Daniel 7 - Quechua Ayacucho Bible 1987

Mancharikuypaq animalkunata Daniel mosqorusqanmanta

¹ Babilonia nacionpa reynin Belsasar gobiernay qallarisqan watapim huk tuta Daniel mosqorurqa hinaspataqmi camanpi waqtapaykuspanmi pensamientopa intusqan karqa. Rikchariruspanmi imam mosqorusqanta pisi rimayllapi qellqaspan

² nirqa: —Ñoqam mosqoyniypi qawachkasqani tukuy hinastinmanta vientokuna pukumuchkaqta, hatun lamar qochapa yakunkunapas kaynaman-waknamanmi hoqarikuchkasqa.

³ Hinaptinmi qonqaymanta tawa manchakuypaq hatun animalkuna lamar qochamanta lloqsimuchkasqa. Chay tawantin animalkunaqa manam kaqllakamachu kasqa.

⁴ Punta kaq animalmi rikchakusqa huk leonman ichaqa kasqa anka hina raprayoqmi. Chayta qawachkaptiymi chay raprankunata chutarurqaku. Chay leonta pampamanta hatarirachiptinkum runa hinaña iskaynin chakinwan sayarirurqa, payqa runa hina yuyayniyoqñam rikurirurqa.

⁵ —Iskay kaq animalñataqmi rikchakusqa huklaw waqtan hoqarikuchkaq ukumariman, payqa siminpim kanirayachkasqa kimsa costilla tullukunata. Paytam huk kaqnin nimurqa: “Hatarispaykiyá aychata mikumuy atisqaykikama” nispa.

⁶ —Rikururqanitaqmi uturunguman rikchakuq manchakuypaq animaltapas, chay animalqa kasqa wasanpi tawa raprayoqmi hinaspa tawa umayoqmi. Paymi atiyniyoq rikurirurqa munaychakunanpaq.

⁷ —Chay mosqoyniypiqa rikurqanitaqmi manchakuypaq tawa kaq animaltapas, chay animalqa kasqa puraminti mancharikuypaq llumpay kallpasapam. Kirunkunapas chay animalpaqa kasqa fierromantam hatu-hatunkuna, payqa mikuspanpas pasaypaqtam chamchaparurqa, puchuqnintañataqmi saruparurqa. Chay animalqa kasqa wakin qawasqay animalkunamantaqa pasaypaq hukmanmi. Chaynañataqmi chay animalqa kasqa chunka waqrayoqmi.

⁸ Chay waqrankunata qawarayachkaptiymi chay waqrankuna ukumanta wiñaramurqa taksa waqracha, chay waqracha hatunyananpaqmi kimsa waqrakuna maymi kasqanmanta kiwllusqa karqa. Chay waqrachaqa kasqa runapa ñawin hina ñawiyoqmi, kasqataqmi siminpas llumpay alabakuqllaña.

Wiñaypaq kawsakuqta Daniel qawasqanmanta

⁹ Revelacionpi qawachkaptillaymi reypa tiyanankuna churasqa karqa. Hinaptinmi huknin tiyanapi wiñaypaq Kawsakuq tiyaykurqa. Paypaqa pachanpas kasqa riti hina yuraq-yuraqmi. Paypaqa kasqa chukchanpas taqsasqa millma hina ruyaq-ruyaqmi. Paypaqa tiyananpas kasqa lenguachkaq nina hinam. Chay tiyananpa ruedankunapas kasqa rawrachkaq nina hinam.

¹⁰ Nina mayum ñawpaqninmanta lloqsimuspan kallparqa. Paytaqa waranqantin-waranqantinmi servirqa. Paypa ñawpaqninpim manaña yupay atina karqa. Chaynapim cortepi kaqkuna tiyaykurqa. Hinaptinmi librokuna kichasqa karqa.

¹¹ —Chay taksa waqrachapa alabakusqanta hinalla qawachkaptiymi chay waqrasapa animal wañuchisqa karurqa, cuerponpas tisapasqa karuspanmi ninaman wischusqa karqa.

¹² Chay wakin animalkunapa munaychakuyninpas qechusqam karqa ichaqa manam wañurachirqakuchu wañunan punchaw chayamunankama.

¹³ Revelacionniypi tuta hinalla qawachkaptiymi qonqaymanta puyukunawan kuska alto cielonta runapa churinman rikchakuq hamuchkasqa. Payqa Wiñaypaq Kawsakuqpa kasqanmanmi hamuchkasqa. Wiñaypaq Kawsakuqpa qayllanmanmi asuykachirqaku paytaqa.

¹⁴ Runapa churinman rikchakuqmanmi qorqa atiyniyoq kananpaq. Runapa churinman rikchakuqmanmi qorqa yupaychasqa kananpaq. Llapallan runakuna, nacionkunam payta servinqaku. Huk rikchaq rimayniyoqkunapas paytam servinqaku. Paypa munaychakuyninqa wiñaypaq mana tukuqmi kanqa. Paypa gobiernonqa mana haykapipas chinkaqmi kanqa.

¹⁵ —Chaykunawanmi ñoqa Daniel hukmayaruspay pensamientopa intusqan mancharisqallaña karqani.

¹⁶ Chaypi huk kaqnin sayaqman asuykuspaymi payta tapukurqani tukuy chaykunapa cheqap ninanta willaykuwananpaq chaymi payqa tukuy chaykunapa imam ninanta willawarqa:

¹⁷ “Chay tawantin hatun animalkunaqa kay pachapi hatarimuq tawa gobiernokunam.

¹⁸ Ichaqa Alto-altopi kaq Diospaq sapaqchasqa kaqkunamanmi qosqa kanqa chay gobiernoqa, paykunañam chay gobiernopiqa kanqaku wiña-wiñaypaq” nispa.

¹⁹ —Ñoqam yachaykuyta munarqani chay tawa kaq animalqa imam cheqaptapunipas kasqanmanta, chay animalqariki kasqa chay kimsantin animalmantapas hukman rikchayniyoq puraminti mancharikuypaqmi, chay animalqa kasqa fierromanta kiruyoqmi, hinaspa broncemanta silluyoqmi. Payqa mikusqantapas pasaypaqtam chamchaparurqa, puchuqnintañataqmi saruparurqa.

²⁰ Yachaykuytam munarqani chay chunkantin waqrakunamantawan ñawiyoq hinaspa alabakuq simiyoq wiñaramuq waqrachamanta, chay waqracha hatunyananpaqmi kimsa waqrakuna maymi kasqanmanta kiwllusqa karqa. Chay waqrachaqa rikchakapuwarqa wakin waqrakunamantapas aswan hatunkaraymanmi.

²¹ Qawarqanimá imaynam chay waqrachaqa Diospaq sapaqchasqa kaqkunata guerrawan hapisqanta hinaspa vencerusqanta.

²² Chaynam karqa Wiñaypaq Kawsakuq hamunankama, payñam allin arreglota rurarqa Alto-altopi kaq Diospaq sapaqchasqa kaqkunata, tiempo chayaramuptinmi Diospaq sapaqchasqa kaqkunaña chay gobiernopi karqaku.

²³ Hinaptinmi chay willawaqniy niwarqa: Chay tawa kaq animalqa kay pachapi hatarimuq tawa kaq gobiernom. Chay gobiernoqa kanqa wakinmanta hukman gobiernom. Chay gobiernoqa tukurunqam kay pachapi kaqkunata. Chay gobiernoqa saruparunqam tukuy imata. Chay gobiernoqa tisaparunqam tukuy imata.

²⁴ Chay chunkantin waqrankunaqa chay gobiernonmanta hatarimuq chunka reykunam. Chay reykunapa qepantañataqmi pasaypaq hukman rikchayniyoq rey hatarimunqa. Chay reyqa kimsa reykunatam humillarachinqa.

²⁵ Chay reyqa Alto-altopi kaq Diostam insultanqa. Payqa Diospaq sapaqchasqakunatam ñakarichinqa. Chay reyqa tiempokunapas cambiaruytam munanqa. Chay reyqa leykunapas cambiaruytam munanqa. Diospaq sapaqchasqa kaqkunapim munaychakunqa. Chaynataqa kimsa tiempo partenkamam munaychakunqa.

²⁶ Ichaqa cortepi kaqkunam tiyaykunqaku. Chay reypa munaychakusqantam qechurunqaku. Paypa munaychakusqantaqa wiñaypaqmi chinkarachinqaku.

²⁷ Kay pachapi gobiernokunapa munaychakuyninpas, kay pachapi gobiernokunapa atiyninpas, kay pachapi gobiernokunapa hatun kayninpas qosqa kanqa Diospaq sapaqchasqa kaqkunamanmi otaq Alto-altopi kaq Diospa runankunamanmi, hinaptinmi Diospa gobiernonqa wiña-wiñaypaq takyanqa. Payllatañam servinqaku kay pachapi llapallan kamachikuqkunaqa. Payllatañam kasukunqaku kay pachapi llapallan kamachikuqkunaqa.

²⁸ —Chay willawaqniy rimapayawayta tukuruptinmi ñoqa Danielñataq llumpayta hukmanyaruspay pensamientopa intusqan karqani ichaqa chaykunataqa sonqollaypi waqaychaspam mana pimanpas willarqanichu.