soqta chunka iskayniyoq semanakuna. Chay tiempopiñam rurasqa kanqa Jerusalen llaqtapa plazankuna. Chay tiempopiñam Jerusalen llaqtapa yarqankunapas rurasqa kanqa. Aswanqa sasachakuy tiempokunapiñam chaykunaqa rurasqa kanqa.

²⁶ Chay soqta chunka iskayniyoq semanakunam pasarunqa. Hinaptinmi chay Akllasqa Kamachikuq wañuchisqa kanqa. Mana imayoq kasqanraykum payqa wañuchisqa kanqa. Jerusalen llaqtatapas hamuq kamachikuqpa tropankunam tuñirachinqa. Chaypi kaq santuariotapas paykunamá tuñirachinqa. Lloqllapa apamusqan hinam puchukayqa chayaykamuchkanña. Chayna puchukanankamam kanqa guerraskunallaña hinaspa Diospa tanteasqan purmachiykunallaña.

²⁷ Chay kamachikuqmi huk semanapuni achka runakunawan takyaq contratota ruranqa. Ichaqa chawpi semanallapiraqmi harkakurunqa Diospaqpas animalkuna wañuchinankuta Ichaqa chawpi semanallapiraqmi harkakunqa Diosmanpas kawsay ofrendakuna qonankuta. Templopa hawanpipas purmachina millakuypaq kaqkunatam churanqa. Chay citasqa purmachiq hamuqpa wañunankamam chayna churasqaqa kanqa.