Daniel 6 - Quechua Ayacucho Bible 1987

Leonkunapa machayninman Danielta wischuykusqankumanta

¹ Rey Dariom tantearurqa pachak iskay chunkan prefectokunata chay gobiernasqan nacionpi churaruyta.

² Chay pachak iskay chunkan prefectokunapa hawanpiñataqmi churarqa kimsa kamachikuqkunata, paykunataqa churarqa prefectokunamanta cuentata mañanankupaqmi chaynapi reypa imanpas mana dañasqa kananpaq. Chay kimsantin kamachikuqkunapa hukninmi karqa Daniel.

³ Paymi chay kamachiqmasinkunamantapas hinaspa llapallan prefectokunamantapas ancha reqsisqa rikurirurqa admirakuypaq espirituyoq kasqanrayku. Reyqa tantearurqa nacionninpi tukuy ima kamachiqkunapa jefenpaqña churaruytam.

⁴ Chayraykum Danielpa kamachiqmasinkunapas hinaspa llapallan prefectokunapas imallatapas maskarqaku chayman hina acusanankupaq ichaqa manam ima faltatapas tarirqakuchu paypa imaynam gobiernasqanpiqa. Payqa confianza runa kaspanmi tukuy imata nanachikuq, manataqmi ima regalotapas yanqamantaqa chaskikuykuqchu.

⁵ Chayraykum chay runakuna ninakurqaku: —Kay Danieltaqa manam imamanta acusaytapas atichwanchu aswanqa acusaspaqa-acusachwan diosninpa leyninkunallamantam —nispa.

⁶ Danielpa kamachiqmasinkunam chay llapallan prefectokunapiwan pasarqaku reypa kasqanman hinaspam payta nirqaku: —Wiñaypaq kawsakuq Rey Dario,

⁷ gobiernoykipi tarikuq llapallan kamachikuqkunam llapallan jefekunapiwan, llapallan prefectokunapiwan consejaqnikikunapiwan hinaspa llapallan gobernadorkunapiwan tanteanakuruniku huk decretota kamachinaykipaq hinaspa chunkay-chunkayta cumplichinaykipaq. Chay decretom ninanqa: “Kimsa chunka punchawkamayá ama pipas mañakuchunchu huk diostaqa nitaq huk runatapas, mañakuspaqa-mañakuchunku qam sapallan reynillaykutayá. Pipas mana chayta kasukuqqa leonkunapa kasqan machaymanyá wischusqa kachun” nispa.

⁸ Reynillayku chaynaqa, kikikipuni decretaykuspayá firmaykuy chaynapi Persia law hinaspa Media law nacionpi leykuna hina manaña yanqachasqa kananpaq —nispa.

⁹ Chaynapimá chay decretotaqa rey Darioqa firmaykurqa.

¹⁰ Chay decreto firmasqa karusqanta Daniel yacharuspanmi wasinman pasakurqa hinaspam altos lawpi cuartonpa ventanankunata kichaykurqa, chay ventanakunaqa qawarqa Jerusalen llaqta lawmanmi. Chaypim payqa qonqarakuykuspan Diosninta alabarqa, mañakuspanmi payman graciasta qorqa. Chaynatam rurarqa kimsa kutikama imaynam ñawpaqmantaraq sapa punchaw rurasqanman hina.

¹¹ Chay contranpi kaq runakunañataqmi huñunakuruspa Danielta tarirurqaku diosnin mañakuchkaqta hinaspa ruegakuchkaqta.

¹² Chaypunilla rispankum chay decretasqanmanta nimurqaku: —Reynillayku, qanmi huk decretota firmaspa kamachikuspayki: “Kimsa chunka puchawkamayá ama pipas mañakuchunchu huk diostaqa nitaq huk runatapas, mañakuspaqa-mañakuchunku ñoqallatayá, pipas mana chayta kasukuqqa leonkunapa kasqan machaymanyá wischusqa kachun” nispa. Reynillayku ¿chaynachu icha manachu? Hinaptinmi reyñataq nirqa: —Arí, chaynapunim, chay decretasqayqa Media law hinaspa Persia law nacionpi decretokuna hina manaña yanqachay atinam kanqa —nispa.

¹³ Chaymi paykuna nirqaku: —Reynillayku, Juda nacionmanta presokunawan hamuq Danielmi mana respetasunkichu, manataqmi firmasqayki decretotapas payqa kasukunchu aswanqa sapa punchawmi kimsa kutita diosninta mañakun.

¹⁴ Chayta Rey Dario uyariykuspanmi llumpayllataña llakikururqa hinaspam yuyaymanarqa Danielta libraykunanpaq, inti seqaykunankamam payqa tukuy imata rurarqa Daniel libraykunanpaq.

¹⁵ Aswanqa chay runakunam reypa qayllanman kutispanku kaynata nirqaku: —Reynillayku, qamqariki sumaqtam yachanki Media law hinaspa Persia law nacionpi leyman hinaqa ima decretopas hinaspa ima kamachikuypas reypa firmasqanña kaspaqa manaña yanqachay atina kasqanta —nispa.

¹⁶ Reymi Danielta pusarachimurqa leonkunapa kasqan machaymanpas wischuykunankupaq, manaraq wischuykuchkaptinkum Danielta rey nirqa: —Mana samaykuspa servisqayki diosnikiyá qamtaqa libraykusunki —nispa.

¹⁷ Danielta wischuykuspam hatun rumiwan leonkunapa machayninta wichqarurqaku, reypas anillonwanmi chay rumita sellaykurqa, sellaykurqakutaqmi ancha reqsisqa kamachikuqkunapas chaynapi imapas Danielpa contranpi kaqkunaqa mana yanqachasqa karunanpaq.

¹⁸ Reyñataqmi palacionman kutispan cenaytapas mana mikurqachu, tutapas manataqmi puñurqachu, hina tocanankuman hinaqa tocaqkunapas manam hamurqakuchu chay tutaqa, mana puñusqan payqa achikyarurqa.

¹⁹ Achikyaruptinmi chaypunilla hatariruspan kallpaylla pasarqa chay leonkunapa kasqan machayman.

²⁰ Chayman chayaruspanmi llakillawanña Danielta qayarqa: —Kawsaq Diospa serviqnin Daniel, mana samaykuspa servisqayki Diosnikiqa ¿yaqachum leonkunamanta libraykusurqanki? —nispa.

²¹ Hinaptinmi Danielñataq nimurqa: —Wiñaypaq kawsakuq reynilláy,

²² Diosniymi angelninta kachamuspan mana imanawananpaq leonkunapa siminta wichqarachirqa. Diosqariki yachanmi ñoqaqa mana huchayoq kasqayta chaynataq qampa qayllaykipiqa ima mana allinpas mana rurarusqayta —nispa.

²³ Reymi anchallataña kusikuspan kamachikurqa Danieltaqa leonkunapa kasqan machaymanta horqonankupaq. Danielta horqoruptinkum qawarqaku ima heridallanpas mana kasqanta, payqariki Diosninpim confiakurqa.

²⁴ Rey kamachikuptinmi pusamurqaku Danielta acusaq runakunata, warmintinta hinaspa churintinta wischuykurqaku leonkunapa kasqan machayman, manaraqpas pampaman chayaykuchkaptinku leonkuna pawaykuspa tisaparurqa llapallan tullunkupas chamchakunankama.

²⁵ Chaymi Rey Dario apachirqa huk cartata kayna niqta: Ñoqa rey Dariom munachkani llapallan runakuna, lliw nacionpi *f**yachaqkuna, huk rikchaq rimayniyoqkuna hinaspa tukuy kay pachapi yachaqkuna hawkalla tarikunaykichikta.

²⁶ Kay nacion gobiernasqaypi llapallan runakunatam decretaspay kamachimuykichik Danielpa diosninta manchakuywan respetanaykichikpaq. Payqariki Kawsakuq Diosmi. Payqariki wiñaypaq takyaq Diosmi. Paypa gobiernonqa manam haykapipas tukunqachu. Paypa munaychakusqanqa manam haykapipas puchukanqachu.

²⁷ Payllamiki runakunapa salvaqninqa. Payllamiki runakunapa libraqninqa. Payllamiki milagrokunataqa ruran kay pachapipas hinaspa cielokunapipas. Payllamiki admirakuypaq kaqkunataqa ruran kay pachapipas hinaspa cielokunapipas. Payllamiki leonkunapa mikusqan kananmantaqa libraykurqa Danieltapas.

²⁸ Danielqa hina allin reqsisqalla karqa Rey Dariopa gobiernasqan tiempopipas chaynataq Persia nacionniyoq Rey Ciropa gobiernasqan tiempopias.