Daniel 5 - Quechua Ayacucho Bible 1987

Perqapi qellqa rikurirusqanmanta

¹ Rey Belsasarmi hatun convidota rurarqa gobiernonpi waranqa ancha reqsisqa runakunapaq hinaspam paykunawan kuska vinota upyakurqaku.

² Belsasar vinota upyachkaspanmi kamachikurqa Jerusalen llaqtamanta apamusqanku qori-qollqe vasokuna apamunankupaq, chay vasokunataqariki abuelon Nabucodonosormi saqueamurqa Jerusalen llaqtapi templomanta hinaptinmi waqaychananku wasimanta Rey Belsasar chakunata apachimurqa, ancha reqsisqa runakunawan, warminkunawan hinaspa churi wachankunawan upyanankupaqmi.

³ Chaynaqa chay aparachimusqan qori vasokunataqa saqueamurqaku Jerusalen llaqtapi Diospa templonmantam. Chay vasokunapimá reywan upyakurqaku allin reqsisqa runakuna, upyarqataqmi warminkunapas hinaspa churi wachankunapas.

⁴ Llapallankumá vinota upyakuspanku hatuncharqaku qorimanta, qollqemanta, broncemanta, fierromanta, kullumanta hinaspa rumimanta taytachankuta.

⁵ Hinaptinmi qonqaymanta runapa maki dedonkuna rikuriruspan estucasqa perqapi qellqayta qallaykurqa, chay perqaqa tarikurqa reypa palacionpi kaq candeleropa chimpanpim.

⁶ Chayta rey qawaykuspanmi llumpayllataña hukmanyarurqa, pensamientopa intusqan kaptinmi manchakuymanta weqawninpi tullunkunapas kachakuykurqa, moqonkunapas katkatataspanmi takanakurqa.

⁷ Hinaptinmi qaparispan qayachimurqa espiritista runakunata, Caldea runakunapi kaq yachaqkunata hinaspa adivinaq runakunata. Paykunatam nirqa: —Wak qellqata pipas leey atiqqa chaynataq imam ninanta willaykuwaqniyqa sumaqllaña grosella pachawan pachachisqam kanqa, paypa kunkanmanpas wallqachisaq qorimanta collarwanmi, gobiernoypipas payqa kanqa kimsa kaq gobiernaqmi —nispa.

⁸ Chaynapimá reyta serviq llapallan yachayniyoq runakunaqa paypa ñawpaqninman hamurqaku ichaqa manam mayqanninkupas atirqakuchu chay qawasqanku qellqa leeyta, manataqmi atirqakuchu chaypa imam ninan kasqan reyman willaytapas.

⁹ Rey Belsasarqa aswanraq mancharikuptinmi uyanpas llumpayllataña hukmanyarurqa. Ancha reqsisqa autoridadkunapas manam ima rurakuytapas atirqakuchu.

¹⁰ Reypa qaparisqantawan allin reqsisqa runakunapa qaparisqanta reina uyariruspanmi chay convido salaman yaykuspan nirqa: —Wiñaypaq kawsakuq rey, amayá qamqa pensamientopa intusqanqa rikuriruychu, amataqyá uyaykipas chaynatañaqa hukmanyaruchunchu.

¹¹ Kay gobiernasqayki nacionpiqa kachkanmiki chuya dioskunapa espiritunpa huntaykusqan runa. Abueloyki Rey Nabucodonosorpa tiemponpim chay runaqa qawachikurqa allin entiendeq kasqanpaq, allin yuyayniyoq kasqanpaq hinaspa dioskuna hina yachayniyoq kasqanpaq. Chayraykum abueloyki Nabucodonosorqa payta churarurqa brujokunapa, espiritistakunapa, Caldea runakunapi kaq yachaqkunapa hinaspa adivinaq runakunapa jefen kananpaq.

¹² Chay runapa sutinqariki Danielmi, paytataqmi abueloyki reyqa suticharqa Beltsasarwan, payqariki kasqa admirakuypaq espirituyoqmi chaynataq yachaypapas hinaspa yuyaypapas huntaykusqanmi. Payqa yachantaqmi mosqoykunapa imam ninantapas chaynataq sasa entiendena watuchikunapa imam ninantapas. Payqa atinmanmi sasachakuykuna allichaytapas. Chaynaqa Danieltayá qayamuychik, paymi willasunkichik chay qellqapa imam ninantaqa —nispa.

¹³ Reypa qayllanman Danielta pusaruptinkum tapurqa: —¿Qamchu kanki abueloy Rey Nabucodonosorpa Juda nacionmanta preso pusamusqan Daniel?

¹⁴ Uyarirqanim qamqa dioskunapa espiritunwan huntasqa kasqaykita, uyarirqanitaqmi qamqa allin entiendeq, yuyaysapa hinaspa llumpay yachayniyoq kasqaykitapas.

¹⁵ Ñoqam pusachimurqani ancha yachayniyoq runakunatawan espiritistakunata, paykunataqa pusachimurqani wak qellqata leespanku imam ninantapas willawanankupaqmi ichaqa manam entiendeyta atinkuchu, manataqmi yachankuchu imam ninantapas.

¹⁶ Ichaqa uyarisqayman hinaqa qamqariki atiwaqsi imakunapapas imam ninan willakuyta chaynataqsi sasallaña kaqkunatapas allichawaqtaq. Chaynaqa sichum wak qellqata leeykuspa imam ninanta niykuwaptikiqa sumaqllaña grosella pachawanmi pachaykachisqayki, kunkaykimanpas wallqachisqayki qorimanta collarwanmi, gobiernoypipas kimsa kaq gobiernaq kanaykipaqñam churasqayki —nispa.

¹⁷ Hinaptinmi Danielñataq reyta nirqa: —Regaloykikunaqa hina qampaqyá kachun, premio qowanaykitapas hukmanña qoykuy, ichaqa chaywanpas reynilláy, ñoqaqa leeykapusqaykim wak qellqataqa, willaykusqaykitaqmi imam ninantapas.

¹⁸ —Alto-altopi kaq Diosmi abueloyki Nabucodonosorta nacionkunapi gobiernachirqa hinaspam payta hatunchaspan kancharichkaqta hinaraq ancha reqsisqata rurarqa.

¹⁹ Chaynata hatuncharuptinmi nacionkunapi llapallan runakunapiwan huk rikchaq rimayniyoqkuna katkatataspa payta manchakurqaku, chaynapim runakunataqa munasqanman hina wañurachiqpas otaq kawsachiqpas otaq hatuncharuqpas otaq humillaykachiqpas.

²⁰ Aswanqa orgulloso rikuriruspa sonqonpi hoqarikuruptinmi paytaqa rey kayninmantapas wischururqa, qechururqataqmi ancha reqsisqa kaynintapas.

²¹ Paytaqa runakuna ukumanta wischuruptinkum rikurirurqa animal hina yuyayniyoqña, purun asnokunawanña kawsaptinmi mikuchirqakupas pastokunataña bueyeskunaman hina, paypa cuerpontaqa tuta sullapas nuyurqam. Chaynaqa payqa karqa alto-altopi kaq Dios llapallan runakunapa gobiernonpi munaychakusqanta reqsikunankamam, reqsikurqataqmi chay gobiernokunataqa munasqanman hina pimanpas Dios qoykusqanta.

²² Chaynaqa, Nabucodonosorpa miraynin Rey Belsasar, qampas chaykunata yachachkaspaykim mana humillakurqankichu.

²³ Ichaqa aswanraqmi hanaq pachapi kaq Señorpa contranpi hoqarikurunki. Qamqariki paypa templonpi vasokunatapas aparachimuspaykim ancha reqsisqa runakunawan, warmikikunawan hinaspa churi wachaykikunawan vinota upyakuchkanki chay vasokunapi. Hatunchachkankichiktaqmi qollqemanta, qorimanta, broncemanta, fierromanta, kullumanta hinaspa rumimanta taytachaykichikkunatapas. Chay taytachakunaqa mana qawakuqmi, mana uyarikuqmi hinaspapas mana ima musyaqmi, kawsachisuqniki hinaspa tukuy rurasqayki controlaq Diosmanmi ichaqa mana graciasta qorqankichu.

²⁴ Chayraykum paypuni kachamurqa wak qellqaq makitaqa.

²⁵ Wak qellqaqa nichkan: “MENE, MENE, TEKEL, UPARSIN” nispam.

²⁶ Wak qellqapa imam ninanqa kaynam: MENE ninanqa: Diosmi gobiernasqayki punchawkunata yupaspan puchukarachin, ninanmi.

²⁷ TEKEL ninanqa: Balanzapi pesasuptikim qamqa mana pesoyoq kasqanki, ninanmi.

²⁸ PARSIN ninanqa: gobiernoyki partesqa karuspam Media lawpi hinaspa Persia lawpi kaqkunaman qosqa kanqa, ninanmi.

²⁹ Chaynata Daniel willaykuptinmi Rey Belsasar kamachikurqa sumaqllaña grosella pachawan Danielta pachachinankupaq chaynataq qorimanta collarwanpas kunkanman wallqachinankupaq hinaspam llapallanman willachirqa Danielqa gobiernonpi kimsa kaq gobiernaq kasqanta.

³⁰ Hina chay tutallapim Caldea lawpi Rey Belsasarta wañurachirqaku.

³¹ Media lawmanta kaq Rey Darioñam hapikuykurqa chay gobiernotaqa, payqa karqa soqta chunka iskayniyoq watayoqñam.