Daniel 4 - Quechua Ayacucho Bible 1987

Rey Nabucodonosorpa locoyarusqanmanta

¹ Rey Nabucodonosormi cartata apachirqa kayna niqta: Ñoqa Rey Nabucodonosormi munachkani llapallan runakuna, lliw nacionpi yachaqkuna, huk rikchaq rimayniyoqkuna hinaspa tukuy kay pachapi *f**yachaqkuna hawkalla tarikunaykichikta.

² Ñoqam munachkani alto-altopi Diospa admirakuypaq milagrokuna rurapuwasqanmanta willaykuyta.

³ ¡Mayna-mayna hatunmi paypa milagronkunaqa! ¡Mayna-mayna admirakuypaqmi paypa rurasqankunaqa! Paypa gobiernonqa wiña-wiñaypaqmi takyanqa. Payqa runapa tukuy mirayninpim munaychakunqa.

⁴ Ñoqa Nabucodonosormi palacioypi hawka kawsakurqani, ñoqapaqa imaykunapas aswan-aswanmi yapakurqa.

⁵ Ichaqa camaypi waqtapaykuspaymi mosqorurqani mancharikuypaqta, pensamientopa intusqanmi hukmanyarurqani.

⁶ Chayraykum kamachikurqani Babilonia nacionpi llapallan yachayniyoq runakuna qayllayman hamunankupaq chaynapi mosqorusqaypa imam ninanta willawanankupaq.

⁷ Qayllaymanmi hamurqaku brujokuna, espiritistakuna, Caldea runakunapi kaq yachaqkuna hinaspa adivinaq runakuna. Paykunamanmi willarqani imam mosqorusqayta, ichaqa manam atirqakuchu chay mosqoypa imam ninan willawayta.

^8-9 Qayllaymanqa hamurqataqmi diosniypa sutinwan sutichasqa Beltsasar sutiyoq Danielpas, paypiqariki kawsakuchkan chuya dioskunapa espiritunmi, paymanmá mosqorusqayta willarqani kaynata: “Musyaqkunapa hatun jefen Beltsasar, yachanim ñoqaqa chuya dioskunapa espiritun qampi kasqanta, yachanitaqmi pakasqa kaqkunatapas lliwta musyasqaykita, chaynaqa mosqorusqayta uyariykuspayá niykuway imam ninanta.

¹⁰ Waqtapachkaspaymi mosqoyniypi kaynata rikurqani: Kay pachapa chawpinpim hatu-hatun sacha kachkasqa.

¹¹ Chay sacham wiñasqanman hina llumpayllataña rakuyarurqa. Chay sachapaqa puntanpas cielokunakamam chayarurqa. Tukuy hinastinmantapas rikupasllañam rikurirurqa.

¹² ¡Mayna sumaqmi kasqa llaqenkunapas! ¡Mayna achkallañam kasqa rurunkunapas! Chaypiqa llapallanpaqmi kasqa mikuykunapas. Purun animalkunapas chaypa ukunpim llantukusqaku. Alton pawaq animalkunapas kallmankunapim qesachakusqaku. Llapallan kawsaqkunapas chayllawanmi mantienekusqaku.

¹³ Chayna camaypi waqtapaykuspa mosqochkaspaymi qonqayta rikururqani hanaq pachamanta huk chuya angel uraykamuchkaqta.

¹⁴ Paymi nisyuneqta qayarikuspan nirqa: Chay sachata kuchuruychik. Kallmankunatapas qoruruychik. Rapinkunatapas chutaparuychikyá. Rurunkunatapas cheqerachiychikyá. Ayqekuchunkuyá llantuyninpi kaq purun animalkunapas. Pawarikuchunkuyá kallmanpi kaq alton pawaq animalkunapas.

¹⁵ Ichaqa sapiyoqraq kullutaqa hina pampallapiyá saqeruychik. Hina chayllapiyá fierro cadenawan wataruychik. Purun pasto ukupiyá bronce cadenawan wataruychik. Chaytaqa tuta sullayá nuyuchun. Purun animalkunawanyá pastota mikuchun.

¹⁶ Paypaqa yuyayninyá tikrakuruchun. Animal hinañayá payqa tanteachun. Qanchis watapuniyá payqa chayna kachun.

¹⁷ Kay sentenciataqa angelkunam qomuchkanku. Kay castigotaqa chuya angelkunam tanteanakuchkanku. Lliwmi yachanqaku alto-altopi Diosqa munaychakusqanta. Yachanqakum lliw gobiernonpi munaychakusqanta. Yachanqakutaqmi chay gobiernotaqa pimanpas munasqanman qoykusqanta. Yachanqakutaqmi humilde runakunatapas huk nacionpa jefen kananpaq churaykusqanta.

¹⁸ “Ñoqa Rey Nabucodonosormi chaykunataqa mosqorurqani, chaynaqa Beltsasar, qamyá niykuway chay mosqoyniypa imam ninanta. Gobiernoypi kaq yachayniyoq runakunaqa manam atirqakuchu willawayta, qanmi ichaqa willaykuwankiman, qampiqariki kachkan chuya dioskunapa espiritunmi” nispa.

¹⁹ Chaymi Beltsasar sutiyoq Danielqa huk rato hukmanyarurqa, mancharikuspanmi pensamientopa intusqan karurqa ichaqa reymi payta nirqa: “Beltsasar, amayá qamqa mancharikuychu imam mosqorusqaymantaqa chaynataq imam ninanmantapas” nispa. Hinaptinmi Beltsasarñataq nirqa: “Señorlláy, imam mosqorusqaykiqa kachun cheqnisuqniki runakunapaqyá imam ninanpas kachun enemigoyki runakunapaqyá.

²⁰ Qanmi qawachkasqanki hatu-hatun hinaspa raku-raku sachata, chay sachapaqariki puntanpas cielokunakamam chayarusqa chaymi tukuy hinastinmantapas rikupasllaña kasqa.

²¹ Llaqenkunapas chay sachapaqa sumaqllañam kasqa, rurunkunapas achka-achkataqmi kasqa, chaypiqa kasqataqmi llapallanpaq mikuykunapas, purun animalkuna chay sachapa ukunpi llantukuptinmi kallmankunapipas qesachakusqaku alton pawaq animalkuna.

²² Reynilláy, chay sachaqariki qanmi kanki, wiñaruspam qamqa llumpay atiyniyoq rikurirunki, qampa ancha reqsisqa kaynikiqa cielokunaman hayparuchkaq hinaraqmi llumpayllataña mirarun, munaychakuynikipas tukuy hinastinmantaqmi mastarikurun.

²³ Reynilláy, qamqa rikurqankitaqmi huk chuya angel hanaq pachamanta uraykamuspan kayna nisqanta: ‘Chay sachata kuchuruspayá chinkarachiychik ichaqa sapiyoqraq kulluntaqa hina pampallapiyá saqeruychik, hina chayllapiyá fierro cadenawan hinaspa bronce cadenawan wataruychik, saqeruychikpas purun pasto ukupitaqyá. Paytaqa tuta sullapas nuyuruchuntaqyá. Payqa qanchis watapuniyá purun animalkunawan pastota mikuchun’ nispa.

²⁴ Chaynaqa reynilláy, alto-altopi kaq Diospa decretasqanqa hinaspa sentenciasqanqa kachkan qam reyniypa contranpim.

²⁵ Reynilláy, qanmi runakuna ukumanta wischusqa kanki hinaspam purun animalkunawanña kawsanki, bueyeskunata hinataqmi qamtaqa pastokunataña mikuchisunki, qamtaqa tuta sullapas nuyusunkim. Reynilláy, chaynam kawsanki qanchis watapuni, chaymantañam qamqa reqsikunki alto-altopi kaq Diosqa llapallan runakunapa gobiernonpi munaychakusqanta, payqa chay gobiernotaqa munasqanmanmi pimanpas qoykunman.

²⁶ Reynilláy, qamqa uyarirqankitaqmi chay sapiyoq kullutaqa hina pampallapi saqenankumantapas, chaypa imam ninanqa kaymi: ‘Hanaq Pacha Dios kay pachapi munaychakusqanta reqsikuptikiñam kutiykachisunki gobiernoykitaqa.

²⁷ Chaynaqa reynilláy, uyariykuwayá kay consejasqayta, amaña huchallikuspayá allin kaqkunataña ruray, amaña mana allinta ruraspayá ñakariqkunamanta llakipayarikuy, ichapas qamqa hina hawkalla kawsakuwaq unaypaq’ nispa.

Mosqoynin cumplikurusqanmanta

²⁸ Rey Nabucodonosorman willasqanman hinamá cumplikururqa.

²⁹ Huk watamantañam Babilonia nacion palacionpa qatanpi purichkaspan

³⁰ nirqa: “¡Mayna hatunmi kay Babilonia llaqtaqa! Ñoqapunim hatun atiyniywan hatarichirqani kay llaqtataqa gobiernoypa capitalnin kananpaq chaynataq ancha reqsisqa kasqaymanta alabakunaypaq” nispa.

³¹ Chay rimasqanta manaraqpas tukuykuchkaptinmi hanaq pachamanta kaynata rimapayamurqa: “Rey Nabucodonosor, contraykipim kachkan huk decreto, gobiernoykiqa kachkan qanmanta qechusqañam.

³² Qamqa runakuna ukumanta wischusqam kanki hinaspam purun animalkunawanña kawsanki, bueyeskunata hinam qamtaqa pastokunata mikuchisunki, chaynam qamqa kawsanki qanchis watapuni, chaymantañam qamqa reqsikunki alto-altopi Diosqa llapallan runakunapa gobiernonpi munaychakusqanta, payqa chay gobiernotaqa munasqanmanmi pimanpas qoykunman” nispa.

³³ Chay ratollapim cumplikururqa Nabucodonosorpa contranpi rimarisqan hinaptinmi paytaqa wischurqaku runakuna ukumanta. Payqa bueyeskuna hinañam pastokunata mikurqa, cuerpontapas tuta sullam nuyurqa. Paypaqa pelonkunapas ankapa purankuna hinam wiñarurqa, sillunkunapas wiñarurqa alton pawaq animalkunapa sillunkuna hinaraqmi.

Rey Nabucodonosorpa sanoyarusqanmanta

³⁴ Chay sentenciawasqan tiempo cumplikuruptinmi ñoqa Nabucodonosor alto cielota qawarirqani hinaptinmi yuyayniy huktawan kutiykuwarqa. Chaymi alto-altopi kaq Diosta alabarqani. Wiña-wiñaypaq kawsaq Diostam yupaycharqani. Wiña-wiñaypaq Diosmanmi graciasta qorqani. Paypa munaychakusqanqa wiña-wiñaypaqmi takyanqa. Payqa runapa tukuy mirayninpim gobiernanqa.

³⁵ Kay pachapi kawsaq llapallan runakunaqa mana kaq hinallam paypa piensasqanman hinaqa. Payqa munasqanman hinam ruran hanaq pachapi tropakunawanqa. Payqa munasqanman hinam ruran kay pachapi *f**yachaqkunawanqa. Paypa atiyninpa contranpiqa manam pipas sayarinmanchu. Paypa imam rurasqanmantaqa manam pipas tapupayanmanchu.

³⁶ Chaypunillamá ñoqamanqa yuyayniy kutiramuwarqa, gobiernoypas ancha reqsisqa kananpaqmi kutiykachiwarqa inti hina sumaqllaña kanchayniyta. Ñoqata maskawanankupaqmi hamurqaku consejaqniykunapas chaynataq gobiernoypi ancha reqsisqa runakunapas. Nacionniypi gobiernanaypaq allinta takyachiwaptinmi ñawpaqmantapas aswan munayniyoqraq karqani.

³⁷ Chayraykum ñoqa Nabucodonosor alabaspay hatunchani Hanaq Pachapi kaq Reyta, hina paytataqmi yupaychanipas, payqariki tukuy imakunatapas ruran cheqapman hinam, imam rurasqankunapas hina allinllataqmi. Payqa humillachinmi hatun tukuq runataqa.