Daniel 2 - Quechua Ayacucho Bible 1987

Rey Nabucodonosorpa mosqoyninmanta

¹ Iskay watamanña rey Nabucodonosor gobiernachkaspanmi mosqorurqa, sonqon hukmanyaruptinmi manaña puñuytapas atirqachu.

² Chayraykum qayachirqa brujokunata, espiritistakunata hinaspa musyaqkunata, qayachirqataqmi Caldea runakunamanta yachaqkunatapas, chaynapimá paykunaqa hamurqaku reypa qayllanman.

³ Reymi paykunata nirqa: —Mosqorusqayraykum imam ninanta mana yachaspay hukmanyasqa kachkani —nispa.

⁴ Hinaptinmi Caldea runakunapi kaq yachaqkuna Aram lawpi rimayninkuman hina reyta kaynata nirqaku: —Wiñaypaq kawsakuq reyllayku, imam ninanta willaykunaykupaqyá mosqosqaykita willaykuwayku —nispa.

⁵ Chaymi reyñataq nirqa: —Ñoqaqa chunkay-chunkaytam tanteakuruni chaynaqa qamkunayá allinta uyariwaychik: Mosqosqaytapas hinaspa imam ninantapas mana willawaspaykichikqa tisapasqam kankichik, wasikichikpas qopa patañam rikurirunqa.

⁶ Ichaqa imam mosqorusqaytawan imam ninantapas willaykuwaptikichikqa qamkunamanmi qosqaykichik regalokunata hinaspa premiokunata, chaywanpas qamkunataqa ancha reqsisqatam rurasqaykichik, chaynaqa willaykuwaychikyá imam mosqorusqaytawan imam ninanta —nispa.

⁷ Chaymi yachaqkuna yapamanta reyta nirqaku: —Reynillayku, qamqa niykuwaykuyá imam mosqorusqaykita hinaptinqa ñoqaykupas willaykusqaykikum imam ninanta —nispa.

⁸ Hinaptinmi reyñataq nirqa: —Ñoqaqariki yachanipunim qamkunaqa tiempo pasachiy munasqaykichikta, qamkunaqariki yachankichikmi chunkay-chunkay tanteakurusqaytaqa.

⁹ Imam mosqorusqayta mana willawaptikichikqa llapallaykichikpaqmi kachkan huk castigolla, cheqaptapunipas qamkunaqa kay tantearusqay pasarunanpaqmi llullakunata hinaspa yanqakunata niwanaykichikpaq tanteanakurunkichik. Chaynaqa niwaychikyá imam mosqorusqaytapas, chaychiki chayraq yachasaq chay mosqoyniypa imam ninan willaway atinaykichiktapas —nispa.

¹⁰ Hinaptinmi chay yachaqkuna reyta nirqaku: —Kay pachapiqa manam pipas kanchu qam reyniykupa mañakusqan willakuy atiq runaqa, manataqmi kunankamaqa reykunaqa maynaña hatun kaspapas otaq maynaña atiyniyoq kaspapas mañakurqachu kay qampa mañakusqayki hina sasa-sasataqa, manamá chaynataqa mañakurqakuchu mayqen brujomantapas, espiritistamantapas nitaq Caldea runakunapi kaq yachaqkunamantapas.

¹¹ Qampa mañakusqaykiqa reynillayku, ancha-ancha sasallañam, manam chaytaqa pipas willasunkimanchu. Atispaqariki-atinman dioskunallam ichaqa paykunaqa manamiki *f**yachan runakunawanchu —nispa.

¹² Chayta uyariykuspanmi reyqa llumpa-llumpayta piñakururqa hinaspam kamachirqa Babilonia nacionpi llapallan yachayniyoq runakunata wañuchinankupaq.

¹³ Chaynata rey decretaruptinmi Danieltapas llaqtamasinkunatawan maskarqaku wañurachinankupaq.

Reypa mosqoyninta Daniel willaykusqanmanta

¹⁴ Arioc sutiyoq runam karqa reyta waqaychaq soldadokunapa capitannin, paymi lloqsirqa chay yachayniyoq runakunata wañuchinanpaq. Ichaqa Danielmi paywan rimarqa sumaqllataña, yachayllawanña rimaspanmi

¹⁵ tapurqa: —¿Imaynanpitaq reyqa kamaykachikamun kaynaña llumpay decretotaqa? —nispa. Hinaptinmi Arioc imam pasakusqanmanta willarqa Danielman.

¹⁶ Chaymi Daniel yaykurqa reypa kasqanman hinaspam ruegakurqa tumpata suyaykunanpaq chaynapi reypa mosqorusqantawan imam ninanta willaykunanpaq.

¹⁷ Wasinman Daniel kutiruspanmi imam pasakusqanmanta willarqa llaqtamasin Ananiasman, Misaelman Azariasman.

¹⁸ Willakurqaqa chay pakasqa kaqkunamanta Hanaq Pacha Diospa yanapakuyninta mañakunankupaqmi chaynapi Babilonia nacionpi wakin yachayniyoq runakunawan kuska mana wañurunankupaq.

¹⁹ Chay tutam Danielta Diospuni qawachirqa chay pakasqa kaqkunataqa huk revelacionpi chaymi Danielqa hanaq pacha Diosta alabarqa

²⁰ kaynata: Wiñaymanta wiñaykamayá alabasqa kachun Diospa sutinqa. Paymantamiki hamun tukuy yachaykunaqa. Paymantamiki hamun tukuy atiyqa.

²¹ Payllam tikran tiempokunatapas. Payllam pasachin imam pasanantapas. Payllam reykunatapas gobiernonmanta horqoykun. Payllam reykunatapas gobiernananpaq churaykun. Payllamiki yachaysapakunatapas yachachin. Payllamiki yuyaysapakunatapas entiendechin.

²² Sasa entiendena kaqkunatam payqa runakunaman qawachin. Pakasqakuna kaqkunatam payqa runakunaman qawachin. Payqariki yachanmi tutayaypi kaqkunataqa. Paywanmiki kachkan achkiyqa.

²³ Abueloykunapa Diosnin, qanmanmi graciasta qoyki. Abueloykunapa Diosnin, qamtam ñoqaqa alabayki. Qanmiki ñoqamanqa qowarqanki yachayta. Qanmiki ñoqamanqa qowarqanki atiyta. Kunanmá qawaykachiwankiku imam mañakusqaykuta. Kunanmá yachaykachiwankiku reypa mosqorusqanta.

²⁴ Chaymantam Danielqa pasarqa Ariocwan rimamuq, paytamiki reyqa kamachirqa Babilonia nacionpi llapallan yachayniyoq runakunata wañuchinanpaq. Danielmá payta nirqa: —Amayá wañuchiychu Babilonia nacionpi yachayniyoq runakunataqa. Ñoqatayá reyman pusaruway hinaptinmi mosqoyninpa imam ninanta willaykamusaq —nispa.

²⁵ Hinaptinmi chaypunilla Arioc pusarqa Danielta Rey Nabucodonosorpa ñawpaqninman hinaspam kaynata nirqa: —Reylláy, Juda nacionmanta preso hamuqkuna ukupim tariramuni mosqorusqaykipa imam ninantapas willaykuy atiqta —nispa.

²⁶ Hinaptinmi Beltsasar sutiyoq Danielta rey tapurqa: —¿Yaqachum imam mosqorusqaytawan imam ninanta willaykuwankiman? —nispa.

²⁷ Chaymi Danielñataq kaynata nirqa: —Chay pakasqa kaqkuna mosqorusqaykitaqa manam willayta atisunkimanchu yachayniyoq runakunapas nitaq espiritista runakunapas nitaq brujokunapas nitaq adivinaq runakunapas.

²⁸ Ichaqa kachkanmi hanaq pachapi Dios, payllam kayna pakasqa kaqkunataqa reqsichin hinaspam qanmanpas, Reylláy Nabucodonosor, reqsichisunki hamuq tiempokunapi imam pasananmanta. Ñoqam willasqayki puñuchkaspa imam mosqorusqaykitawan revelacionpi chaskisqaykita, chayqariki kaynam karqa:

²⁹ Reynilláy, qanmi camaykipi kachkaspayki hamuq tiempokunapi kananmanta piensamientopa intusqan kachkarqanki hinaptinmi pakasqa kaqkuna reqsichiq qanman willasurqanki.

³⁰ Chay pakasqa kaqkunataqa ñoqamanpas qawachiwarqam, ichaqa chaytaqa qawachiwarqa manam llapallan kawsaq runamantapas aswan yachayniyoq kasqayraykuchu, chaytaqariki qawachiwarqa chay mosqorusqaykipa imam ninanta qanman willanaypaqmi chaynataq pensamientopa intusqan kasqaykitapas entiendenaykipaqmi.

³¹ —Reynilláy, mosqoynikipiqariki qawarqanki ñawpaqnikipi hatunkaraq llumpay kancharichkaq hinaspa mancharikuypaq runa kaqlla sayaqtam.

³² Chaypa umanqariki kasqa qori-purom, qasqonñataqmi brazonkunapiwan kasqa qollqemanta, wiksanñataqmi moqonkama kasqa broncemanta.

³³ Moqonmanta chakinkamañataqmi kasqa fierromanta, chakinkunañataqmi kasqa parten fierromanta, partenñataq kañasqa mitumanta.

³⁴ Qawachkaptikim mana pipas horqomuchkaptillan huk rumi horqomusqa karqa, chay rumim kumpakamuspan hapirurqa chay parten fierromantawan mitumanta chakinpi hinaspam ñutuparurqa.

³⁵ Chaynapimá qonqayta chay fierropas, kañasqa mitupas, broncepas, qollqepas hinaspa qoripas lliw rikurirurqa ñutu allpa hinallaña, cosecha tiempopi erapi wayrapa apasqan tamo hinallañam chaykunaqa rikurirurqa chaynapim maypi kasqanpas manaña yachakurqachu. Ichaqa chay runa kaqlla sayaqta ñuturuq rumim ichaqa kay pachapas huntaykuyta hatu-hatun orqoman tikrakururqa.

³⁶ Chaytamá qamqa mosqorqanki reynilláy. Kunanñataqmi willasqayki chaypa imam ninanta.

³⁷ Reynilláy, qamqariki kanki reykunapapas reyninmi, Hanaq Pacha Diosmi qosurqanki nacionkunata munaychakuspa atiywan gobiernanaykipaq chaynataq allin reqsisqa kanaykipaq.

³⁸ Qanmanqariki qosurqankitaqmi tukuy hinastinpi runakunatapas, animalkunatapas hinaspa alton pawaqkunatapas, chaykunataqariki qosurqanki munaychakunaykipaqmi. Reynilláy, qanmiki kanki chay sayaqpa qorimanta umanqa.

³⁹ Qampa gobiernoyki tukuruptinñataqmi hatarimunqa huk gobiernoña, ichaqa chay gobiernoqa menosmi kanqa qampa gobiernoykimantaqa, chaypa qepantañataqmi hatarimunqa bronceman rikchakuq kimsa kaq gobierno. Chay gobiernom tukuy kay pachapi munaychakunqa.

⁴⁰ Chaymantañataqmi hatarimunqa fierro hina llumpay fuertellaña tawa kaq gobierno. Imaynam fierroqa tukuy imata pakipaspan ñutupan, chaynam kay gobiernopas llapallan chay gobiernokunata pakipaspan ñutuparunqa.

⁴¹ —Reynilláy, rikurqankitaqmi chay sayaqpa chakinkunaqa hinaspa dedonkunaqa huknin parten mitumanta kasqanta huknin partenñataq fierromanta kasqanta, chayqariki nichkan chay gobiernoqa partepasqa kanantam, chaywanpas chay gobiernopa partenqa kanqa fierro hina allin takyaqraqmi, qamqariki rikurqanki fierrowan taqrunasqa mitutam.

⁴² Imaynam chay sayaqpa chakinpa dedonkuna wakin karqa fierromanta wakinñataq kañasqa mitumanta, chaynam chay gobiernopas parten kanqa allin takyaq, partenñataq pisi atiyniyoqlla.

⁴³ Reynilláy, qanmi rikurqanki chaqrusqa fierrotawan kañasqa mituta, chaynam chay gobiernopiqa runakunapas taqrunakunqaku ichaqa imaynam fierrowan mituqa mana cheqaptachu laqanakun chaynataqmi runakunapas manataq hukllawanakunmanchu.

⁴⁴ Chay hamuq reykuna gobiernachkaptinmi Hanaq Pacha Dios hatarichinqa mana tuñichiy atina gobiernota chay gobiernoqa huk runamanqa manam qosqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq.

⁴⁵ Qamqariki reynilláy, rikurqankim mana pipas horqochkaptillan huk rumi kumpakamuspan fierrota, bronceta, kañasqa mituta, qollqeta hinaspa qoritapas ñutuparusqanta. Chayraykum hatu-hatun Diosqa qanman qawachisurqanki hamuq punchawkunapi imam pasananmanta, chaynaqa chay mosqorusqaykiqa ciertopunim, chaypa imam ninanpas cheqaptaqmi —nispa.

⁴⁶ Chaynata Rey Nabucodonosor uyariykuspanmi Danielpa ñawpaqninpi qonqoranpa pampakama kumuykurqa hinaspam kamachirqa Danielman ofrendakunata ofrecenankupaq chaynataq inciensotapas kañapunankupaq.

⁴⁷ Hinaspam Danielta nirqa: —Cheqaptapunipas qamkunapa Diosnikichikmi llapa dioskunapa diosninqa, payqa reykunapapas kamachiqnintaqmi, payllam pakasqa kaqkunataqa rikuchiyta atin. Chayraykum qamqa kay pakasqa kaqkunata rikuykachiwanki —nispa.

⁴⁸ Danielta rey llumpayllataña hatunchaspanmi qorqa achkallaña suma-sumaq regalokunata hinaspam churarqa Babilonia lawpi prefecto kananpaq. Paytaqa churarurqataqmi chay nacionpi llapallan yachayniyoq runakunapa jefen kananpaqpas.

⁴⁹ Chaymantam reyta Daniel mañakurqa Sadracpaq, Mesacpaq hinaspa Abed-negopaq hinaptinmi rey churarqa Babilonia lawpi kamachikuqkuna kanankupaq, kikin Danielñataqmi quedarqa reypa palaciollanpi.