Daniel 8 - Quechua Ayacucho Bible 1987

Carnerotawan chivatota revelacionninpi Daniel rikusqanmanta

¹ Rey Belsasar kimsa watamanña gobiernachkaptinmi punta revelacionniypa qepanta ñoqa Daniel rikurqani huk revelaciontawan.

² Chay revelacionniypim kachkasqani reypa *f**yachanan Susa llaqtapi, chay llaqtaqariki Elam lawpim kachkan, chaypim kachkasqani Ulai sutiyoq mayupa patanpi.

³ Qawarispaymi mayupa patanpi rikururqani huk carnerota, chay carneroqa kasqa iskay waqrayoqmi. Chay waqrankunaqa hatunkama kachkaptinpas huknin waqranmi kasqa hukninmantaqa aswan hatunraq. Chay hatun waqraqa wiñaramurqa huknin waqranpa qepantañam.

⁴ Qawachkaptiymi chay carneroqa takarqa intipa seqaykunan lawman, norte lawman hinaspa surlawman, manam ima animalpas chay carneropa ñawpaqninpiqa sayayta atirqachu, manataqmi pipas paypa munaychakuyninmantaqa librakuyta atirqachu. Munasqanman hina imatapas ruraspanmi aswan-aswan hatunyarqa.

⁵ Qawasqaymanta yuyaymanachkaptiymi intipa seqaykunan lawmanta pampatapas manaña saruykuspan altollanta pawamuchkasqa huk chivato. Chay chivatoqa kasqa iskaynin ñawinkunapa chawpinpi huk hatun waqrayoqmi.

⁶ Chaynapim chay chivatoqa mayu patanpi iskay waqrayoq rikusqay carneropa kasqankama chayaramuspan kallparqa piñasqallaña tukuy kallpanwan waqrarunanpaq.

⁷ Carneropa kasqanman chayaruspanmi umanwan aparurqa hinaspam pakirurqa chay carneropa iskaynin waqranta. Chaynapim chay carneroqa manaña sayayta atirqachu chivatopa ñawpaqninpiqa, chay carnerota pampaman choqaruspanmi saruparurqa. Manamya pipas karqachu carnerotaqa chay chivatomanta libraykunanpaq.

⁸ Chay chivatom aswan-aswan munaychakuqña rikurirurqa ichaqa chayna atiyniyoqllaña kachkaptinmi chay hatun waqran pakikururqa hinaptinmi chay waqrapa rantinpi wiñaramurqa tawa waqrakunaña, chay tawantin waqrakunaqa tawa lawmanmi qawarqa.

⁹ Huknin waqramantam wiñaramurqa huk taksa waqracha, chay waqracham llumpayllataña wiñarurqa surlawman, wiñarurqataqmi intipa qespimunan lawmanpas chaynataq Kuyayllapaq Allpa lawmanpas.

¹⁰ Llumpa-llumpaytam wiñarurqa cielokunapi lucerokunapa kasqankama, wakin lucerokunataqa pampakunamanraqmi wichirichimurqa hinaspam saruparurqa.

¹¹ Lucerokunapa Jefen hinaraq rikuriruyta munaspanmi qechurachirqa sapa punchaw Diosman ofrecesqanku ofrendatapas, santuarionpa kasqanpas pampaman wikapasqam karqa.

¹² Mana kasukuq kasqankuraykum Diospaq sapaqchasqa tropakunapas hinaspa sapa punchaw Diosman ofrecesqanku ofrendakunapas paypa makinmanña churasqa karqa, cheqap kaqkunatapas pampakunamanraqmi wikaparqa, tukuy ima rurasqanpipas payqa allinpunim lloqsirqa.

¹³ Uyarichkaptiymi huk chuya angelñataq angelmasinta tapurqa kaynata: —¿Haykapikamataq kanqa chay qawachisqa kaqkunaqa? ¿Haykapikamataq kanqa sapa punchaw Diosman ofrecesqanku ofrenda qechurusqanqa? ¿Haykapikamataq kanqa kay mana kasukusqankurayku purmachisqa kaqkunaqa? ¿Haykapikamataq paypa makinman qosqa kanqa Diospa santuarionqa? ¿Haykapikamataq sarupasqa kanqa chay lucerokunapas? —nispa.

¹⁴ Hinaptinmi huknin angelñataq nirqa: —Waranqa pachak pichqa chunkan punchawkuna pasanankamam chay ofrendakunaqa mana ofrecesqachu kanqa tardenpas nitaq tempranonpas, chaymantañam Diospa santuarionqa huktawan chuyanchasqa kanqa —nispa.

¹⁵ Ñoqa Danielmi chay revelacionniypi imam kaqkunata qawachkarqani hinaspam entiendeykuyta munaspa yuyaymanachkarqani. Qonqaymantam ñoqapa ñawpaqniypi rikurirurqa runa hina rikchayniyoq angel.

¹⁶ Chaymi uyarirqani Ulai Mayupa patanmanta runa hina: —Gabriel, chay runaman willay qawasqanpa imam ninanta —nispa qayakamuqta:

¹⁷ Chaynapim payqa ñoqapa kasqaykama asuykamuwarqa, chaymi manchakuyllawanña qonqoranpa pampaman kumuykuptiymi payñataq niwarqa: —Runapa churin, kay imam qawasqaykiqa kachkan tukupay tiempokunapaqmi —nispa.

¹⁸ Hinallaraq pay rimapayawachkaptinmi mana musyakuqña pampaman pakchanpa wichiykurqani chaymi sayarichiwaspan

¹⁹ niwarqa: —Kunanmi willasqayki tukupay tiempokunapi imaynam Diospa piñakuynin kananmanta.

²⁰ Chay iskay waqrayoq carnero rikusqaykiqa Media law hinaspa Persia law nacionpi kaq reykunam.

²¹ Chay rikusqayki chivatoñataqmi Grecia nacionmanta kaq rey, chay iskaynin ñawinkunapa chawpinpi kaq waqranñataqmi Grecia nacionpi punta kaq rey.

²² Rikurqankitaqmi imaynam chay punta kaq waqran pakiruptin chaypa rantinpiqa tawa waqrakunaña wiñaramusqantapas. Chay huk waqraqariki huk gobiernom, chay gobiernomantam lloqsimunqa tawa gobiernokunaña ichaqa chay tawantin gobiernokunaqa manam punta kaq gobierno hinañachu ancha atiyniyoq kanqa.

²³ Chay tawantin gobiernokunapa munaychakuynin tukuykuchkaptinmi, chay mana kasukuqkunapa tukuy mana allin rurasqanku pasaypaqtaña huntaruptinmi piña-piña uyayoq rey hatarimunqa. Chay reyqa sacre-sacrem kanqa.

²⁴ Chay reyqa llumpa-llumpay munaychakuqmi rikurirunqa. Ichaqa manam kikinpa atiyninraykuchu chaynaqa karunqa. Payqa admirakuypaqtam tukuy imatapas purmachinqa. Payqa tukuy ima rurasqanpim allinpuni lloqsinqa. Payqa wañurachinqam kallpasapallaña runakunatapas. Wañurachinqataqmi Diosllapaqña sapaqchasqa runakunatapas.

²⁵ Sacrellaña kasqanraykum runakunapa engañasqanpas allinpuni lloqsinqa. Sonqonpi hoqarikuspanmi hawka kawsakuqkunatapas achkallataña wañurachinqa. Payqa Kamachikuqkunapa Jefenpa contranpim hatarinqa. Ichaqa manam runakunapa atiyninwanchu vencesqa kanqa.

²⁶ —Chay tarden hinaspa tempranon imam pasananmanta imam rikusqaykiqa cheqappunim. Ichaqa imam rikusqaykimantaqa amam pimanpas willankichu, chayqa cumplikunqa unay watakunamantañam.

²⁷ Ñoqa Danielqa eqoyaruspaymi achka punchawkuna onqorurqani, chaymantañam allinyaykuspay reypa kaqninkunata huktawan rurarqani ichaqa muspaypi hinam tarikurqani chay imam rikusqaymanta, chayqariki karqa mana entiendey atinam.