Daniel 12 - Quechua Ayacucho Bible 1987

Tukupay tiempopa chayamunanmanta

¹ —Chay tiempopim rikurimunqa Miguel sutiyoq hatun kamachikuq angel, payqariki llaqtamasikikunata nanachikuq angelmi. Chay tiempoqa ñakariy tiempom kanqa. Nacionkunapa rikurisqanmantapas manam karqachu chayna tiempoqa. Manataqmá chayna ñakariyqa karqachu chay tiempokamaqa. Ichaqa chaywanpas chay tiempopim llaqtamasikikuna librasqa kanqaku. Libropi qellqasqa sutiyoqkunam lliw librakunqaku.

² Allpapi achkallaña puñuqkunam rikcharichisqa kanqaku. Wiñaypaq kawsanankupaqmi wakinqa kawsarimunqaku. Wakinñataqmi penqaypaq kawsarimunqaku. Wiñay mancharikuypaqmi kawsarimunqaku.

³ Yachayniyoq runakunaqa mana puyuyoq cielokuna hinam kancharinqaku. Achkallaña runakunata allin ruraymanña pusaqkunaqa lucerokuna hinam wiñaypaqña kancharinqaku.

⁴ —Ichaqa Daniel, kay willasqaykunataqa libropiyá wichqaruyña hinaspayá tukupay tiempo chayamunankama selloykuy. Achkallaña runakunam kayman-wakman purinqaku aswan-aswan yachayniyoq karuyta munaspanku —nispa.

⁵ Ñoqa Danielmi qawarispay rikurqani iskay runakunata, hukninmi sayachkasqa mayupa waklaw chimpanpi, hukninñataqmi sayachkasqa mayupa kaylaw chimpanpi.

⁶ Hukninmi tapurqa chay mayupa hawanpi sayaq linomanta pachayoq runata: —¿Haykapitaq cumplikunqa kay admirakuypaq kaqkunaqa? —nispa.

⁷ Hinaptinmi chay mayupa hawanpi sayaq linomanta pachayoq runa makinkunata altoman hoqarirqa hinaspam kawsaq Diosrayku juraspan nirqa: —Kaykunaqa cumplikunqa kimsa tiempo partenmantañam, Diospa sapaqchakusqan runakunapa atiynin puchukarachiq runa chinkachisqa kaptinñam tukuy kaykunaqa cumplikunqa —nispa.

⁸ Chay uyarisqayta mana entiendespaymi payta tapurqani: —Taytáy ¿imaynataq kanqa tukuy kaykunapa tukupayninqa? —nispa.

⁹ Hinaptinmi payñataq niwarqa: —Qamqa pasakuyñayá Daniel. Tukuy kay willasqaykunaqa wichqasqa kaspanmi tukupay tiempokama sellasqa kanqa.

¹⁰ Achkallaña runakunam mana allin ruraykunamanta rakikuspa mana huchayoqña rikurinqaku, metal chulluchisqa hinam paykunaqa chuyanchasqa kanqaku. Mana allinlla ruraqkunam ichaqa hina mana allinllata ruranqaku, paykunaqa manam imatapas entiendenqakuchu, entiendenqakuqa yachayniyoq runakunallam.

¹¹ Diosman sapa punchaw animal ofrecena tanirachisqankumantam otaq Diospa templonpi purmachina millakuypaq kaqkunata churasqankumantam pasanqa waranqa iskay pachak isqon chunkan punchawkuna.

¹² ¡Mayna kusisqam kanqa pacienciawan waranqa kimsa pachak kimsa chunka pichqan punchawkunakama chayaqqa!

¹³ Daniel, qamqa punchawnikikuna tukunankama kawsaspayá samakuyña, qamqa puchukay punchawkunapiñam hatarimunki tupaqnikita chaskinaykipaq —nispa.